Tui Mentri Ngak nong saong Patagok palei pala, dalam dom bruk dalam Nyaom biai pablei salih padai brah di dunya pak Cebu Philippines, brah  Ong Cua ST25 di Viet Nam mek hu giải nhất di Mbang pakacah brah bingi abih di dunya mbang ka 15 kayua The Rice Trader peih ngak. Ini lac mbang ka 2, angan brah Ong Cua ST25  mek hu giải brah  bingi  abih di duya. Brah ST25 pakacah brah bingi abih di dunya thun ini hu pala di taneh praong 2,6 hecta di palei Tiên Cường, xã Thạnh Thới An, huyện Trần Đề, tỉnh Sóc Trăng di bilan Hè thu thun 2023. 

Harei kabroi, di tỉnh Sóc Trăng hu peih tabiak Mbang nyaom biai ilamo ngan haong asal kadha “Patagok kinh tế, tani tanat bruk an sinh xã hội bhum mikva bangsa yakik di tỉnh Sóc Trăng urak ini”. Ginum biai di mbang ini, lambaok ka dom urang khik ramik, ilamo njauk gauk dom bruk hu makna dalam bruk jhul khang bruk cak rok patagok kinh tế, tani tanat bruk an sinh xã hội bhum mikva bangsa takik lac paglaong hatai sahaneng di rahra, pato magru ka urang ngak, urang ngak hu ilamo; hu sarak lagaih, bruk khang hatai, kham marat di dom pakat urang pan akaok meng Trung ương tal bhum palei, ba prein khang, biak sangka tal bruk buh jien tame tal bhum mikva bangsa takik meng meda pasamar bruk patagok.

Tui Harak pathau khan di Gah ChildFund Việt Nam, hu tak 76% uranaih khin duah saong ngak krein randap ayut birau  angaok mạng xa hoi. Dalam tuk nan, tui Pasak Duah birau ka prein yawa saong dan so, hu labaih 36% uranaih hu tame iek dom asar kadha, thaot binguk pambuak tal bruk taong paoh di angaok internet. Labaih 13% uranaih hu iek oh njuak hatai rilo harak tai lieu khieu dam di mạng. Bruk pambak praong samar khang di internet saong dom pandap thông minh hu peih tabiak rilo lagaih ka adei uranaih  bac megru, ma-in sambai saong duah thau di dunya. Yau nan min, langiu di nan, uranaih brei dang anak bruk taduan dom khaw tin jhak angaok mạng.

Tal urak ini, jabat chức năng di tỉnh Đồng Nai hu ngak salah bruk pasang iek peih mbaok taneh di 7/12 xã, phường di ban Biên Hòa saong huyện Long Thành. Phaok Akaok UBND tỉnh Đồng Nai Võ Văn Phi kakei lac, hadei di tuk danak dak hu brei tapa yaom taneh cambaih laih, dom bhum palei njauk jhul samar bruk peih ngak duah thau asal di taneh. UBND ban Biên Hòa njauk jhul samar bruk ngak salah dom adat piah padang ngak 2 labik tái định cư di phường Phước Tân saong phường Tam Phước.

Tong cục Khí tượng Thủy văn kuhria mboh dahlau, hajan di ia kraong Mê Kông dalam dom bilan thu thun ini biar jang kuhria rah tabiak rilo thun. Piah pacang caga  pandiak bhang thu lagu, ia mbak khik brei bruk ngak nong, bhap bini, Mentri Ngak nong saong Patagok palei pala ngan haong dom danak dak daok buh jien tame ngak, dak padang bruk pacang, caga ia mbak, jhul pasamar bruk peih ngak, piah ba tame ngak dalam bilan bilan thu. Abih di nyu brei khik ia pandar dalam baoh sang, tui nan paglong jalan sahaneng brei pandar ia patak pataom, kein lagaih; daong bhap bini brei salih janih pala, athur raong lagaih haong bruk langik pandik, kurang ia…

Dom taneh ia hu mbaok tame Mbang nyaom biai pakat glaong ka langik tasik di Liên Hợp Quốc COP28 daok hu peih tabiak di Dubai hu brei tapa sa sanya peih veik kadung jien biyar jien ka dom taneh ia mbuan gaok kan kandah kayua bruk biến đổi khí hậu. Lambaok di dom taneh ia hu padang sanya ini, jalan padang ngak sa kadung daong ba ka dom taneh ia mbuan gaok kan kandah ngan haong bruk pacang caga haong dom bala di langik tasik yau ye pandiak bhang, hajan ia sua saong ia tasik tagok.

Tui pathau khan di Nhà Trắng,  Tổng thống Mỹ Jone Biden meda oh nhu mbaok tame Nyaom biai pakat glong ka langik tasik  COP28 di Liên hợp quốc di Dubai, Các Tiểu vương quốc Ả rập Thống nhất, salih tame nan lac Phó Tổng thống Kamala Harris. Nhà Trắng brei mboh bruk hu mbaok di Phó Tổng thống di COP28 brei mboh bruk pan akaok di Karja Biden ka bruk ngak njauk sa jalan, pambak paraong di dunya piah langyah  bruk sraw kadau  khi hau, jhul pasamar dom bruk ka khi hau  di Mỹ saong daong bruk ngak hu siam karo di COP28.

“Ban ahar laya” bak sambo mau saong biak pahe bingi hu yaih khan di Sang miuyim Kiến trúc di ban London, Anh camriep meng harei 30/11 saong raok tuai mai rivang iek di harei paguh (2/12). Hu ngak tui harei Noel biak siam gheih, abih tih dom pandap panda ngak dalam ban jeng hu ngak meng dom pandap meda mbang hu yau ye kẹo dẻo, tangei daih, sôcôla piah ngak gheih saong rilo meng lac jeng pandar ahar laya piah ngak gilac veik dom thaot bingu di dom danak dak. Abih tih hu 5 ban ahar laya, yaok ban hu langik biak karei di gauk, brei mboh ka sa đô thị ngak sit./.