Page ini, Mbang nyaom oh caga dahlau mbang ka 6, QH mbang XV hu pasang iek bruk brei padeih ngak Akok negar CHXHXN Viet Nam vaktu 2021-2026 saong brei padeih ngak bruk di urang QH mbang XV ngan haong ong Võ Văn Thưởng di Kapol urang QH ban Đà Nẵng. Hadei di tuk pang bac dom Harak pathau khan, Tờ trình, panuac puac di ong Võ Văn Thưởng, Quốc hội brei ginum biai, buh phieu saong brei tapa Sarak ka bruk brei padeih ngak Akok negar saong padeih ngak urang di Quoc hoi mbang XV ngan haong ong Võ Văn Thưởng. Hadei di tuk tamat Mbang nyaom oh kuhria dahlau di QH, tui Hukum negar saong tui bruk ba tabiak di hukum hu pambuak tal, UB Thường vụ QH brei tabiak harak brei thau ka bruk ngak Akok negar. Tui nan, muk Võ Thị Ánh Xuân, Pho Akok negar brei ngak quyền akok negar CHXHXN Viet Nam meng harei 21/3/2024 tal tuk palih ruak akok negar birau.

Ngan haong asal kadha “patagok bruk ba akaok nao dahlau di dam dara dalam bruk salih so negar”, mbang ndem mayai tapak haong Thủ tướng Phạm Minh Chính gam haong dam dara tui kuhria meda hu peih tabiak di harei 25/3 anak tal ndem ka dom jalan ngak, sarak urak ini di Kanja ngan haong bruk salih so negar. Mbang ini jeng ndem tal dom sarak, jalan ngak, dom prein khang di kanja dalam bruk daong ba, patagok bruk ngak di dam dara dalam bruk peih ngak salih so negar. Tui kuhria di danak dak, Thủ tướng Rajaei meda hu taom gaok, pok mayaom 10 dam dara Việt Nam angan je saong 10 urang ranaih Việt Nam hu caong di thun 2023.

Danak daong ha tang ky thuat ka padai carbon biar di bhum taneran kraong Cuu Long kuhria peih ngak di 12 bhum palei di gah Pei negar ( langiu tỉnh Bến Tre) kayua Mentri Ngak nong saong Patagok palei pala dang peih ngak kuhria abih tih jien buh tame ngak 375 trieu USD daok hu dom bhum palei ngak tui. Danak dak hu 3 binah, dalam nan ka sa lac daong ngak ha tang ka bhap bini duh ka bruk ngak tabiak brah carbon biar meng tuk pala drak tal tuk ngak tabiak brah saong pablei. Kadua lac piah paglong prein ilamo di dom jabat roh duah…Ka klau pabak bruk daong parabha, khik iek, pasang eik saong taong yaom danak dak piah hu siam abih.

UBND tỉnh Lâm Đồng daok peih ngak rilo sarak daong ka urang ngak nong pala drak dalam sang kreih, yam tal palahik bruk ngak nong sang kreih đô thị. Gam haong bruk salih ilamo kong nghe, kỹ thuật ngak nong bahrau lagaih haong bruk BDKH ka urang nong, ban Đà Lạt daok peih ngak 30 bruk ngak iek ka bruk pala bingu, njam patam baoh kraoh di langiu langik. Tỉnh Lâm Đồng hu likau Gilang paraik kanja Việt Nam roh duah, pandar dom paok sarak brei masaiy jien laba lap ngan haong abih tih phun jien labaih 4.800 tỷ đồng ka urang ngak nong masaiy jien piah cak rok patagok bruk ngak nong di langiu langik.

Hu brei angan ieu lac phun “jien tik” brei kein laba glong, daong ka rilo urang ngak nong ngak kaya meda min phun durian di tỉnh Tiền Giang urak ini dang anak bruk bala meng langik , jit ruak ngak brei takik baoh, takik siam. Tukvak jaik ini, angin khang ngak ka oh takik bein durian di tỉnh Tiền Giang jaoh dhar, druh baoh meda, ngak khat lahik ka po bein. Langiu di nan, di dom labik pala sa janih durian di huyen Cai Lậy, Cái Bè daok hu ruak kanyik hala. Karja saong dom gah chuyen mon daok tacei pato ilamu ka urang pala pacang caga ruak, khik caga phun durian.

Ủy ban Tổng tuyển cử Indonesia bahrau tabiak panuac brei thau lac akaok Mintri Quốc phòng Prabowo Subianto lac urang jayah dalam mbang pilih ruah Tổng thống thun 2024 hadei di tuk ngak salah bruk kiểm phiếu di dalam taneh ia. Tapa mbang kiểm phiếu puac abih mboh ong Prabowo mek hu 96 triệu 200 rabau phieu, meblah 58,6% abih tih dom phieu bầu. Dalam mbang pathau khan hadei di tuk kiểm phiếu blaoh samar dahlau di nan, ong Prabowo Subianto sanya lac padang sa rajaeu dalam nan hu “dom urang Indonesia naih joi abih”, khik ka yaok rahra, yaom lac bangsa halei, agama halei atau daok pak halei, ngak bruk kayua kein laba siam abih di urang Indonesia. 

Tổng thống Mỹ Joe Biden harei kabroi khan lac brei ka Kapul ngak chip Intel jaik 20 tỷ đôla tui jalan daong saong brei mesre piah patagok bruk ngak tabiak chip bán dẫn dalam taneh ia. Ini lac jien buh tabiak ralo abih di Karja Mỹ daong ka gah ngak chip. Sa binah jien daong nan hu pandar piah padang ngak dua sang mac birau saong peih praong sang mac urak ini. Tổng thống Joe Biden khan lac paok jien buh tame ngak nan meda daong patagok thị phầno chip birau di Mỹ tagok 20% di puac pluh thun ini, mneg tanut 0% di urak ini.

Di maong 9, 8 minit dah page ini, tui maong pak nan, Nhật Bản rahtabiak sa bala magei baoh taneh khang 5,3 ngak magei Ban ine Tokyo saong bhum jaik taphia. Tui Jabat kuhria mboh dahlau bruk langik tasik Nhật Bản, mbang magei baoh taneh hu tâm chấn daok di gah maraong tỉnh Ibaraki, dalam 50 km. Oh hu panuac kakei dahlau hu ba tabiak. Công ty Điện nguyên tử Nhật Bản jeng brei thau lac, oh bruk hagait karei halei rahtabiak di Sang mac điện hạt nhân Tokai Daini di tỉnh Ibaraki kayua mbang magei baoh taneh./.