Dah page ini, di Hà Nội, nyaom roya pakat negar dom urang ngak nong Việt Nam mbang ka VIII, tukvak 2023-2028 hu peih tabiak dalam praong prang di Pasak nyaom biai pakat negar Mỹ Đình. Tổng Bí thư Nguyễn Phú Trọng mai hu mbaok saong hu kadha ndom puac, pato tacei di nyaom roya. Ngan haong asal kadha “Jumpataom gauk – mek rahra ngak pasak – duah jalan ngak bahrau – pambuak gauk – cak rok patagok”. Nyaom roya urang ngak nong Việt Nam mbang ka VIII hu mbaok di jaik 1 ribau urang lambaok ka jaik 10 triệu urang ngak nong dalam negar. dalam Nyaom roya jeng meda peih tabiak 10 mbang ginum biai asal kadha piah ba tabiak dom jalan ngak bahrau piah langyah dom bruk praong ba tabiak ngan haong dom bruk ngak di Kapul urang ngak nong Việt Nam, pataom mek dom panuac, hatai caong piah pataom veik, taduan ba tame văn kiện di Mbang nyaom roya .

Di Hà Nội, harei ini daok rah tabiak veik bruk taom mbaok kapul anek saih, SV, dam dara bangsa takik naih gheih di abih dalam thun 2023. Ini lac sa dalam dom bruk ngak di harei pok meyaom thun 2023 kayua UB Bangsa dang tabiak pambuak bruk haong Mintri Pato Megru, Kapul dam dara CS Hồ Chí Minh pakat negar peih ngak. Thun ini, abih tih anek saih, SV, dam dara bangsa takik hu pilih ruah pok meyaom lac 143 adei di 51 bangsa, dalam nan hu 12 bangsa biak kan kandah. Dom adei lac dom anek saih mek hu giải Nhất, Nhì, Klau dalam mbang pakacah anek saih naih joi pakat negar, bruk pakacah ilamu kỹ thuật pakat negar, atau pakacah tame, hu pilih ruah tame dom sang bac đại học, học viện, mek hu điểm meng 28 điểm tagok tui tổ hợp 3 môn pilih ruah tame đại học; lac dom dam dara bangsa takik hadah krah di dom gah kayua karja palei yaih khan, ba tame.

Yaok adit di harei sanecar saong harei adit, di kreih ban Buôn Ma Thuột, tỉnh Đắk Lắk hu sa mbang darak ngan haong dom pandap panda kaya nong, pandap angan je, pandap mbang ndung bak ilamo siam gheih. Di mbang darak @BMT, dom gian hàng pandap mbang dui pachreih tuai damuai, yau yeu: Mứt sâm dây, ahar take kubau, bapui hual athak pui, sara maraik kalu, laya, plang lào... Dom pandap panda nan lac brei mboh bruk kham marat ngak mbang tari tareng, jang yau dom pandap angan je kayua mikva dom bangsa yau ye Ê Đê, Jarai, Mơ Nông, Giẻ Triêng... ngak tabiak. Mbang darak @BMT hu peih pakah di akaok bilan 12/2023, ngan haong labaih 40 gian hàng parilo janih meng dom pandap mbang, kaya nong, yaok xa sa pandap (OCOP) angan je. Langiu di nan, dom tỉnh Gia Lai, Kon Tum, Lâm Đồng, Đắk Nông jeng hu mbaok tame yaih khan dom pandap panda di mbang darak ini.

Sở Tài nguyên & Môi trường tỉnh Bà Rịa – Vũng Tàu brei thau, dalam tỉnh hu 1.007 danak dak hu taneh njauk mek veik abih tih lac labaih 23.145ha. Tal urak ini, dom puk palei hu peih ngak 204 danak dak haong jaik 555 ha, samu 20% dom danak dak saong 2,4% ka mbaok taneh. Sở daok hu panuac likau pasang iek piah mek veik taneh di danak dak suai peih ngak. Tui HĐND tỉnh Bà Rịa – Vũng Tàu, tapa pasang iek mboh lac daok rilo tavak tavaiy dalam bruk mek veik taneh, salih bruk pandar taneh ka dom danak dak hu brei adat ngak. Pakat huyện oh ka brei bruk urang pan akaok piah dang tabiak langyah bruk padang angan danak dak saong taong yaom bruk ngak

Jabat Cảnh sát pasang iek Mintri Công an hu tabiak Harak brei adat cap mek bi can piah mek kreik, Harak adat pasang iek ngan haong ong Nguyễn Thanh Bình, Akaok Ủy ban bhap bini tỉnh An Giang ka duas “pambak tame quyen di drei dalam tuk ngak bruk”, tui khoản 3, Paka 356 Hukum Hình sự. Hadei di tuk Viện kiểm sát bhap bini paglaong brei tapa, harei kabroi, Jabat Cảnh sát pasang iek Mintri Công an hu peih ngak dom Harak adat nan tui njauk adat di hukum. Urak ini, Jabat Cảnh sát pasang iek di Mintri Công an daok patui veik pasang iek, peih praong pasang iek, yaok pataom, khik iek drap ar di dom urang ini piah khik kajap bruk pataom mek ka Kanja. 

Đại Hội đồng Liên hợp quốc brei tapa sarak mbang camereip abih công nhận Tết Nguyên đán (Lunar New Year) lac harei padeih yaok thun di Liên hợp quốc. Sarak di Đại hội đồng ndom lac, Tết Nguyên đán lac harei roya di rilo taneh ia di Liên hợp quốc, pachreih dom jabat Liên hợp quốc oh peih ginum biai di harei camereip di thun bahrau saka ia bulan. Bruk Đại hội đồng brei tapa Sarak nan tuk jaik tal thun bahrau thun anek sak girai 2024 nyu hu makna biak praong ka dom taneh ia mbang Tết Nguyên đán bo daok lac bruk bui sambai ka jaik 2 tỷ menuac di dunya maong iek thun bahrau saka ia bulan lac harei praong abih dalam thun.

Hajan khang rilo mbang dalam dua harei tapa ngak brei ia sua di rilo labik pak tỉnh Narathiwat saong Yala, di gah maraong negar Thái Lan, ngak kan kandah tal yaok piluh ribau baoh sang. Kanja tỉnh Narathiwat hu mboh 9 huyen jeng daok njauk ia dauk trak, ngak kan kandah tal jaik 10.000 baoh sang ngan haong jaik 40.000 rahra, ngak khut tayah rilo sang bac. Hajan ia sua biak trak di tỉnh Narathiwat jeng ngak ka Công ty Jalan pasei negar Thái Lan njauk pathau khan lac brei padeih nduac taong abih di dom sruh radaih apui gah maraong nao meng Yala tal Narathiwat kayua jalan pasei njauk khut trak. Rilo sang bac dalam bhum njauk brei kareih pabah mbang.

Yaom lac Lào hu ngak rilo bruk piah patrun patakik bruk radaih ginuh gauk angaok jalan min dom menuac metai jeng daok di tanut glaong. Makna ba tal jeng lac kayua menyum alak, mbia blaoh peih nduac radaih. Tui pathau khan di Cục Giao thông, Bộ Công an Lào, dalam 11 bilan thun 2023, dalam taneh ia hu jaik 6.200 bala angaok jalan ngak brei 833 menuac metai saong 9.754 urang njauk rambus. Yaom lac hu trun hasit duk haong thun 2022 min jeng daok di tanut glaong tuk tagok 15% duk haong thun 2021. Tukvak tapa, dom gah chức năng di Lào kham merat ngak rilo bruk piah patrun patakik di abih dom bala angaok jalan min oh ka hu siam lagaih./.