Di Danak dak pok mayaom Urang gru jru Việt Nam saong jao jai bruk pakacah vak “Bruk rik prein dalam joa gidang” mbang VI pahadar 69 thun Harei Gru jru Việt Nam (27/2/1955 – 27/2/2024) hu peih tabiak di melam kabroi di Hà Nội, Akaok negar Võ Văn Thưởng taong yaom dom rai urang jakar, bác sĩ, urang ngak gah y tế dalam 69 thun tapa, tuk halei jeng njom tame dalam hatai panuac pato di Chủ tịch Hồ Chí Minh, kham marat oh padeih, yam tapa dom kan kandah, abih hatai, abih prein ka bruk ngak hu yaom glaong lac “taong ruak, daong manuac”. Akaok negar ndom lac, anak mata njauk samar drah ngak salah dom sarak, hukum ka nyu lagaih, padang labik ngak bruk hu ilamo, salamat, kein lagaih piah ka y, bác sĩ, urang ngak gah y te ngak bruk, khik caga, daong ba, pachreih bruk sahneng duah, salih bahrau, khin sahaneng, khin ngak.

Thành ủy TP.HCM bahrau peih bruk taom mbaok urang jakar pan akaok gah y tế, dom sang iek ruak, pasak y tế 22 quận huyện, TP Thủ Đức. Payua dom panuac tadhau ayuh siam mekre di abih tal dom gru jru, urang jakar gah y tế, Phó Bí thư Thành ủy, Chủ tịch UBND TP.HCM Phan Văn Mãi caong khin dom y bác sỹ daok rik daong rilo jang ka bruk patagok di TP saong oh lac ta-eng gah y tế di TP bo dom kapul y tế di TW, bol bala… daok dalam ban raya jeng lac sa binah praong. Chủ tịch UBND TP.HCM ndom lac, dom jak jeng di gah y tế TP tukvak tapa lac mai meng kham merat, pambuak bruk haong dunya piah pamaong tal bruk iek glang prein yava ka bhap bini hu siam jang. 

Dalam thun ini, tỉnh Bà Rịa-Vũng Tàu ba tabiak jalan ngak: patrun kan kathaot dalam bhum mikva bangsa takik meng 1 tal 1,5%; padang ngak 112 danak dak puh ramik ngak hacih; daong cak rok patagok bruk mbang ngui ka 120 baoh sang, abih tih dom baoh sang rahra hu mbaok tame cak rok patagok bruk ngak mbang pasiam veik, salih jalan pandar tui ilamo kĩ thuật pala drak, raong glang, padang ngak sang bahrau saong ngak pasiam 164 sang danaok. Taphia di nan, abih tih dom harei rija roya di mikva bangsa takik jeng hu sangka daong ba.

Tỉnh Bạc Liêu caik tabiak labaih 235 tỷ đồng peih ngak Danak dak bruk ngak negar patrun kathaot tukvak 2021-2025, kham merat tal jhung thun 2025, sang kan kathaot trun daok mala 1%. Dom sang kan kathaot dalam bhum urang bangsa takik trun 1%; oh hu sang kan kathaot hu menuac buh prein ka CM

Di dom tinh, ban ĐBSCL langik pandiak daok rahtabiak di rilo labik. Langik pandiak labaih 35 độ C daok rahtabiak biak khang di tỉnh Vĩnh Long saong tui kuhria meda dui atah. Pasak kuhria mboh dahlau bruk langik tasik tỉnh Trà Vinh mboh lac meng harei 3 - 5/3 rahtabiak bruk langik pandiak ngan haong nhiet do glaong abih meng 33 - 35°C, njauk caik hatai pacang caga bruk khuah patuh. Akaok UBND tỉnh Trà Vinh hu ieu kakei di dom bhum palei dalam tinh paglaong bruk peih ngak dom jalan pacang khuah, padam khuah dalam tỉnh.

Rajaei Hàn Quốc meda peih ngak danak dak ngak iek brei adat SV taneh ia langiu da-a amaik ame mai Hàn Quốc ngak bruk tui tukvak tal 8 bilan di dom bhum ngak nong atau palei ngak ikan daok di dom labik jaik sang bac di drei. Piah hu mbang tui bruk ngak iek ini, amaik ame anek saih taneh ia langiu brei hu umo thun meng 55 trun, oh hu duas hagait dahlau nan saong hu prein yava siam. Anek bhik di dom amaik ame ini jeng oh hu harak gar lac ngak suan adat hukum Hàn Quốc. 

Rajaei Canada bahrau ba tabiak danak dak hukum piah pacang cakak dom bruk pacuh pajarak pamaoh gauk online, pandar dom cty truyền thông praong njauk samar drah yah klak dom asal kadha oh siam saong patagok bruk taong phat duas pacuh pajarak “diệt chủng” tagok tal guk luac rai. Makna di hukum bahrau ini piah khik ka uranaih tabiak truh “dom kol kanjak jhak ngak bruk online” dom gah pabak asal kadha jeng meda ba tabiak dom jalan piah khik caga catang ka uranaih, dalam nan hu gam quyen pasang iek di amaik ame, rami ramik bruk roh duah salamat saong angan kakei asal kadha.

Mintri Y tế Pê-ru brei thau, Rajaei taneh ia ini meda patabiak bruk samar drah gah prein yava di rilo bhum dalam tuk dom menuac njauk ruak pandiak tabiak darah daok tagok khang. Kuhria meng akaok thun tal ini, taneh ia ini hu 28 urang matai kayua pandiak tabiak darah. Dom menuac njauk ruak tui kuhria meda tagok rilo jang tuk pandiak bhang saong hajan praong lac lagaih ka jamaok ruak caih mebaoh. Thun blaoh, Pê-ru hu labaih 400 urang matai kayua pandiak tabiak darah./.