Pho Thu tuong Rajaei Trần Lưu Quang birau mbaoh tangin tame Harak brei angan xã An toàn khu, bhum An toàn khu di tỉnh Hậu Giang ngan haong 7 labik hành chính pakat xã di dua huyện lac xã An toàn khu di Trung ương dalam vaktu mesruh metak pacang Prang saong Mỹ, nan lac: Ban sit Vĩnh Viễn, xã Vĩnh Viễn A, xã Lương Tâm, xã Lương Nghĩa, xã Xà Phiên (huyện Long Mỹ); ban sit Rạch Gòi, xã Thạnh Xuân (huyện Châu Thành A). Dom xã An toàn khu hu peih ngak sarak daong ka xã An toàn khu tui dom bruk ba tabiak yau urak ini.

Thường trực Tỉnh ủy Bình Thuận brei thau, Sở LĐTB&XH di tỉnh meda khik ramik 1.000 pok pandap, yaom 1 triệu sa pok meng jien di Kadung jien brei ka urang kan kathaot pakat tỉnh piah brei ka dom sang kan kathaot tuk Tết Nguyên đán 2024. Langiu di pandap Tết, dom puk palei daok hu jak ba dom kapul nyaom, menuac urang piah daong ka dom sang kan kathaot, sang jaik si kan kathaot, dom sang gaok biak rilo kan kandah, urang hu mbang tui bruk daong di karja dalam tỉnh di tuk tết Nguyên đán sak ine girai thun 2024.

Piah ka yaok baoh sang, yaok urang hu uan raok  xuan, tuk  Tet Nguyen dan ini, tỉnh Sóc Trăng brei paglong bruk rivang, alin pandap ka urang hu buh prein yawa ngak bruk cách mạng saong gauk gar, urang daok ndih iek ruak di dom sang iek ruak, urang ngak, vien chuc kathaot, kan kandah, uranaih hu sang biak kan kandah, urang taha umo…Tỉnh ủy Sóc Trăng hu iew dom jabat, karja palei pasang iek padang angan, khan brei thau tukvak, labik, caga blaoh blai pandap panda, manuac urang ngak bruk piah bruk parabha brah meng gilang negar  tal baoh sang urang kan, urang jaik kathaot, urang mbang tui sarak daong xa hoi…hu tani tanat, bak hatai anit ranam.  

Rilo po bein di palei bingu Sa Đéc, tỉnh Đồng Tháp, lac palei bingu praong abih di mien Tây daok jar var iek glang piah ba tabiak darak pasar dom yot bingu mekre abih pablei tuk Tết mai. Tui kuhria, dom bingu di urang nong Sa Đéc pala saong pabak ka darak pasar tuk Tết Nguyên đán sak ine girai lac jaik 1 trieu 200 rabau yot. Urak ini, rilo urang blei salih meng dom tỉnh, ban hu mai caik jien takai saong cang harei mek bingu piah ba nao pablei. Bingu kiểng di Sa Đéc hu jaik 2.000 janih saong hu mbaok di taong abih dom tinh ban dalam taneh ia saong daok yam takai tabiak darak pasar dunya.

LĐLĐ tỉnh Kiên Giang birau jao “ Baoh sang Công đoàn” ka dua urang dalam kapol hu raidiuk kan kandah ka sang daok, kuhria tui jien labaih 300 trieu dong di Cong doan co so dalam LĐLĐ tỉnh. Peih ngak danak dak “ Baoh sang Công đoàn” thun 2023, jabat, đơn vị, doanh nghiep, urang công đoàn…hu daong padang ngak birau saong ngak pasiam veik 57 “Baoh sang Công đoàn” ka urang đoàn kan kandah ka sang daok. Thun 2024, LĐLĐ tỉnh Kiên Giang kham merat jak ba urang rik jien tame padang ngak 57 “Baoh sang Công đoàn” piah daong ka dom urang công đoàn raidiuk kan kandah ka sang daokhu baoh sang tani tanat, sahanang hatai ngak mbang.

Mintri jalan mbak pajeng ba Trung Quốc brei thau, tui kuhria meda hu 9 tỷ mbang nao di rahra dalam tut Tết Nguyên Đán jaik tal. Dom mbang nao meng jalan pasei, jalan nduac samar, jalan kraong saong jalan kapal haoh meda hu labaih 1 ty 800 rabau mbang dalam tukvak ini. Piah khik ka bruk pajeng ba tuai damuai saong pandap panda hu siam mekre, Mintri jalan mbak pajeng ba Trung Quốc brei patagok pasang iek tuai damuai, patagok menuac ngak ka dom gah pajeng ba jalan pasei, jalan nduac samar, jalan kraong, jalan kapal haoh, pajeng ba samar saong pajeng ba tuai dalam ban.

Gah y te di rilo tỉnh Thái Lan kham merat caga dom jalan pacang caga dahlau anak bruk mbuan tamuh jit ruak kayua virus Zika. Jabat Pacang caga saong Pasang iek jit ruak tỉnh Korat brei thau, hu takik abih lac 758 urang njom ruak Zika hu mboh di 36 tỉnh dalam tukvak tapa. Taneh ia ini jeng hu mboh dom mbang virus njom  mbak meng amaik tapa anek mbuan ba tal ruak jaoh jo anek dalam tuk metian.

 Ceik pui Dukono angaok pulao Halmahera, gah timur Indonesia, pruh tabiak bau glaong 1,7 km di gah angaok pabah ceik. Urak ini thur mur sambo mbong kanyik biak kapan daok par nao gah Tây Nam. Dalam thun 2023, ceik pui Dukono pruh 3.324 mbang, ngak brei menuac sia njauk cuk khan pacang mbaok saong cuk kreih camin meta tuk ngak bruk gah langiu kayua thur mur di ceik pui laik trun. Ceik Dukono lac sa dalam 129 baoh ceik pui daok ngak bruk di Indonesia, taneh ia pulao kaoh praong haong labaih 17.500 baoh kaoh pulao./.