Kapol Pakacah – pok meyaom pakat negar njauk hatai hasa jalan  yau gauk jao brei  ka Akok UBTƯ Mat tran negar Việt Nam gam haong Rajaei peih bruk jak ba pakacah “ Abih gauk dalam negar daong urang kathaot” piah ngak brei palahik sang taik tahak. Gam haong nan, Nyaom biai T.Ư 8 meng blaoh, T.Ư njauk hatai dalam vaktu ngak bruk ini, meng ini tal thun 2030 peih bruk padang ngak 1 trieu  baoh sang ka bhap bini, urang ngak, ký túc xá…Tal thun 2030 meda ngak brei palahik abih sang taik tahak ka bhap bini.

Meng akaok thun tal urak ini, Mintri Khau tin saong truyền thông hu ieu kakei Facebook pacang cakak saong taoh klaak 107 kapul nyaom. Ini lac dom nyaom hu rilo asal kadha jhak oh siam ka uranaih, dui pachreih bruk pametai rup eng, thaot binguk đồi trụy, kanjak jhak di uranaih, thaot binguk uranaih ngak suan adat hukum jalan mbak; ieu co klaik, pagait, blah gilang paraik, pato tacei nduac saiy. Bruk livestream, yaih khan dom jit vu ngak suan adat hukum meda langyah tui njauk adat. Kayua yau nan ye, Mintri Khau tin saong truyền thông ieu kakei dom jabat báo chí patagok bruk ngak, pathau khan piah paglaong hatai sahaneng di rahra.

Di dom pasak đăng kiểm di TPHCM, radaih daok tagok rilo min oh ka mboh bruk bak, katin. Dalam 3 bilan anak tal ( kuhria meng ini tal bilan 1 thun 2024, Sở Jalan mbak pajeng ba kuhria mboh dahlau lac di TPHCM hu labaih 100.000-115.000 radaih tal tukvak brei đăng kiểm. Piah plaik njiak  bruk gar tavak  tuk puac thun 2022, Sở Sở Jalan mbak pajeng TP.HCM kakei bhap bini  brei ramik pasiam radaih, iek veik harak gal di radaih tui hukum  saong brei ba radaih  nao pasang iek meng 2 -3 adit dahlau di tuk abih tukvak.

Tết lac tukvak dom pandap kaya nong hu blei pandar rilo abih dalam thun. Di Long An, langiu di bruk trun pajaih rilo janih njam patam, urak ini urang nong daok kham marat trun pajaih tamekai piah pabak ka darak pasa Tết Nguyên đán 2024. Di dom huyện Tân Thạnh, Cần Giuộc, mblang taneh pala tamekai trun pajaih pala dak harei dak rilo, dom mblang taneh trun pajaih pala dahlau di nan daok hu langayh, ngak brei ndam baoh. Di dalam tỉnh Long An hu jaik 1.126ha mblang taneh pala tamekai, urak ini rahra hu trun pajaih pala labaih 600ha tamekai piah pabak ka darak pasa tết.

Yaom lac padeih bruk rilo thun min 32 urang jalar di xã Tân Thuận Bình (huyện Chợ Gạo, tỉnh Tiền Giang) mbiah tal ini oh ka taduan hu jien daong tui bruk ba tabiak ngak urang haduh hatai ngan haong dom urang hu mbang tui sarak. Ong Lưu Văn Thảo, Akok  UBND xã Tân Thuận Bình brei thau, bruk daong ka urang jakar oh chuyen trach  padeih bruk lac jien meng kadung jien karja xã daok kandong meng rilo thun ini mai. Urak ini, jien kadung karja daok di xã labaih 100 trieu đồng yau nan ye oh ginup bayar ka dom urang angaok nan.

Dalam sa jalan ngak bahrau hu pathau khan, Trung Quốc brei thau lac, negar ini meda pasang iek biak catang saong lagaih taong abih dom dang pandar saong patakik dom danak dak tathuak nerak glaong piah pasiam veik alam lagik tasik. Pathau khan brei thau, dom mac truac ndien nduac meng dang khik kajap bruk ngak, tok dom mac truac ndien rik tame bruk tani tanat salamat di rilo labik ka dom bruk ngak di dom jalan ndien meng hu pasang iek. Dom lò hơi cuh dang sit, oh hu lagaih jeng meda njauk yah klaak. Rajaei Trung Quốc jeng ieu pandar năng lượng meng dom gah salih atau ngak pasiam veik meblah labaih 20% ​​abih tih dom ndien pandar di thun 2025.

Dom  bingu la hu thaot  Naga atau daok iew lac ula po hu pet meng tangin di Lào birau hu UNESCO brei angan Inem krung ilamu phi vật thể di manuac sia dunya. Urang Lào jia lac Naga lac inem mek chraong daong , iek glang manuac sia jeng yau patauk bhut bhong, khamot…Yau nan ye, urang kumei Lào  menyim pet thaot Naga tagok khan ao di bangsa; angaok dom pandap ka uranaih plaik njiak khamot bhut bhong  atau menyim jhik tame khan ao cuk lakhah piah likau brei haniem siam saong ba mai patuah jamo, ngak mbang ginup meda.

Danak dak pandap mbang dunya di Liên Hợp Quốc (WFP) khan lac bruk eik lipa di dải Gaza daok di tanut njauk báo động. rilo rahra njauk kuac rok dalam dom labik jaleih piah duah pandap mbang. Di gah barak dải Gazaa, 97% dom baoh sang oh hu ginup pandap mbang, labaih 9 dalam 10 urang daok gaok bruk oh hu pandap mbang. Di gah maraong hu labaih 83% dom baoh sang daok  dalam kan kandah di abih piah diuk tapa harei. /.