Akok UB bhap bini TPHCM Phan Văn Mãi birau hu tacei pato ka bruk taong yaom dak labik dang dom urang pan akaok, daong akaok đơn vị dalam bruk brei buh jien karja thun 2023. Bruk taong yaom dak labik dang nan hu ngak haong kapol nyaom, urang pan akaok dom sở, dom gah, dom bhum palei saong dom po buh jien tame ngak meng phun jien karja. Tui nan, meyah brei peih jien ala 80%, urang dang akaok đơn vị oh hu mbang jien bilan pabak – thu nhập tăng thêm Qúy IV/2023. Hu thau, thun ini, TPHCM hu jao brei peih phun jien di karja kuhria bih tih labaih 68.000 tỷ đồng. Tal harei 15/12, TPHCM peih jien hu 36.465 tỷ đồng.

Bộ Chỉ huy Bộ đội Biên phòng tỉnh An Giang bahrau peih bruk pok meyaom 7 urang daok ranaih umo thun 2023. Ini lac dom urang jakar, urang đoàn hadah krah oh huac kan kandah, glaih glar, patagok bruk sami samar, sahneng duah bahrau, ba akaok nao dahlau saong ngak siam dom bruk di drei. Bruk pok meyaom ini piah patagok bruk ba akaok nao dahlau di urang daok ranaih umo thun di Bộ đội Biên phòng tỉnh An Giang dalam bruk ngak di drei anak tal. 

UB bhap bini huyen Gò Dầu, tỉnh Tây Ninh birau peih pakak sang bac THCS angan kumei Liệt sĩ, AH tapon nyaom bol pan phao kraong Bhap bini Nguyễn Thị Bé. Dahlau di nan, Sang bac THCS Nguyễn Thị Bé khut, mbaih mbaoh khang, dalam tuk sang bac hu biak ralo anek bik di urang ngak dalam labik ngak kong raidiuk kan kandah daok tui bac. Tuk peih pakak, dom đơn vị hu daong alin brei 100 paok jien bac ka dom adei anek saih di sang bac. Langiu di nan, sang bac hu taduan sổ tiet kiem jien, tu tapuk, dom tapuk duh ka bruk pato bac meng dom đơn vị daong brei.

UBND tỉnh Đồng Nai bahrau peih bruk pasang iek tapak saong ngak bruk haong dom gah hu pambuak tal ka bruk peih taneh ngak jalan cao tốc Biên Hòa – Vũng Tàu. Ong Võ Văn Phi – Phó Chủ tịch UBND tỉnh Đồng Nai ieu tacei mBan khik ramik danak dak bayar jien peih taneh saong daong tái định cư Đồng Nai brei ngak salah bruk yaok iek dalam bilan 12/2023 dom taneh riya, drap ar daok dalam danak dak.. Brei mek dahlau mbaok taneh cao su, kraong, craoh. Jhul samar bruk padang angan bayar jien, brei thau cambaih yaom jien bayar, jien daong piah dom harei tal peih bruk bayar jien ka bhap bini. 

Di labik ngak kong Tân Phú Thạnh, huyện Châu Thành A, tỉnh Hậu Giang birau rah tabiak bruk mbaoh tangin jao brei mbaok taneh Danak sang mac ngak tabiak pandap mbang kaya kan dalam ia Sunjin, hu prein ngak 126.000 tấn sa thun. Ini lac danak ngak tabiak pandap mbang raong ikan hadang, pandar cong nghe birau, hu ngak tabiak tui jalan pambuak gauk. Tuk danak dak hu peih tabiak ngak bruk, tui kuhria prein ngak tabiak pandap lac 126.000 tấn sa thun, jien mek tame labaih 160 triệu USD, palei tabiak negar langiu jaik 40 triệu USD. Ini lac dom tanut rik tame ngak brei hu makna praong piah peih ngak bruk cak rok patagok kinh te – xa hoi di tỉnh Hậu Giang dalam tukvak anak tal.

Quốc hội Thái Lan caga ginum biai ka 4 dự thảo hukum ka bruk lakhah caga likei haong lakei atau kumei haong kumei, ba taneh ia ini yam jaik jang tal bruk lac njauk adat hukum bruk lakhah caga nan haong bruk buh phiếu camereip abih peih tabiak di harei ini. Phó Thủ tướng Somsak Thepsuthin brei thau lac Rajaei hu peih bruk pasang iek meng harei 31/10 tal harei 14/11 brei mboh lac jaik 97% menuac sia pachreih tui dự thảo hukum. Meyah hu brei tapa dalam mbang ginum biai camereip di QH di harei ini, meda ba Thái Lan jeng taneh ia ka 2 di châu Á, hadei di Nepal, brei adat ngak lakhah di likei haong likei atau kumei haong kumei 

Yaok pluh menuac jeng daok lahik, jaik 140 urang metai hadei di mbang megei baoh taneh khang 6,2 độ di dua tỉnh Cam Túc saong Thanh Hải, bhum Tây Bắc Trung Quốc, melam 18/12. Tui panuac khan di dom urang roh duah, dom menuac daok gar dalam mbuk patau haluk dalam langik la-an ala 100 C samar trun thân nhiệt saong meda diuk hu meng 5 tal 10 mon ngan hoang urang oh njuak hagait. Dom urang nan metai blaoh tuk duah mboh. Dalam tuk nan, dom urang daok diuk ye daok dang anak bruk sraw kadau dom bilan la-ar jaik tal oh ka hu labik daok suai lavik di langik la-ar ia khar.

Bruk cuh phao tuk biar harei 21/12 di Khoa Nghệ thuật di Đại học Charles daok dalam pasak Praha, cộng hòa Séc ngak brei takik abih lac 15 urang matai saong 25 urang njauk rambus. Bruk nan ngak tatuan megei oh lac di taneh ia Séc bo daok lac di abih dunya, kayua ini hu maong lac bruk pandik harao abih dalam sajarah di taneh ia Séc. Harei ini, rajaei taneh ia pataom gauk ginum biai saong tabiak panuac lac, harei 23/12 lac harei quốc tang. Thủ tướng Petr Fiala hu panuac ieu brei duah tabiak jalan ngak siam, lagaih piah pacang cakak dom bruk yau nan di harei hadei./.