Urak ini, dalam taneh ia hu labaih 10.800 pandap OCOP hu 3 patuk tagok mai meng 5.600 po ngak tabiak pandap OCOP. Pandap OCOP hu pandar saong patagok dom yaom pandap, ilamu saong yaom ilamu meng kan di bhum palei. Ta-eng di  ĐBSCL, mbiah tal ini hu labaih 2.000 pandap hu taduan meng 3 patuh tagok. Ong Phùng Đức Tiến, Thứ trưởng Mentri Ngak nong saong Patagok palei pala brei thau, pandap OCOP daok peih tabiak bruk palagaih ralo ka bruk cak rok  patagok kinh te palei pala, tui nan, rik tame oh lac sit dalam bruk yaih khan ilamu, dulich, khik ramik saong patagok ilamu meng kan di dom puk palei.

Kuhria tal abih bilan 11 meng blaoh, tỉnh Bình Dương hu 4.211 danak dak buh jien tame ngak meng 65 taneh ia saong bhum taneh haong phun jien tut angan abih tih labaih 40 tỷ USD. Bình Dương urak ini dang ka 2 dalam taneh ia ka dui pachreih phun jien di negar langiu buh tame ngak mbang, hadei di TP.HCM. Yaom lac hu daong palagaih di abih min doanh nghiệp taneh ia langiu di Bình Dương jeng daok rilo suh sah dalam bruk buh jien tame ngak mbang, cakrok patagok. Nan ye ong Võ Văn Minh, akaok UBND tỉnh Bình Dương hu panuac ieu dom sở, ngành pataom tame ngak pasiam bruk đầu tư, pambuan, palagaih dom harak gar, brei thau cambaih dom adat ngak harak, dui katut panak tukvak ngak harak gar piah ngak habar daong ka doanh nghiệp yam tapa kan kandah. 

Cục Sở hữu trí tuệ ( Mentri Ilamu - Công  nghệ) birau brei harak tut angan tacei ba địa lý ka baoh chôm chôm - sakmao Bến Tre. Ini lac bruk lagaih piah ka bhum palei dak padang angan pandap, pandap hu po, duh ka bruk  yaih khan  pandap, lagaih  ka bruk pala brei tabiak baoh chôm chôm. Chôm chôm lac sa dalam dom janih baoh kayau hu pala biak ralo di Bến Tre ngan haong taneh praong 3.690 ha, brei baoh 73.600 tấn. Urak ini, baoh chôm chôm Bến Tre hu pablei tabiak darak pasar Mỹ, Trung Quốc saong dom taneh ia châu Âu.

Bruk ngak hadang thu di Cà Mau bahrau hu Mintri Ilamu, Thể thao saong Du lịch ba tame angan Inem krung ilamu phi vật thể pakat negar. Ini lac bruk hu makna praong ka dom bruk khik ramik, pacang khik saong patagok yaom glaong inem krung ilamu nao tame dalam raidiuk bhap bini, duh ka bruk cakrok kinh tế, xã hội di palei. Tỉnh Cà Mau urak ini hu labaih 50 labik ngak hadang thu praong, ba tabiak darak pasar yaok pluh tấn hadang thu yaok thun. Bruk ngak hadang thu daok hu ba bruk ngak ka yaok rabau urang ngak di bhum palei pala Cà Mau.  

Hội Chữ thập đỏ tỉnh Sóc Trăng birau pambuak haong Kadung jien Thiện Tâm jao brei 242 paok jien bac ka anek saih yam tapa kan kandah bac ta-a naih joi bhum bangsa takik dalam tỉnh. Kuhria taong abih jien bac yaok adei hu taduan 6,3 trieu dong, hu daong dalam 9 bilan yaok bilan 700.000 đồng. Danak dak paok jien bac di Kadung jien Thiện Tâm hu daong ka anek saih , sinh vien kathaot tỉnh Sóc Trăng meng thun 2015 mbiah tal ini, hu rik tame pachreih dom adei yam tapa kan kandah, yam tagok dalam bac ta-a.

Thái Lan daok ba tame pandar  jalan pasei piah pajeng kaya nong di taneh ia ini pablei tapa Trung Quốc, Nga saong Liên minh châu Âu. Mbang peih nduac camereip pajeng brah saong cao su hu nduac tabiak meng Rayong, hadei di nan nao tal Noọng-khai saong pambuak haong jalan pasei di Lào - Trung Quốc. Tui kuhria, abih 5 harei piah nao tal Thành Đô, Trung Quốc, samar jang pajeng meng jalan tasik, hadei di nan, pandap panda hu pajeng veik tal Nga saong Ba Lan. Mintri ngak nong saong Hợp tác xã Thái Lan caong lac, dom jalan pasei ini meda rik daong tame bruk cakrok kinh tế di taneh ia. 

Urang jakar di Brazil brei thau, hu jaik 1.000 drei thau thing (asaw sring) tasik saong hải cẩu metai kayua kum manuk ada di bhum Meraong taneh ia ini, ngak proh tagok bruk huac ba tal njom mbak praong jit ruak. Urak ini, Mentri Ngak nong  Braxin khan brei thau bruk njauk ngak chip piah pacang cakak jit kum njom mbak praong di dom taphon manuk ada. Tui dom urang roh duah  Hải dương học, bruk njom mbak virus kum manuk ada dalam dom janih athur tasik hu tasau dreih yau tamuh tabiak akok meti di Peru saong hadei nan njom mbak tapa dom taneh ia di Nam Mỹ yau Chile, Argentina, Uruguay saong urak ini lac Brazil.

Jaik 20% menuac sia di bhum gah Pai Thái Bình Dương, lac samu 385 triệu menuac, daok ndoa naong dom jien ndo gah y tế biak glaong. Tui gah Y tế dunya (WHO) jien sahui gah y tế yam tapa prein bayar, meda ngak ka rahra, abih di nyu lac dom urang kan kandah, kan si iek ruak. Jien iek ruak glaong daok ngak ka dom sang laik tame kan kandah gah jien padai, abih di nyu lac di bhum palei pala. Kayua yau nan ye, WHO ndom lac brei hu bruk trun yaom jien jru tavao ka dom menuac njauk ruak suai lavik njauk pandar jru yaok harei./.