Meng kham merat ngak harei ngak melam, ngak oh padeih Tết piah khik siam mekre salamat ka bruk nao mai di mangaok jalan, gah Cảnh sát Giao thông dalam negar hu padang rilo labik brei pandap piah daong prein ka rahra nao palei mbang Tết. Di bilai Cảnh sát Giao thông Hàm Tân, Công an tỉnh Bình Thuận, Gah Cảnh sát Giao thông hu caga 350 pok pandap lac: bánh chưng, ahar, kẹo, ia manyum, khan la-an saong baoh kayau brei ka rahra angaok jalan nao palei mbang Tết, labik tapa jalan roya 1A. Abih di nyu nan lac, meyah hu anek naih nao tui, gah Cảnh sát Giao thông hu alin brei 1 bao lì xì saong gấu bông.  

Dalam dom harei ini, yaok ribau rahra di dom tỉnh Sóc Trăng, Bạc Liêu, Cà Mau nao palei mbang Tết. Piah daong ka mikva trun manieng kan kandah, glaih glar, Công an ban sit Ngã Năm, tỉnh Sóc Trăng hu daong ka mikva, brei ia kalaok manyum, siuk laar, xang, pasiam veik radaih khut. Trung tá Lưu Lê Hoài Niệm, Phó Akaok Kapul Cảnh sát jalan mbak Công an ban sit Ngã Năm brei thau, dom harei ini, di gah miền Tây daok tame tukvak tabung glaong pandiak bhang. Mikva nao meng dom tinh, ban atah mai palei mbang tet lac biak glaih glar nan ye kapul hu caga raok mikva di jalan Quản Lộ - Phụng Hiệp piah alin ia kalaok, siuk, daong tuh xang, pasiam veik dom sruh radaih njauk bala..

Piah duh ka bruk nao ma-in Tết, ba bui sambai di tuk yam tame thun bharau, tỉnh Tiền Giang saong dom puk palei jeng kuhria cuh phao bingu melam cang giao thừa saong dom bruk salam uan thun bharau. Taphia nan, UBND tỉnh hu buh tabiak 6 tỷ đồng daong ngak jalan bingu Xuân Giáp Thìn; 3 tỷ đồng ka dom bruk ilamu daoh tamia di labik mblang bein Hùng Vương; daong ka 11 huyện, ban yaok labik 200 triệu saong 172 xã, phường dalam tỉnh yaok labik 50 triệu piah ngak dom bruk me-in sambai uan Tết.

Dom labik pablei bingu Tết di tỉnh Kiên Giang hu peih tabiak meng harei ia bilan bak baoh bilan mat. Tui panuac khan brei thau di rilo urang pablei bingu cảnh pak ban Rạch Giá, prein blei bingu Tết dom harei tapa truh khang dut saong tuk Tết thun dahlau saong tui kuhria lac meda khat lahik mayah meng ini tal tuk tết prein blei jeng daok suai jang deih yau dom harei tapa. Dahlau di nan, piah ba kein lagaih ka urang pablei bingu phun cảnh, UBND ban Rạch Giá hu rami ramik ka labaih 300 urang pablei salih  tut angan pah labik pablei. Gam haong nan, patagok bruk khik kajap siam makre an ninh trật tự, salamat jalan mbak saong hacih sa-at pak labik ini.

Mesup ini di mblang bein Lưu Hữu Phước, quận Ninh Kiều, Thành Đoàn Cần Thơ saong dom gah pambuak tal hu peih ngak danak dak Harei roya umo ranaih thun 2024 ngan saong kadha “Xuân bui sambai – Tết anit ranam”. Tapa nan, mBan peih bruk hu alin hadiah 300 paok pandap, yaok paok yaom 1 triệu, (hu 500.000 jien mbaok saong 500.000 ahar kẹo Tết) brei ka 300 adei uraniah kham merat yam tapa kan kandah, bac ta-a siam. Tui jalan ngak lac ieu pataom abih gah ba prein tame daong dom adei sit, caong khin di mbang peih bruk lac hu sa Tết bui sambai, anit ranam saong dom hagait siam mekre di abih brei ka dom adei uraniah di tuk thun bahrau mai tal. 

Mintri Y tế Campuchia hu tabiak panuac brei thau lac pakao điện tử ngak kanjak jhal biak khang tal prein yava di urang njuk. Kayua yau nan ye, Mintri Y tế Campuchia ieu kakei yaok urang, abih di nyu nan lac ranaih, oh njuk dom janih pakao điện tử. Campuchia hu pakauk blei meng negar langiu tame, pablei salih saong pandar pakao điện tử meng thun 2014, min pandap ini jeng daok hu pablei di dom mang xa hoi. Tui Mintri Y tế Campuchia, pakao điện tử hu nicotine haong hàm lượng meda ba tal rilo kanjak jhak biak trak jang dut saong pakao hala bhian pandar, tui kuhria ba tal dom ruak trak damak ka phổi, hatai baoh, ngak tayah bruk cak rok patagok di glo akaok.

Chile hu caik tabiak 2 harei caik tang pakat negar piah hadar tal dom menuac metai kayua khuah glai di ban Valparaíso saong labik jaik taphia nan, bo tal tukvak ini, hu 64 urang matai. Dalam harak ndom puac hu papar binguk tapak, Tổng thống Chile ndom lac “ini bala praong pandik harao abih bo taneh ia drei bahrau mboh kuhria meng mbang megei baoh taneh harei 27/2/2010”. Gam haong nan jeng brei thau lac dom menuac matai meda hu rilo jang tuk daok hu rilo menuac lahik. Mbang khuah ini palai pajoa labaih 3.000 baoh sang. 

Thổ Nhĩ Kỳ bahrau jao anek gai baoh sang bahrau ka dom urang lahik sang danaok hadai di mbang magei baoh taneh thun dahlau, bak sa thun hadei di bala magei baoh taneh biak trak damak abih kuhria meng dahlau mai pak negar ini. Tổng thống Tayyip Erdogan brei thau lac, hu labaih 75.000 baoh sang meda hu jao dalam bilan 2 ini, rajaei daok kuhria jao abih tih 200.000 baoh sang dalam thun ini.