Dalam dua harei, harei ini saong harei paguh, di palei Ilamo - Du lịch dom bangsa Việt Nam (Đồng Mô, Sơn Tây, Hà Nội), hu peih danak dak “Sắc Xuân di grauk labik dalam taneh ia” ngan haong dom bruk ngak uan Ndang, sambai Xuân sak inegirai thun 2024 piah pok mayaom ilamo siam gheih di dom bangsa Việt Nam saong rik tame paglaong talei jumpataom gauk dalam bangsa. Harei pataom "Sắc Xuân di grauk labik dalam taneh ia” thun ini hu 200 urang di 28 bangsa, di 16 tinh, ban lambaok ka dom bangsa, bhum labik hu mbaok tame. Dalam nan, hu 40  urang bangsa Tày di tỉnh Cao Bằng; 30 urang bangsa B’ru Vân Kiều di tỉnh Quảng Bình; 40 urang Kinh di tỉnh Thanh Hóa; 25 urang bangsa Cam Bà-la-môn di tỉnh Ninh Thuận.

TP.HCM daok ba tabiak jalan roh duah labik Bình Quới - Thanh Đa, quận Bình Thạnh tame patagok dom bruk ngak gah ilamu yau ye: miuyim, pasak parang me-in, rạp hát, parang iek.... Ini lac panuac khan di Chủ tịch UBND TP.HCM Phan Văn Mãi ba tabiak di mbang taom mbaok văn nghệ sĩ tuk uan akaok thun bahrau sak anek girai 2024 bahrau ini. Akaok UBND TP.HCM brei thau, ban raya dak harei dak caik hatai sangka buh jien tame ngak rilo jang ka gah ilamu XH saong raidiuk bhap bini hu glaong tagaok. Urang pan akaok ban raya tuk halei jeng caik hatai tui pang, peih tabiak labik palagaih ka văn học nghệ thuật tagok glaong jang.

Urang ngak nong pala tabau pak huyện Cù Lao Dung, tỉnh Sóc Trăng daokm chreih chrai kaoh jaoh 2.700 ha tabau hu nang suat mbaih, saradang glaong, pablei hu yaom. Meng pambuak gauk dalam bruk duah jalan pablei tabiak, nan ye bruk pablei tabiak di phun tabau tal tukvak urak ini lac biak tani tanat. Abih di nyu nan lac, tabau thun ini mek hu saradang biak glaong, brei nang suat mek hu tui kuhria 120 tấn/ha, glaong jang dut saong yaok thun. Urak ini, Cty pataom blei tabau di mblang pala ngan haong tabau mek hu 10 chữ saradang hu yaom 1.320 đồng/kg. Hadei di tuk kaoh abih phun jien, urang nong laba hu meng 40-60 triệu đồng/ha. Langiu di nan, bruk jaoh tabau jeng biak tani tanat, oh rahtabiak bruk kurang urang ngak.

mBan khik ramik danak dak padang ngak jalan mbak tỉnh Tiền Giang brei thau, bahrau peih bruk padang ngak tatua Tân Phong tapa kraong Năm Thôn pambuak pulao Tân Phong, huyện Cai Lậy haong huyện Cái Bè. Ini lac sa dalam dom bruk praong pandar phun jien đầu tư công di tỉnh Tiền Giang dalam thun ini. Bruk padang ngak nan hu yaom jien buh tame ngak labaih 137 tỷ đồng, tukvak ngak salah lac 360 harei. Tatua hu ngak 9 nhịp, mbaok tatua praong 9 mét, tuh bê tông nhựa. Urak ini, dom nhà thầu daok ba abih prein yava tame ngak tui jalan lac siam mekre, salamat, ngak njauk tukvak ba tabiak.

Tỉnh Đắk Lắk urak ini hu labaih 497.000 héc ta glai. Urak ini daok tame tukvak tabung glaong di bilan thu, dom kapul chức năng pak Đắk Lắk daok jhul khang bruk peih ngak dom jalan pacang caga khuah glai, samar drah langyah oh caik apui khuah praong, pambak praong… rilo mblang taneh glai pak dom huyện như Ea H’leo, Ea Súp, Ea Kar, Buôn Đôn… daok mbuan khuah pakat 4, pakat 5 – lac pakat biak kan kandah. Jabat pasang iek glai Đắk Lắk hu kham marat pambuak haong dom bhum palei, dom po glai saong rahra daok jaik glai jhul khang bruk pacang caga khuah glai.

Rajaei Indonesia daok caga 2,5 triệu asar pajaih brei saoh ka rahra ban ine bahrau Nusantara di taneh ia ini piah pasiam veik dom glai saong khik caga dom bhum taneh hu yaom glaong. Tui kuhria, yaok rahra hu taduan 25 asar pajaih phun. Piah hu asar pajaih rilo jang, brei dang angan kapul, nyaom atau jabat. Bruk brei saoh pajaih phun ka rahra lac sa dalam dom kham merat di rajaei Indonesia piah ngak brei ban ine bahrau hijao saong siam mekre.

Harei pataom kalang pakat dunya Pattaya, Thái Lan hu peih ngak saong dui atah tal harei 26/2 anak tal. Harei pataom thun ini dui pachreih hu rio kapul par kalang hu ilamo saong labaih 1.000 kalang bơm hơi meng 10 taneh ia, yau ye Đức, Pháp, Italia, Australia, Colombia, Trung Quốc, Ấn Độ... Bruk njauk mayau nan lac dalam harei pataom ini hu rilo drei kalang biak praong, atah tal 10 mét saong hu rami ramik caik gom truac hadah. Gah peih ngak hu caong maong harei pataom thun ini meda dui pachreih hu yaok ribau tuai negar langiu mai tal ban Pattaya.

Dalam tuk dunya daok kham merat piah tame thun 2030, nhiệt độ tok tagok 1,5 độ C duk haong saman dahlau di tuk ngak kong ye Australia daok mek hu tanut tagok ini. Gah khí tượng Australia brei thau, thun blaoh lac thun pandiak di abih ka 8 di taneh ia ini tuk nhiệt độ kuhria rah tapa di labik ini glaong jang tanut nhiệt kuhria rah tapa lac 0,98 độ C. Dalam nan, dom ban praong di taneh ia ini jeng hu tanut pandiak glaong di abih. Bilan brak thun blaoh jeng hu taong yaom lac ấm áp di abih kuhria meng dahlau mai./.