Tamat danak dak harei 31/8/2023, Hậu Giang hu jaik 70.000 bruk ngak bahrau hu buh tame, tagok jaik 14 mbang jalan ba tabiak tut angan ngan haong Tổng Liên đoàn Lao động Việt Nam. Ngan haong bruk ini, Hậu Giang dang ka 7 dalam taneh ia saong ba akaok di Cụm pakaah 12 Liên đoàn Lao động tỉnh bhum taneran kraong Cửu Long ka dom bruk ngak bahrau hu mbaok tame.

Harei pataom Hội quán Taneh Sen hồng mbang ka 1 thun 2023, hu angan ieu lac "Hội quán Đất Sen hồng – jalan nao ba gauk cakrok" hu UBND tỉnh Đồng Tháp peih tabiak di harei 18 saong 19/11 ini. Ong Lê Thành Công – Akaok mBan Dân vận, akaok UBMT negar Việt Nam tỉnh Đồng Tháp brei thau, ini lac bruk praong, hu tỉnh Đồng Tháp caong ngak meng lavik mai. Bruk peih Hội quán hu daong cakrok patagok KTXH di palei pala. 

Kapul gilai taong mek kaya tasik di huyện Bình Đại, tỉnh Bến Tre urak ini hu 1.166 sruh, dalam nan hu 580 sruh gilai taong cap ikan di tasik atah. Thun ini, urang taong ikan pasiam veik dom kan kandah, hu jalan ngak caga dahlau dalam bruk taong mek kaya patak pataom hu phun jien, tani tanat hu siam lagaih. Abih di nyu nan lac dalam mbang taong mek kaya ikan di puac thun, dom sruh gilai rilo meng taong njauk, hu laba glaong. Bruk njauk caik hatai nan lac, tapa bruk pathau khan, pasang iek di dom gah, dom pakat, dalam tukvak jaik di ini, dom gilai ikan di bhum palei jeng ngak njauk tui dom panuac kakei di Ủy ban Châu Âu ka bruk taong mek kaya ilan suan adat hukum, oh pathau khan saong oh tui adat IUU. 

Labaih 300 sang urang bangsa takik di buôn Ma Giai, Ia Rpua xã Đất Bằng, huyện Krông Pa, tỉnh Gia Lai gaok kan kandah ka ia pandar urak ini  hu pandar ia hacih tuk danak dak ia hacih hu buh tame 4 tỷ đồng piah ngak saong bahrau ngak salah, ba tame pandar. Meng bruk sangka di karja palei, di Đảng saong Karja, tal urak ini xã Đất Bằng hu jaik 2.000 sang gam haong labaih 5.000 menuac hu pandar ia hacih. 

Tukvak ini, rilo sang bein pala bingu cúc di tỉnh Bà Rịa – Vũng Tàu hu trun pajaih pala hu labaih 1 bilan piah caga ka bruk pabak darak pasa Tết. Ini jeng lac tuk urang nong peih bruk truac gom di melam ka bingu cúc piah ka phun cak rok patagok praong tui hatai caong. Urang pala bingu Tết brei thau lac, langik tasik thun ini oh lagaih, hajan rilo ngak ka phun bingu njauk kanjik, urang pala njauk pandar rilo janih jru piah patakik halak halieng palai kaik. Vụ bingu cúc Tết Nguyên sak anek girai thun 2024, urang pala trun pajaih labaih 100ha, pataom rilo di Ban Bà Rịa, dom huyện: Châu Đức saong Đất Đỏ. Urang pala caong lac vụ bingu Tết thun ini mek hu năng suất glaong, yaom pablei tani tanat piah hu tết trei sil, haniem phul.

Urang brei panuac di Mintri Ngoại giao Trung Quốc - Uông Văn Bân brei thau, Trung Quốc saong Mỹ meda peih ginum biai ka bruk pasang iek phao ndao saong oh phổ biến vũ khí hạt nhân di pakat vụ trưởng dalam adit tal di Mỹ. Ginum biai hu peih tabiak dom harei hadei di tuk Ngoại trưởng Trung Quốc Vương Nghị gaok dom urang ngak praong pakat glaong di Mỹ, dalam nan dua gah njauk gauk brei peih rilo bruk ginum biai. 

Liên minh châu Âu daok ginum biai ka sa bruk taong phat bahrau meda ngak kan kandah tal labaih 5 tỷ Euro (5,3 tỷ USD) pablei salih haong Nga. Dom jalan ngak bahrau meda gam bruk patakik bruk pablei tabiak negar langiu ngan haong mac hàn, hóa chất saong công nghệ pandar ka bruk quân sự. EU jeng daok pamaong iek dom harak adat pakauk brei ka phần mềm saong dom jalan patakik veik bruk blei tame rilo hạng mục padang ngak, pandap panda pambuak tal bruk pajeng ba saong kim cương. Tal urak ini, Liên minh châu Âu (EU) hu pandar 11 paok patakik ngan haong Nga pambuak tal bruk mesuh metak di Ukraine.

Sa “ban công” di sa nhà hàng, quán bar labik pasak pablei salih di ban Cape Town di Nam Phi nyu jaleih trun tuk biar harei 2/11, ngak brei takik di nyu 21 urang njauk rambus. Bruk nan rah tabiak tuk ban daok uan bruk hu angan ieu lac “Harei jip camereip abih” – sa bruk ilamu rah tabiak di Johannesburg saong Cape Town di harei jip camereip yaok bilan. Tui panuac khan di dom urang daok pak nan, bruk jaleih nan rah tabiak dahlau mon 6 biar harei nan ye takik menuac njauk rambus, daok meyah nyu jaleih tuk melam  lac tuk hu rilo menuac, ye urang njauk bala meda hu rilo jang./.