Ngan haong kadha “Dam dara Đắk Lắk nao dahlau dalam bruk ngak, kham merat yam tagok padang ngak tỉnh Đắk Lắk kaya meda, ndung bak ilamo siam mekre”, asar kadha pakacah di dam dara Đắk Lắk dalam Bilan Dam dara pataom tame dom bruk ba tabiak yau: peih ngak 120 danak dak saong 1.200 bruk ngak di dam dara padang ngak palei pala birau saong đô thị văn minh; Peih bruk ngak ka 120.000 mbang dam dara hu mbaok tame Mbang pakacah duah “Sajarah 120 thun dak padang, patagok tỉnh Đắk Lắk”. Daong dam dara peih ngak 300 bruk sahaneng hadah krah; tacei pato bruk ngak, yaih khan saong duah bruk ngak labaih 30.000 urang đoàn, dam dara.

Yaom lac ia mbak di kraong Tiền ka oh mai tal huyện Cái Bè, tỉnh Tiền Giang min kanja saong rahra pak ini hu dom jalan ngak piah pacang caga, khik labaih 23 ribau ha bein phun daok brei jien mek tame glaong. Huyện Cái Bè hu ngak salah bruk kuac rok, ngak mblang hamu, ngak pasiam veik dom binek tapen kraong, dom labik glut jaleih, padang ngak salah dom binek, ngak pasiam veik dom cống lavik harei, oh caik rahtabiak bruk tathuak ia. Meng phun jien caga dahlau, huyện Cái Bè hu padang ngak sa bilai njuk ia praong di xã Hòa Khánh pabak ka dom xa jaik taphia; padang ngak jalan langyah pacang binek dã chiến pacang ia mbak tuk caong ngak piah khik bein phun mbang baoh.

Dom labik klauk jru caga ruak hu ginup vaccine pacang ruak meruai piah pabak bruk klauk jru caga ruak di  bhap bini. Nan lac bruk njauk brei ngak samar di Sở Y tế TP.HCM ka bruk pakhang dom jalan peih ngak samar, caga ruak meruai di Ban, dalam tuk ruak meruai daok patagok di rilo tỉnh, ban. Dom bac si kakei lac, urak ini ruak meruai oh hu jru taong ruak, tuk urang ruak meruai  ye metai 100%. Piah pacang caga ruak meruai, urang gaok asaw kaik, meyao blaic njauk samar brei rao meng ia hacih labik kaik gam gam labaih 15 minit, pandar ia i-ôt atau cồn 70 độ piah rao  laka, hadei di nan nao tal dom labik y te piah kalauk jru vacine caga ruak samar piah hu siam.

Đại đức Thích Nguyên Nguyệt, Phó akaok mban, gam lac Chánh thư ký Mban Trị sự Giáo hội Phật giáo tỉnh Bình Thuận, dang akaok paha Phổ Đà hu jao 100 paok pandap ka mikva bhum bangsa takik di xã Phan Dũng, huyện Tuy Phong, tỉnh Bình Thuận. Xã Phan Dũng hu rilo urang bangsa Raglay, rilo meng ngak nong saong khik iek glai, raidiuk di mikva daok gaok rilo kan kandah. 100 paok pandap hu alin piah klah rabha dom kan kandah di mikva bhum ceik glaong Phan Dũng, abih di nyu nan lac dalam tuk bilan pandiak thu daok ngak kan kandah tal bruk ngak mbang duah jien di rilo baoh sang.

Biar harei kabroi, urang ngak praong UB bhap bini huyện Lộc Ninh, tỉnh Bình Phước khan brei thau, taduan hu khaw tin ka tatua Ba Ven di xã Lộc Khánh jaoh jaleih kayua radaih tải pajeng cuah peih tapa. Urang peih radaih  njauk rambuac hu bhap bini ba nao cấp cứu. Công an xã Lộc Khánh daok khik iek labik nan piah ngak brei cambaic laic. Gah chức năng xã mai pacang paga khik brei salamat, gam iew radaih mac kuac hluk ngak jalan piah ka urang tapa. Tui urang ngak praong UBND huyện Lộc Ninh, cầu Ba Ven hu padang ngak meng lavik, urak ini daok khut. Huyen daok peih bruk dau thau  piah buh jien tame ngak birau tatua Ba Ven, brei ka bhap bini nao tapa hu salamat, lagaih ka bruk nao mai.

Trung Quốc daok peih bruk pacang tham nhũng hu angan ieu lac “Lưới trời” piah jhul khang bruk padang sa jalan ngak pataom veik bruk pagui mek saong pacang cakak toi pham tham nhũng nduac dauk. Bruk ba tabiak danak dak “Lưới trời 2024” piah jhul khang bruk padang ngak jalan pataom di bruk cap mek saong pacang cakak dom kol tham nhũng klak nduac dauk, jang yau pataom mek veik drap ar tham ô. Tui Tân Hoa xã, danak dak “Lưới trời” hu cap mek abih tih jaik 1.624 dom urang nduac dauk di thun blaoh. Trung Quốc hu peih ngak danak dak “Lưới trời” meng bilan 4/2015, piah pasang iek cap mek dom kol nduac dauk njauk medil lac pambuak tal tham ô hối lộ saong pataom mek drap ar suan adat hukum.

Urang dang akaok jabat pacang ndoc wien di Liên minh châu Âu (EU) Margrethe Vestager hu panuac kakei dahlau Apple saong Meta Platforms ka dom jien phi birau ka jit vu di dom hãng kong nghe nan. Bruk ngak nan di jabat pacang ndoc wien EU hu ba tabiak dalam tuk, hu rilo panuac lac dom jien phi birau di dom hang kong nghe piah duah laba rilo jang. Dom jien phí birau dalam nan hu jien kong nghe ka yaok urang pandar phone yaok thun bo dom labik ngak tabiak ứng dụng praong meda bayar tuk urang oh pandar jit vu byar jien halei di Apple.

Dalam kham marat piah trun dom ranaih saong dam dara pandar pakao điện tử, New Zealand hu harak pakauk njuk pakao hala pandar sa mbang saong tagok tanut phat ngan haong dom urang pablei pakao điện tử ka urang umo mala 18 thun. Rajaei New Zealand jeng ba tabiak veik dom paka ngan haong dom quan pablei lẻ pakao hala điện tử yau ye patakik ba tabiak pablei di mbaok anak quan, pabak dom panuac ieu kakei ka dom urang ngak saong peih bruk langyah ka bruk ini. Urak ini dak harei dak hu rilo ranaih saong dam dara njuk pakao hala điện tử ngak ka dom baoh sang saong sang bac haduh hatai./.