Piah ba "Tết mai tal yaok đoàn viên công đoàn, urang ngak”, công đoàn dom labik che xuat saong labik ngak kong TP. Hồ Chí Minh hu peih rilo bruk ngak Harei pataom anit ranam - Tết jumpataom gauk ka urang ngak kong di dua labik che xuat Tân Thuận saong Linh Trung. Dalam harei pataom ini hu labaih 10.000 urang ngak kong hu alin harak phieu blei pandap piah blei pandap Tết di jaik 30 labik pablei pandap pandar yaok harei ngan haong yaom trun meng 5% - 30% dut saong yaom di darak pasa. Meng rilo bruk ngak hu peih tabiak, tui kuhria tuk Tết sak inegirai thun 2024, công đoàn dom labik che xuat saong labik ngak kong TP. Hồ Chí Minh meda sangka daong ka labaih 43.000 đoàn viên, urang ngak kong ngan haong paok jien labaih 25 tỷ đồng.

LĐLĐ tỉnh Trà Vinh bahrau peih ngak danak dak "Tết jum pataom – Xuân daong gauk” pambuak haong Darak pasar Tết Công đoàn, Labik pablei pandap 0 đồng ka đoàn viên, urang ngak gaok kan kandah dalam raidiuk. Di danak dak, LĐLĐ tỉnh Trà Vinh daong ka đoàn viên, urang ngak 2.000 phiếu blei pandap, yaok phiếu yaom 300.000đ; peih bruk bốc thăm, hu thưởng, tacei pato adat hukum, cakak mbuk likei brei saoh... Abih di nyu lac tapa ini, UBND tỉnh hu jao 600 paok pandap, yaok paok yaom 500.000 đồng; brei 3 baoh sang “Mái ấm Công đoàn” ka urang ngak gaok kan kandah haong yaom jien ngak abih 150 triệu đồng.

Bilan bingu Tết sak inegirai thun 2024, urang ngak nong pala bingu di tỉnh Tiền Giang pala jaik 1.152.000 yot bingu dom janih, tagok jaik 1,19% dut saong Tết Nguyên đán 2023. Urang pala bingu brei thau lac, bilan bingu Tết thun ini, langik lagaih, bingu tamuh siam, raak bingu njauk tuk Tết, sambo mbau hadah mekre, min phun jien buh tame ngak ye daok glaong kayua yaom pandap panda ngak nong, jien pah urang ngak tagok jang tukvak ini thun blaoh. Meng ini tal harei paik bingu, mikva kham marat sangka bingu piah patakik njauk halak halieng palai kaik, oh caik tamuh tabiak phun jien halei.

UBND tỉnh Cà Mau bahrau hu harak payua Bộ LĐTB&XH ka bruk likau oh taduan brah daong pacang eik lapa di tuk Tết thun sak inegirai 2024. Makna hu UBND tỉnh Cà Mau ba tabiak lac  "tal urak ini, tapa pasang iek, UBND tỉnh Cà Mau pathau khan haong Mintri LĐ-TB-XH likau oh taduan brah daong dalam tuk Tết Nguyên đán 2024, kayua tỉnh khik kajap hu bruk daong ka dom sang bhap bini, nan ye likau Mintri LĐ-TB-XH taduan panuac caong". Dahlau di nan, tỉnh Cà Mau hu panuac likau daong 1.037,57 tấn brah brei ka 18.085 sang bhap bini, haong yaom daong lac 15 kg sa urang sa bilan, tukvak daong lac 1 bilan.

UBND ban Vũng Tàu, tỉnh Bà Rịa – Vũng Tàu bahrau hu pok brei angan "Ban du lich hacih ASEAN". Ini lac mbang ka 3 gam gam Vũng Tàu hu Gah peih bruk du lich dom ban Châu Á - Thái Bình Dương pok brei angan. Tui urang pan akaok ban Vũng Tàu, ini lac bruk kham marat di kanja saong rahra ban Vũng Tàu dalam dom thun tapa piah khik tani tanat bruk haci hacih dom labik manei, khik saron mbon, salamat ka tuai damuai. Gam haong nan, Ban Vũng Tàu jeng hu rilo pandap du lich angan je ka du lich padeih padei, du lich tasik, du lịch sinh thái... kayua yau nan ye bo yaok thun ban Vũng Tàu hu raok jaik 6 trieu 500 ribau tuai mai rivang main saong padeih padei.

Thái Lan haong Trung Quốc hu mbaoh tangin tame harak sanya oh thị thực di dua taneh ia. Dom urang ngak praong di Thái Lan caong lac bruk sanya ini hu daong pachreih rilo urang Trung Quốc mai tal Thái Lan piah patagok bruk ravang me-in, lac sa dalam dom gah ngak mbang praong daok duah jalan tagok veik hadei di tukvak gaok kan kandah trak di jit praong COVID-19. Trung Quốc lac taneh ia hu rilo tuai di abih mai ravang me-in Thái Lan dahlau di jit praong COVID-19 tamuh tabiak. Min tuai Trung Quốc mai veik takik yaom lac dom jalan pacang caga jit COVID-19 jeng hu 2 gah brei klaak.

Mintri Y tế Campuchia daok hu mboh bruk njauk ruak cúm manuk ada H5N1 di manuac. Urang ruak lac urang likei umo 69 thun daok di tỉnh Siem Reap. Sang urang ruak ini hu raong labaih 50-60 drei manuk saong dom drei manuk ini metai biak rilo meng 2 adit dahlau. Dahlau di nan, Mintri Y tế Campuchia hu brei thau bruk ruak cúm manuk ada H5N1 di manuac di harei 26/01. Ini lac urang camriep ruak cum manuk ada pak negar ini. Urang ruak lac sa ranaih umo 3 thun daok di tỉnh Prey Veng, gah Đông Nam Campuchia.

Dom urang roh duah di sang bac Đại học Imperial, ban ine London di negar Anh, hu sa takai yam khang bahrau dalam bruk dut iek ka dom urang ruak njauk ruak u não saong talang raong. Urak ini, meng dut iek darah biak mbuan lagaih, dom bác sĩ meda thau lac ruak atau oh cambaih laih tal 100%. Tui panuac khan di dom chuyên gia, yaom lac bruk roh duah hu ngak sit, min meng dom hagait mek hu biak siam tapa roh duah, rilo urang ruak meda caong lac bruk dut iek darah hu ba tabiak pandar praong dalam di dom sang iek ruak di anak tal.