Pahadar 93 thun harei padang Đảng Cộng sản Việt Nam (3/2/1930 - 3/2/2023) saong salam uan jak jeng di Nyaom roya dam dara pakat negar mbang ka XII, tukvak 2022 – 2027, dah page ini 1/2, Danak dak “Jalan hala dok taneh ia" di jalan Lê Quý Đôn, phường III, ban Vị Thanh, tỉnh Hậu Giang hu peih pakah. Tapa nan, Bí thư Tỉnh đoàn Hậu Giang Bùi Hữu Lộc brei thau, dom urang ranaih umo di Hậu Giang meda patui veik roh duah, peih ngak praong danak dak, piah peih ngak siam bruk pato pakai meng kan saong patagok dom yaom glaong di bruk ba akaok nao dahlau, halain hatain di dam dara Hậu Giang sa tangin saong gauk peih bruk jak ba “dalam rahra jumpataom gauk padang ngak puk palei bahrau saong đô thị văn minh”, ngak gheih mbaok meta di dom gah jalan praong, jalan sit, jalan palei. 

UBND tỉnh Tiền Giang bahrau ba tabiak danak dak padang ngak jalan tỉnh 864. Ini lac danak dak jalan nao mai praong rik daong cakrok KTXH di tỉnh. Danak dak hu phun jien buh tame ngak abih tih  labaih 3.200 tỷ đồng, atah labaih 111 km tapen kraong Tiền nao tapa 5 huyện dalam tỉnh. Danak dak ngak salah bloh hu daong pasiam jalan mbak nao mai di tỉnh Tiền Giang, daong pambuak bruk nao mai di 3 bhum KT praong di tỉnh haong jalan cao tốc Trung Lương- Mỹ Thuận saong jalan roya 50, jeng yau dom jalan nao mai tapen tasik dalam tukvak anak tal.

Tui UBND TP.HCM, tukvak Tết sak tapai thun 2023, ban raya hu peih ngak bruk sangka biak tani tanat raidiuk ka rahra, abih di nyu nan lac sang sarak kanja, sang hu buh prein ka cach mang, sang urang kan kathaot, urang jakar,, urang ngak, anek saih, sinh viên saong dom urang gaok kan kandah di jit ruak COVID-19; peih bruk raok Tết meng kan ngan haong kadha “Tết bui sambai – trei sil – patak pataom”. Hu labaih 612.000 urang hu daong ngan haong labaih 1.229 tỷ đồng. Yaom jien thuong Tết tui kuhria lac jaik 13 triệu đồng sa urang, glaong jang 45% dut saong Tết sak rimaong thun 2022.

Mesup ini (1/2), Bộ Chỉ huy Bộ đội Biên phòng tỉnh Kiên Giang pambuak haong UBND huyện Giang Thành peih bruk “Tết pala phun miat miat hadar dhar phor Wa Hồ”. Dalam nan, dom gah ba gauk pala labaih 3.500 phun hijao dom janih dalam mblang bein jabat ngak bruk, rah tui jalan palei, jalan khik iek bhum taphia negar. Langiu di nan, dom gah daok hu pambuak bruk khang kajap haong karja palei ngak siam bruk khik, iek glai. Tapa nan, rik daong praong tame bruk pasiam khí hậu, pasiam môi trường sinh thái, ngak ka doanh trại đơn vị hijao – hacih – mekre, rik daong cakrok KTXH, tani tanat raidiuk di bhum tapen negar.

Meng harei 19-31/1, Labik inem krung sajarah Ilamo -Danh thắng saong du lịch ceik Bà Đen, tỉnh Tây Ninh pachreih hu labaih 1 triệu mbang tuai; jien mek tame meng pablei harak ve tame pabah mbang tui kuhria lac jaik 9 tỷ đồng. Labik Inem krung sajarah Ilamo -Danh thắng saong du lịch ceik Bà Đen jeng lac sa dalam 5 labik tal dui pachreih rilo manuac abih di dalam taneh ia. ong Trần Quốc Thịnh, yam ndok Pasak khau tin xúc tiến du lịch tỉnh Tây Ninh brei thau lac hadei di 2 thun jit ruak COVID-19 tamuh tabiak ngak kan kandah biak rilo, tal urak ini gah du lịch di Tây Ninh hu salih biak khang saong dom tuai mai tal Tây Ninh daok rilo jang dahlau di tuk jit ruak tamuh tabiak. 

Dom nghiệp đoàn di Prang hu ba tabiak panuac ieu 2 harei padeih ngak bruk saong trun jalan patui di nan, tui kuhria hu peih ngak dalam adit tal piah brei mboh lac oh njauk hatai haong bruk salih bharau gah jien bilan padeih hưu di Tổng thống Emmanuel Macron. Dom mbang duah thau hatai sahneng di menuac sia dahlau di nan jeng brei mboh lac rilo cử tri Prang oh njauk hatai haong bruk kuhria salih bahrau bruk lương hưu, dalam nan hu bruk tagok umo padeih hưu meng 62 tagok jeng 64 thun, jeng yau tagok yaom jien buh tame piah hu mbang lương hưu ginup abih.

Hadei di bruk pakauk bruk pandar kadung teik nhựa pandar sa mbang, bang Victoria di Australia lac hu veik sa bruk ngak bahrau dalam bruk kham marat ngak trun manieng nerak tathuak katak tuk peih praong harak pakauk pandar pandap katak pandar sa mbang salih tapa pandar pandap karei. meng harei ini, mayah mboh hu, dom urang, kapul pablei, parabha dom pandap ini meda njauk phat jien tagok tal labaih 370 dola Uc ngan haong manuac urang saong 1849 dola Uc ngan haong kapul nyaom. Tui dom jabat chức năng, labaih 1/3 dom tathuak nerak tachrauk tabiak di bang Victoria lac pandap katak pandar sa mbang saong tui kuhria sa thun, sa rahra daok di bang Victoria meda prah tabiak 68kg nerak tachrauk kalak.

Rajaei New Zealand daok patabiak bruk samar drah kayua ia dauk ia sua dak harei dak khang saong pambak tabiak rilo bhum dalam taneh ia. Rilo labik daok dauk dalam ia sua. Urak ini rajaei New Zealand hu kaoh tabiak meng kadung jien karja labaih 640 rabau USD, piah daong dom bruk daong urang njauk bala.  Ban Auckland brei kreik pabah mbang taong abih dom labik ngak bruk, dịch vụ saong sang bac mbiah tal tuk hu panuac brei thau bahrau. Gam haong nan, rilo mbang par di dunya tal New Zealand brei padeih, brei klaak atau salih tapa dom labik par trun hu mboh lac khik hu salamat./.