Uan salam Tết Nguyên đán thun sak ine girai 2024, Mặt trận negar  Việt Nam meda nao rivang, alin pandap ka urang kan kathaot, urang gaok kan kandah. Bruk ngak ini brei mboh bruk caik hatai, sangka di Ndang, Kanja, MT negar Việt Nam saong dom kapul nyaom chính trị - xã hội ngan haong raidiuk di rahra, abih di nyu nan lac urang kan kathaot, urang gaok kan kandah. Phun jien meng kadung jien “kayua urang kan kathaot” Trung ương rivang saong alin pandap ka urang kan karthaot, urang gaok kan kandah di tuk uan raok Tết Nguyên đán thun sak ine girai thun 2024 lac labaih 17,7 tỷ đồng.

Tui kuhria mboh dahlau, tuk Tết Nguyên đán jaik tal, dom janih tội phạm meda tagok rilo jang. Taphia nan, meda hu bruk kol ranaih pataom gauk pakacah radaih suan hukum, kol pablei salih pandap ja, pandap oh siam jeng tagok rilo... Nan ye Công an tỉnh Bình Dương peih bruk tabiak mbaok tabung glaong cap mek kol nan piah khik siam mekre, sron mbon tukvak dahlau, dalam saong hadei di Tết Nguyên đán. Abih di nyu nan lac, CA brei khik iek catang kol mbuan ngak duas lac kol njien jru phien daok dalam puk palei, kol ngáo đá; saong duah mek dom kol pablei salih, khik piah, ba pandar ma túy jru phien suan adat hukum. 

Tỉnh Đồng Nai bahrau jao veik 900ha taneh pabak ka danak dak mblang kapar haok Long Thành. Ini lac mbang ka 4 Đồng Nai jao taneh ka Cảng vụ Hàng không gah meraong piah peih bruk khik ramik di Kanja di mblang kapar haok Long Thành. Bruk pandar taneh lac taneh ngak jalan nao mai saong jalan jao taneh lac kanja jao taneh oh mek jien pandar taneh ngan haong tukvak pandar lac suai lavik. Dahlau di nan, Đồng Nai hu jao taneh mbang ka 1, 2, 3 ngan haong mblang taneh praong jaik 1.500ha.

UBND TPHCM brei thau 32 labik glut jaleih takai kraong, ribaong dalam ban, ngak kan kandah tal 1.178 baoh sang. Ban Thủ Đức saong huyện Nhà Bè lac 2 labik hu rilo labik glut jaleih di abih, patui di nan lac huyện Cần Giờ saong quận Bình Thạnh, daok veik lac dom labik glut jaleih daok di dom quận 12, huyện Hóc Môn, Củ Chi, Bình Chánh. UBND TPHCM hu panuac ieu dom quan huyen padang ngak saong ba tabiak jalan pacang caga, langyah samar drah labik glut jaleih, khik siam mekre salamat drap ar saong menuac urang 

Gilang paraik sarak kanja dhar tỉnh Trà Vinh brei thau, meng phun jien masaiy di gilang paraik sarak kanja, hu daong ka jaik 26.000 baoh sang kan kathaot, sang jaik kathaot saong dom urang sarak kanja karei hu masaiy. Dalam 9 bilan dalam thun 2023, gilang paraik ini hu samar drah brei ka 650 sang kan kathaot, 2.092 sang jaik kathaot, 1.977 sang bahrau tabiak truh kan kathaot; labaih 200 sang hu masaiy jien cak rok patagok bruk ngak mbang, pablei salih, ba bruk ngak ka jaik 6.000 urang ngak. Trà Vinh paglaong bruk ba phun jien pabak ka bruk padang ngak palei pala bahrau paglaong; abih di nyu nan lac peih bruk brei masaiy tui Sarak ka 28 ka bruk brei masaiy jien laba bier tui Danak dak bruk ngak negar cak rok patagok kinh tế - xã hội bhum  bangsa takik saong bhum ceik tukvak 2021 - 2030.

Yaok pataom bahrau abih brei mboh lac, menuac umo mangaok 60 thun di Trung Quốc hu labaih 280 triệu menuac di puac thun 2022, samu 20% dom menuac sia dalam taneh ia. Tui kuhria mboh, dom menuac praong thun di taneh ia tagok tal tabung glaong di thun 2054. Meng labaih 14% menuac sia umo mangaok 65 thun, Trung Quốc daok yam tame tukvak menuac sia taha mbiah. Kuhria meng tuk jeng taneh ia hu menuac daok taha nao di puac abap 20, dom menuac taha di Trung Quốc gam gam tagok rilo. Trung Quốc urak ini lac sa dalam dom taneh ia hu bruk menuac sia taha nao samar abih di dunya. Makna lac mai meng bruk ndih tapui biar.

Đại học Monash, Australia bahrau ba tabiak roh duah brei mboh lac, dom urang ndih oh hu tuk ndih cambaih laih mbuan laik tame bruk takik kanal hadar jang dom urang ndih hu tuk tani tanat. Dom urang roh duah ilamo hu mek dữ liệu di labaih 88.000 urang dalam umo  62 thun di negar Anh, hadei di tuk tui iek labaih 7 thun, hu 480 urang njauk ruak oh daok kanar hadar. Roh duah jeng ndem lac, dom urang ndih hu tukvak sarau kadau bhian takik kanar hadar glaong abih.

Klau hãng pablei lẻ praong di Mỹ lac Amazon, Walmart saong Target daok brei padeih pablei dom pandap asar katak raak tabiak pandap me-in kayua huac lac oh salamat ka uranaih. Asar katak raak lac dom baoh blong sit bak sambo màu hu ngak meng polyme njaom samar, bhian hu pablei yau pandap me-in, dalam nan hu gam pandap thủ công pandar dalam bruk patagok cảm giác ka uranaih jaoh jo. Tui kuhria, hu 7.800 mbang bala pambuak tal asar katak raak hu mboh di phòng cấp cứu di Mỹ meng thun 2016 tal thun 2022./.