UB bhap bini tỉnh Đồng Tháp hu ba tabiak “ Danak Khik iek saong patagok tapon sếu akok bhong di Bein pakat negar Tràm Chim vaktu thun 2022 -2023”. Bein  pakat negar Tràm Chim lac Khu Ramsar ka 4 di Việt Nam saong dang dhi 2.000 angaok dunya. Hu thau, tukvak sếu mai labik ini rilo abih lac thun 1988 ngan haong 1.052 drei sếu akok bhong; mbiah tal thun 2021 daok 3 drei saong mbiah tal ini oh mboh sếu akok bhong mai veik di Bein pakat negar Tràm Chim. Ini lac janih cim daok biak takik abih dalam tapuk bhong Việt Nam saong tapuk bhong di Lien minh Dunya khik ramik alam dunya saong kaya langik tasik.

Piah samar drah pacang caga, langyah dom bruk ngak suan di jalan mbak, abih di nyu nan lac bruk ngak suan pambuak tal manyum alak mbia saong ma-in janih ma túy, jabat Cảnh sát jalan mbak, Công an ban raya Hồ Chí Minh hu gam haong công an dom quận, huyện gam gam pasang iek di dom labik jalan. Abih di nyu nan lac bruk pasang iek dom urang manyum alak mbia daok rahtabiak gam di tuk harei, ye meng nan tok pasang iek di melam, piah ngak trun manieng dom bala rahtabiak di jalan mbak. 

Kuhria dalam 2 bilan tapa, tỉnh Bình Thuận  rah tabiak 4 mbang bruk meblak jien hue jaik 200 tỷ đồng ngan haong yaok ratuh urang tame. Jabat CSĐT Kông an TP.Phan Thiết birau taduan hu 369 blah đơn pathau meriak di bhap bini tỉnh Bình Thuận saong dom tỉnh, ban karei  hu mbaok tame 4 labik ma-in hue di Ban Phan Thiết. Dom labik ma-in  nan tapa mạng XH yau Zalo, Facebook. Dom “urang main hue” oh thau gauk, tuk urang ngak po hue brei thau ye yaok urang brei payua jien tame tai khoan. Njauk ndem lac, po hue oh brei thau angan je urang kuac hue kayua lac brei khik kandauk angan je, mbiah tal tuk po hue brei thau pacah hue, oh hu jien bayar, brei panduak mbaok, padam phone, padam mang xa hoi.

Kuhria meng akaok thun tal urak ini, tỉnh Bình Phước tamuh tabiak 5 sruh jit ruak maruoi di tapon anek asau, meyao di 5 xã. Dalam tuk nan, hu labaih 1.000 urang njauk asau, meyao kaik njauk nao tal labik y te piah caga taong ruak dahlau saong 6 urang metai. Dom urang metai jeng lac kayua iek lap, oh nao klauk jru. Dom urang pandar jru gha hareik piah taong ruak tuk njauk asau kaik. Anak bruk ini, Chi cục raong glang saong Thú y tỉnh Bình Phước hu pambuak gauk peih bruk klauk jru rilo mbang ka tapon anek asau di dom bhum palei saong klauk oh mek jien ka tapon anek asau raong di dom baoh sang mikva bangsa takik.

Tui  Cục Thủy lợi, Mentri ngak nong saong Patagok palei pala, di bhum taneran kraong Cuu Long ia mbak nyom tame bilan thu thun 2023-2024 kuhria mboh  glong jang dut saong yaok thun. Meda ba tal kurang ia di dom bhum palei, yau nan ye  njauk brei pakhang jalan brei caga khik labaih 56.000 ha padai di dom tỉnh Long An, Tiền Giang, Bến Tre, Trà Vinh, Sóc Trăng…Ngan saong bhum bhian pala phun mbang baoh, kuhria taong abih tih taneh mbuan gaok khat lahik labaih 43.300 ha, di 4 tỉnh Long An, Tiền Giang, Bến Tre, Sóc Trăng. Bruk mbuan kurang ia padar di dom baoh sang  daok atah saong labik brei ia pataom sa labik tapen tasik di dom tỉnh: Long An, Bến Tre, Trà Vinh, Sóc Trăng, Bạc Liêu, Kiên Giang, Cà Mau…

 Rajaei Ấn Độ hu brei pandar danak dak pablei salih phao ndao praong ka bol lin negar ini ngan haong yaom abih tih labaih 26 tỷ đô-la. Ini hu maong lac sa dalam dom harak gar pambuak gauk pablei salih quốc phòng praong abih meng nan mai pak Ấn Độ piah paglaong prein mesuh metak di kapul bol pan phao kraong. Tui Mintri Quốc phòng Ấn Độ, labaih 98% abih tih yaom di danak dak, meda kayua dom po thầu dalam gah ngak kong par akaok. Ini lac prein khang lagaih ka gah ngak kong quốc phòng Ấn Độ pamaong tal jalan ngak lac "Ấn Độ Tự cường".

Mentri  Thống nhất Hàn Quốc brei thau danak dak rivang ma-in dulich tal palei baha mesuh metak Panmunjom di tapen negar Triều Tiên brei padeih kayua  huac bruk oh salamat tuk lin Triều Tiên hu brei phao di labik oh hu mesruh metak. Dahlau di nan, Rajaei Hàn Quốc hu pambuak veik danak dak dulich di harei 22/11, hadei tuk danak dak ini brei padeih di kreh bilan 7 kayua lin Mỹ Travis King tapa negar suan hukum tame Triều Tiên.

Viện Y tế saong Phúc lợi Australia bahrau pathau khan abih tih paok jien bo negar ini hu buh tabiak ka gah y te piah pacang caga haong jit ruak COVID-19 meng thun 2019 tal thun 2022 lac jaik 48 tỷ đô la Australia (lac labaih 32 tỷ USD), meblah 7,2% abih tih paok jien brei ka gah y te dalam vaktu ini. Ong Nigel McMillan - giáo sư di gah ruak njom pambak saong pacang caga di Sang bac Đại học Griffith brei thau lac, bruk buh phun jien tabiak rilo ini piah pacang caga haong jit praong lac bruk njauk ngak, tapa bruk nan brei mboh lac dom urang metai kayua jit praong COVID-19 pak Australia takik jang dut saong dom taneh ia karei./.