Melam blaoh, di Hà Nội, Uỷ ban Bangsa dang tabiak pambuak haong Mintri Pato magru, Kapul dam dara cộng sản Hồ Chí Minh pakat negar peih ngak danak dak Pok Mayaom 143 anek saih, sinh viên, dam dara bangsa takik naih joi mbang ka 10 thun 2023. Brei panuac di tuk pok mayaom, Phó Thủ tướng Trần Lưu Quang khan lac, Ndang saong Kanja drei biak caik hatai cak rok patagok kinh tế - xã hội bhum bangsa takik saong bhum ceik; hu ba tabiak rilo jalan ngak, sarak hu makna praong piah jhul khang bruk cak rok patagok di bhum ini, dalam nan hu gah patao magru. Bruk bac taa, bruk ngak di anek saih, sinh viên, dam dara bangsa takik hu pok mayaom hu rik daong tame bruk dak padang palei negar. Phó Thủ tướng caong maong dom adei patui veik patagok dom yaom glaong piah rik tame bruk samar drah ba bhum mikva bangsa takik saong bhum ceik tabiak truh kan kandah, samar cak rok patagok. 

Sở LĐTBXH TPHCM bahrau peih ginum biai taong yaom bruk tacei pato, daong brei samar drah di jalan phone 1900545559 khik pacang uranaih. Thun 2023, Tổng đài pacang khik uranaih 1900545559 taduan hu 282 mbang ieu, dalam nan ieu phone tapak lac 145 mbang, ieu tapa tổng đài 111 lac 92 mbang, daok veik lac tapa harak thư, e-mail, panuac khan meng báo chí, mạng xã hội saong mai tapak tal pasak. Asal di dom mbang ieu nan hu biak rilo janih, brei thau ka bruk njauk rapeik rapai, njauk ngak pap, sua tangi ka adat hukum saong rilo kadha karei karei… Panuac khan hu langyah tapak atau payua tal gah tư vấn, atau iek tui bruk bo payua tal dom jabat pambuak tal piah langyah bruk bo uranaih daok gaok.

Tapa mbang pasang iek ruak sàng lọc y tế dalam sang bac bahrau ini di 5 sang bac di pak tỉnh Gia Lai hu duah mboh labaih mateh anek saih hu pasang iek njauk cakaong talang ka-ing, dom paka njauk báo động di y tế di sang bac. Jabat chức năng hu brei thau makna kayua mban kik anek saih daok bac oh lagaih. Uranaih glaong jang dut saong mban kik, ba tal bruk uranaih njauk kuk trun, daok oh tapak dalam tukvak suai lavik meda ngak cakaong, gù talang ka-ing. Dom anek saih mboh cakaong, vẹo talang tagok meng 44% thun 2022 tagok tal labaih mateh dalam thun 2023. Rilo sang bac di dom bhum palei urak ini jeng daok pandar dom mban kik hu ngak meng kayau meng 20 thun dahlau. Tui jalan ba tabiak, tỉnh Gia Lai meda salih dom pandap panda rami ramik ka dom sang bac lagaih dalam tukvak anak tal.

Cty Cổ phần Pajeng ba jalan pasei Sài Gòn bahrau pabak mbang camereip 3.000 harak vé nao mai meng ga Sài Gòn, Dĩ An, Biên Hòa tal dom ga meng Quảng Ngãi tal Hà Nội di dom harei tabung glaong Tết anek sak inegirai 2024. 3.000 harak vé pabak tame nan, hu peih pablei meng harei kabroi di taong abih dom labik pablei di gah jalan pasei. Tui kuhria, gah jalan pasei pablei labaih 200.000 vé di 390 sruh radaih pui ka bhap bini nao mai dalam tuk dahlau, dalam saong hadei di Tết thun ini. Langiu di dom labik pablei harak vé, mikva meda ieu phone tal Tổng đài piah kakei blei. Hu thau, tal urak ini, gah jalan pasei pablei hu labaih 130.000 vé.

Sở Jalan mbak pajeng ba tỉnh Bình Dương bahrau hu harak payua tal 11 pasak taong yaom radaih cơ giới di dalam tỉnh piah caga dahlau bruk gar jalan tuk dom sruh radaih mai taong yaom di tukvak dahlau di Tết. Tui pasang iek mboh lac dom harei tapa, di dom pasak taong yaom radaih di dalam tỉnh Bình Dương, dom sruh radaih nao taong yaom rilo min oh rahtabiak bruk gar jalan. Yaok urang peih radaih ba radaih mai taong yaom tok cang labaih 3 maong lac ngak salah dom adat. Urang pan akaok kapul taong yaom radaih hu ngak catang bruk taong yaom, plaih bruk urang ngak di pasak “cò radaih” caga tuk gar jalan piah ngak dom bruk jhak, ngak lahik an ninh trật tự, ba mai dom bruk kanjak jhak oh siam dalam rahra.

Tui khau tin di karja Triều Tiên KCNA tuk mesup ini, ong Kim Jong-Un, urang pan akaok Triều Tiên hu peih sa mbang ginum biai praong di Đảng Lao động Triều Tiên, brei thau dom jalan ngak praong ka thun anak tal. Nyaom biai mbang ka 9 di UB Trung ương khóa 8 Đảng Lao động Triều Tiên hu tamat sa thun taneh ia ini ba bruk hạt nhân tame hukum negar, cuh tagok langik hu vệ tinh do thám saong cuh tên lửa đạn đạo xuyên lục địa (ICBM) bahrau. KCNA brei thau, dalam harei camereip di nyaom biai, urang hu ginum biai ka 6 asal kadha praong, dalam nan hu bruk peih ngak sarak saong kadung jien karja thun ini, kuhri kuhria kadung jien karja thun 2024 saong dom jalan patagok bruk pan akaok ba jalan di đảng.

Dom hãng taxi di Japon hu salih jalan ngak pah urang peih radaih negar langiu. Sa mbang pasang iek hu pathau khan jaik di ini brei mboh dalam 4 thun tapa, dom urang peih radaih taxi di Japon hu trun 20%, dalam tuk jaik 15% dom gah taxi hu maong mboh dom urang ngak trun jang mateh. Dalam bruk kham marat ngak trun manieng bruk kurang urang ngak, dom gah taxi di Japon hu pilih ruah gam urang peih radaih lac urang negar langiu. Dom sruh radaih taxi daok nduac di jalan pak Japon urak ini tok pabak hu labaih 60% hatai caong pandar di anak mata, ngak ka bruk ieu taxi di taneh ia ini jeng kan kandah jang saong rilo tuai daok huac kanda ka bruk ndem mayai haong dom urang peih radaih ini.

Harei kabroi, ia kakua kapal me-om bak ban ine New Delhi, Ấn Độ ngak brei 30 mbang par dalam taneh ia saong langiu dunya brei klaak atau salih tapa mon karei. Gah khik ramik mblang kapal haoh pakat dunya Delhi, brei thau, meta maong di jalan par tagok, par trun meda lac samu 0. Mblang kapal haoh pakat dunya Indira Gandhi hu tabiak panuac khan ka bruk salih maon par, saong ieu urang nao kapal haoh taom gaok haong hãng kapal haoh piah thau ka mon par. Ban ine New Delhi hu nhiệt độ trun biar di abih, trun tal 9 độ C dalam harei 25/12, saong tui kuhria ,mboh, ia kaua kapal meda hu tal harei 30/12.