Hadei 22 harei meteh ngak bruk, page ini, Quoc hoi tamat mbang Nyaom ka 6, QH mbang 15. Di var hop mbao, brei thau ka bruk ginum biai, Tong thu ky Quoc hoi, Akok Jabat QH Bùi Văn Cường khan lac bruk QH oh ka brei tapa Hukum taneh riya (pasiam veik) saong Hukum dom kapol nyaom jien padai oh lac brei mboh jalan sahaneng tani tanat, ngak bruk abih hatai. Dalam tuk ginum biai urak ini daok rilo panuac karei di gauk njauk brei hu tukvak piah langyah cambaih laic, abih di nyu lac taong yaom bruk pambak tal sarak. Meyah sarak hu ba tabiak, dalam tukvak katut panak bo oh ka taong yaom cambaic laic pambuak tal sarak ye Hukum kan ba tame lagaih haong raidiuk.

Dalam thun ini tỉnh Bình Dương hu daong ka urang ngak kong gaok kan kandah ngan haong phun jien tagok tal yaok ratuh tỉ đồng. Dalam nan, taeng di tuk Tết Nguyên đán 2023 jaik 800 ribau urang ngak gaok kan kandah hu daong pandap, yaok paok meng 500 ribau tal 1 triệu đồng; jak ba phun jien pahla daong pandap hu yaom jaik 3 tỷ đồng; daong harak ve radaih apui, harak ve radaih ba urang ngak mai palei mbang Tết ngan haong paok jien jaik 11 tỷ đồng… gam tui di nan jeng daong jien bac saong alin radaih juak ka 617 kamuan bac naih joi lac urang ngak gaok kan kandah. Liên đoàn Lao động tỉnh Bình Dương jeng daok tagok jalan ngak daong ka urang ngak gaok kan kandah, lahik bruk ngak atau trun maong ngak bruk dalam tuk Tết Nguyên đán jaik tal. 

Tỉnh Bà Rịa - Vũng Tàu daok jak ba dom doanh nghiep piah peih pasiam veik saong khik ramik labik kra nduh caik menek di tapen tasik Đất Dốc, huyện Côn Đảo. Ini lac bruk akok meti ka bruk XHH bruk khik ramik, khik iek kra nduh tasik hu mbaok doanh nghiep dulich dalam negar. Hadei 5 thun peih ngak, bruk nan hu pa-uak caik menek saong palao trun tasik labaih 26.000 drei kra nduh, panduan ba jaik 7.500 baoh kra kanduh tame danao pa-uak, caik menek hu siam saong palao tame tasik labaih 6.000 drei kra kanduh.

Urang nong di huyện Chợ Lách, tỉnh Bến Tre daok jar var ngak tabiak bingu kiểng pabak ka darak pasa Tết meng kan 2024. Mbang bingu kiểng Tết thun ini, urang nong pala jaik 10 triệu pandap bingu kiểng, samu haong thun dahlau. Dalam tuk nan, bingu that pala dalam kadung meblah rilo abih ngan haong jaik 8 triệu kadung. Dom pandap bingu kiểng Tết di bhum palei ini hu ba tame pablei di grauk labik di negar drei. Min thun ini, kayua langik tasik oh siam nan ye bruk pala bingu kiểng Tết gaok kan kandah. 

Birau ini Điện lực Đông Hải, tỉnh Bạc Liêu pambuak haong UB bhap bini xã Long Điền Đông brei pagam gom LED ka dom boah sang. Hu 50 baoh sang kan kandah hu salih jalah talei điện hadei công tơ khut saong pagam 2 baoh gom Led 30W patak pataom điện. Bruk salih gom LED ilamu birau, truac hadah saong brei patak pataom điện gam hu makna dalam bruk an sinh XH gam rik tame pathau khan piah urang pandar điện patak pataom, ba mai kein laba, rik tame patrun jien pandar điện.

Danak dak cak rok patagok Liên hợp quốc (UNDP) bahrau pathau khan dữ liệu biak njauk caik hatai brei mboh lac, bruk mbuan hajan ia sua tapen tasik daok patagok biak rilo. Dalam dua piluh thun tapa, tanut ia tasik tagok ngak ka bruk mbuan hajan ia sua ngak kan kandah tal 14 triệu urang di dom bhum tapen negar saong tui kuhria meda tagok jaik 5 mbang di thun 2.100, ngak kan kandah tal jaik 73 triệu urang. Bruk njauk caik hatai nan lac, di dom bhum pak Mỹ Latinh, châu Phi saong Đông Nam Á daok gaok ngan haong dom bruk ngak kanjak jhak biak trak ka bruk mbuan njauk ia dauk rahtabiak yaok mbang.

Hu takik abih 20 urang metai saong 32 urang karei njauk rambuac di gah Meraong Ethiopia tuk radaih buyt tableih kayua blak tangin peih di harei kabroi. Urak ini cảnh sát daok pasang iek ngak brei cambaic laic bruk ba tal bala nan. Yaom lac Ethiopia hu urang pandar ô tô kuhria tui kaok manuac takik abih di dunya, min bala jalan mbak ngak metai manuac bhian rah tabiak. Bruk ba tal bala kayua jaln jhak, urang peih radaih samar oh caik hatai, rilo bruk kurang dalam brei adat peih radaih saong ngak oh njauk tui dom bruk khik brei salamat.

Tỷ phú Charlie Munger, Phaok akaok Tập đoàn Berkshire Hathaway, lac sa urang buh jien tame angan je saong hu brei thau lac “gah tangin hanuk” di Warren Buffett, lahik di umo 99 thun. Berkshire Hathaway brei thau lac dom urang dalam sang Munger pathau khan lac ong plang lahik di dah page di sa sang iek ruak di California, Mỹ tuk caga bak 100 thun di harei akaok thun bahrau, tui Forbes, Munger urak ini hu 2 ty 7 rituh trieu USD. Dom adit dahlau, jeng jeng daok ndem mayai ka dom darak pasa di dunya.