Thường trực UB Quốc phòng saong An ninh di Quốc Hội bahrau ngak bruk haong dom gah pambuak tal ka bruk langyah, taduan mek panuac, ramik pasiam dự thảo Hukum jalan mbak saong hukum siam mekre, salamat jalan mbak. Dua danak dak ini, hu pok tagok UBTVQH di mbang nyaom ka 31. Sa dalam dom asal kadha hu rilo menuac caik hatai sangka lac daok patui jalan adat urak ini ka bruk pakauk oh brei peih nduac radaih tuk dalam darah hu atau dalam suak yava hu cồn. Tui panuac di Chủ nhiệm UB Quốc phòng saong An ninh Lê Tấn Tới, ini lac dom asal kadha praong, gaok tal abih menuac peih nduac radaih angaok jalan, hu cử tri saong rahra biak caik hatai sangka dalam tukvak tapa.

Bí thư Tỉnh ủy Đồng Nai Nguyễn Hồng Lĩnh bahrau mai ravang, tadhau ayuh prein yava saong jao Thiệp mừng thọ alin hadaih amuk Trịnh Thị Khơng umo 119 thun, daok di xã Bình Lộc, ban Long Khánh, Đồng Nai. Amuk Khơng lac urang praong thun abih daok diuk di tỉnh ini, urak ini amuk hu labaih 150 anek taco. Bí thư Tỉnh ủy Đồng Nai ndom lac, menuac sia umo atah lac sa dalam dom kadha brei mboh chất lượng raidiuk di pak ini hu paglaong tagok. Nan ye karja njauk caik hatai sangka jang tal sang amuk Khơng saong dom sang karei hu urang praong thun.

Meng harei 14-17/3 tỉnh Kiên Giang brei kreik taong abih dom pabah cống Cái Lớn – Cái Bé piah pacang mbak, ghe gilai oh brei nao tapa dom pabah cống. Di labik cống Cái Lớn saong cống Cái Bé hu caik pandap brei thau ka jalan kraong nội địa saong hu kapul tacei pato jalan piah khik kajap salamat bruk nao mai jalan kraong. Ia njaom mbak daok tagok glaong di pak ini. Angaok kraong Cái Lớn, mbak 4‰ njaom dalam tame meng 48-52km; mbak 1‰ njaom tame dalam meng 55-57km.

Di ban Mỹ Tho, tỉnh Tiền Giang, ia mbak daok tagok glaong jang tanut báo động 3, ngak ka rilo sang bhap bini, rilo jalan hẻm biar njauk ia dauk dalam labaih meteh mét. Bruk njauk biai nan lac ia ndik mbang ini lac ia mbak mangaok 4 phần rabau saong rah tabiak tuk kreh melam nan ye ngak kan kandah tal raidiuk bhap bini saong khat lahik praong ka drap ar. Tui Đài Khí tượng thủy văn Tiền Giang, ia ndik glaong urak ini tal tanut glaong di abih lac 1,84m saong daok trun. Ia mbak ndik tagok daok hu mboh sa mbang di jhung bilan 4 tal nan ye bhap bini brei hu dom jalan ngak piah patrun khat lahik.

Meng akaok thun tal ini, yaom patei baoh di huyen U Minh Thượng, labik iek yau “Bein patei taneh ia” di tỉnh Kiên Giang trun gam gam saong urak ini yaom biak biar lac 3.000 đồng sa tathi. Ngan haong yaom nan, po bein hu laba biak takik, atau khat. Tui dom urang pala patei, bruk ba tal trun yaom lac kayua dom pabah ribong kareih veik piah pacang ia mbak, nan ye dom kraong ribong dalm bhum thu ia, gaiy oh nao mai hu, dalam tuk nan, dom jalan betong daok sit yau nan ye dom radaih praong oh tame bein pajeng patei hu.

Dalam tuk talei pambuak bruk dua gah daok hu siam veik, Trung Quốc bahrau tabiak panuac lac brei trun yaom kak je alak vang blei meng Australia. Yaom lac urak ini oh ka thau cambaih bruk meng gah Trung Quốc min Australia mboh ini lac sa bruk ngak siam. Dahlau di nan, kayua oh njauk hatai haong bruk Trung Quốc kak je glaong alak vang di Australia, Australia hu ba bruk ini tabiak Gah pablei salih dunya.

Tui kuhria mboh birau abih di LHQ, uranaih di dunya metai dahlau umo 5 thun trun jaik meteh kuhria meng thun 2000, trun biar abih: 4,9 trieu di thun 2022. Yau nan min, yaok 6 giây hu sa uranaih metai. Dom Urang metai ralo meng lac kayua dom makna bo pacang caga atau taong ruak meda dhit hu, yau ndih tapui kurang bilan, viêm phôi atau aih caraoh. LHQ brei thau, bruk taom gaok siam jang haong bruk iek glang y tế bhap bini saong iek glang prein yawa tuk camereip meda hu siam jang biak ralo.

Lambaok pakat glaong ka sarak đối ngoại saong an ninh di Liên minh châu Âu (EU) Josep Borrell brei thau, bruk srau kadau gah ngak pahla di Gaza oh lac kayua ia dauk ia sua, atau bala meng langik tasik bo lac “kayua anek menuac ngak tabiak". Dalam tuk Mỹ saong EU duah jalan meng jalan tasik atau jalan kapal haoh piah ba pandap daong tame Gaza ye jalan daong meng jalan radaih daok njauk kreik veik saong bruk eik lipa daok hu pandar yau sa janih pandap mesruh./.