Mban Bangsa HĐND tỉnh Bình Thuận birau patabiak jalan pasang iek bruk buh jien tame padang ngak saong khik iek, pandar dom danak dak ba ia pandar di bhum urang bangsa takik di tỉnh. Tukvak pasang iek meng bilan 3 tal bilan 6 thun ini. Asar kadha pasang iek pataom tame bruk padang ngak  saong khik iek, pandar dom danak dak  pabak ia di bhum urang bangsa takik  dalam tỉnh; Pambuak haong bruk pacang caga, tham nhũng, mbang jien, brei patak pataom, pacang palai pajoa  meyah hu dalam bruk pandang ngak  saong khik iek, pandar dom danak pabak ia pandar di bhum urang bangsa  takik dalam tỉnh.

Đồn biên phòng Yok M’Bre, bol lin Biên phòng tỉnh Đắk Lắk pambuak haong dom pakat ủy, kanja palei saong Công ty TNHH Đăng Phong bahrau peih bruk jao danak dak bingun kruac rok ia hacih pabak ka rahra di puk 10, xa tapen negar Ea Bung, huyện Ea Súp, tỉnh Đắk Lắk. Danak dak hu padang ngak di Sang ilamo rahra di palei 10, xã Ea Bung, hu abih tih phun jien buh tame ngak lac 50 triệu đồng npiah ba mbuan lagaih ka raidiuk di mikva. Ini lac phun jien kayua Đồn biên phòng Yok M’bre jak ba Công ty Đăng Phong daong brei. Danak dak peih pakah ba tame pandar, mikva di pak ini thei jeng bui sambai, chreih chrai jang.

Tui kuhria di Pasak kuhria mboh dahlau bruk langik tasik, meng harei 21 tal 31/3, di bhum Tây Nam Bộ hu hajan, harei pandiak rilo saong hu labik  pandiak khang. Langik pandiak glaong abih di bhum Tây Nam Bộ bhian meng 31-34 độ C, hu labik labaih 35 độ C. Brei thau lac, bruk njom ia mbak di bhum taneran kraong Cuu Long pambak tame halau ia di gah angok kraong Me Kong, ia ndik saong daok salih karei dalam tukvak anak tal. Dom labik dalam bhum taneran kraong Cuu Long brei duah thau sumu dom bruk kuhria mboh dahlau ka langik tasik saong hu dom jalan pacang caga  bruk njom ia mbak. Dom bhum palei  brei khik piah ia taba tuk ia trun biar piah hu ia pruh ka phun pala saong ia  pandar.

 Urang ngak nong pala maraik kalu pak tỉnh Bình Phước daok tame bilan puac paik asal. Yaom blei maraik kalu tagok labaih 100.000 đồng/kg – lac yaom glaong abih kuhria dalam 5 thun mai ini, ba bui sambai ka urang ngak nong. Min, gah ngak nong jeng kakei rahra njauk caik hatai, pala ngak tui njauk jalan ba tabiak saong quy hoạch. Bruk pandar dom ilamo kỹ thuật piah sangka iek glang phun maraik kalu piah cak rok patagok khang kajap lac bruk biak njauk ngak. Abih di nyu nan lac, piah paglaong yaom maraik kalu, rahra njauk ngak tui jalan hữu cơ, salamat, oh pandar dom janih khak, pruh jru ngak kanjak jhak tal alam labik daok.

Yaok ribau hecta phun pala di huyen Krông Nô, bhum pasak pandiak di tỉnh Đắk Nông daok dalam bruk kurang ia pruh, mbuan gaok tatua riya trak. Karja saong gah chức năng daok kham merat ba ia tal dom bhum jiak taphia piah daong ka phun pala. Anak bruk pandiak bhang tua riya sraw kadau, huyen Krông Nô  hu ngak bruk haong dom huyen jaik taphia  yau Đắk Mil saong Đắk Song piah ba ia di dom binek praong mai pacang pandiak bhang. Anak  meta, hu njauk gauk haong huyen Đắk Mil peih ia meng Hồ Tây (padang jaik 3 triệu mét khối) mai huyện Krông Nô ba ia mai tui craoh Đắk Sôr.

Dunya daok lah dalam bruk mesuh pacang nerak điện tử. Ini lac panuac di dom chuyên gia Liên hợp quốc hadei di tuk sa pathau khan bahrau ini brei mboh 62 triệu tấn phone pan tangin saong pandap panda điện tử njauk prah klak di baoh taneh tok dalam sa thun. Nerak tathuak điện tử lac dom pandap klak nao hu phích klauk dien atau pin, meda hu dom janih kanjak jhak yau thủy ngân, gam tui di nan jeng ngak jhak tal alam labik daok saong prein yava. Tui dom chuyên gia di Liên Hợp Quốc brei thau lac, bruk patagok ini lac kayua dom bruk karei dalam nan hu tanut blei pandar biak glaong, kurang jit vu ngak pasiam, tukvak pandar di pandap điện tử katut jang saong kurang labik khik ramik nerak điện tử.

Pathau khan drap ar kaya pandap Hồ Nhuận thun 2023 (Hurun Wealth Report 2023) birau ini brei mboh, dom baoh sang kaya meda di T.Q trun mbang ka dua dalam 15 thun ini, kuhria abih tih  drap ar trun 3,6% dut saong thun dahlau. Jeng tui harak ini, dom sang kaya meda di Trung Quốc jeng daok pataom di dom đô thi praong, dalam nan 3 ban raya dang akaok  lac Bắc Kinh, Thượng Hải saong Hồng Kông, patui di nan lac Thâm Quyến saong Quảng Châu, hadei di nan lac Hàng Châu saong Ninh Ba. Dalam 30 ban raya pataom ralo abih meblah tal 67% kuhria taong abih  baoh sang kaya meda dalam taneh ia. Pathau khan jeng brei mboh, ameh lac palih ruah dahlau abih di dom urang hu jien di Trung Quốc dalam sa thun anak tal.

Gah Cảnh sát hình sự dunya (Interpol) bahrau ini hu panuac kakei ka bruk pagait tapa mang piah pablei salih manuac tui kuhria daok rahtabiak di rilo labik di dunya, dom urang njauk bala tagok tal yaok ratuh ribau urang. Dom urang palua pagait manuac tapa dom gah mayaih khan bruk ngak ja saong pandar dom urang ini ngak bruk yau pagait tapa online. Thun blaoh, cảnh sát Philippin hu cap mek jaik 3.300 urang dalam 2 mbang taong tame dom labik hu brei thau lac dom pasak pagait di Manila.