UB bhap bini TPHCM birau hu harak payua tagok Mentri Pato megru likau brei adat palih ruah anek saih tal 6 Sang bac chuyên Trần Đại Nghĩa dalam thun bac 2024-2025. Saang bac THPT Trần Đại Nghĩa peih bruk palih ruah anek saih pakat bac THCS saong THPT meng thun 2000-2001. Thun 2002, sang bac hu salih jeng Sang bac THPT chuyen Trần Đại Nghĩa. Yaok thun, langiu di palih ruah anek saih khoi THPT, sang bac daok hu palih ruah tame tal bac 6 ngan haong labaih 500 anek saih tapa kadha pakacah prein bac sap Anh. Harak ho so tut angan hu meng 3.000 – 4.000.

Di tỉnh Hậu Giang, ia mbak daok njaom tame rilo puk palei. Tui kuhria mboh dahlau, bilan thu ini bhum mbuan njauk pandak bhang di Hậu Giang labaih 110.000ha, dalam nan bhum mbuan njaom mbak, hu tal 60.000ha. Karja saong bhap bini labik ini hu caga rilo jalan ngak piah pacang caga. UBND tỉnh Hậu Giang ieu dom mban ngành pambuak tal, brei tui iek catang ia mbak du halei saong labik njaom mbak piah khan brei karja dom pakat thau piah langyah, khan brei bhap bini thau piah caga plaih. 

Urak ini, di dunya hu labaih 6.000 janih ruak takik mboh ngak jhak tal prein yawa di 300 triệu menuac. Di Viet Nam, urak ini hu labaih 100 janih ruak takik mboh saong 6 triệu urang daok njauk ruak nan, dalam nan hu tal 58% ruak nan hu mboh di uranaih, rilo uranaih njauk ruak takik mboh nan, metai dahlau umo 5 thun. Mentri Y tế kakei, piah samar thau saong taong ruak sumu, khol drei njauk bhian ba gauk gar, urang dalam sang nao tal dom labik y te dut iek prein yawa, paglong jalan sahaneng ka bruk kanjak jhak di ruak takik mboh dalam raidiuk.

Piah ka bhap bini bangsa Khmer uan raok Chôl Chnăm Thmây thun 2024 dalam bui sambaichreih chrai, siam mekre salamat, jum pataom saong patak pataom, UBND tỉnh Trà Vinh ieu dom gah, dom puk palei brei peih ngak siam bruk pataom mbaok, nao ravang dom sang sarak karja, dom baha Khmer dalam tỉnh, khik kajap bruk salamat, patak pataom. Peih ngak dom bruk daoh tamia, me-in thể thao, iek glang prein yava ka bhap bini saong khik ramik sron mbon puk palei. Dom labik ngak bruk, dom sang bac, brei rami ramik ka urang ngak saong anek saih Khmer hu padeih Tết dalam 4 harei, lac meng harei 13 - 16/4/2024.

Gah chuc nang tỉnh Bạc Liêu birau duah mboh 2 sruh radaih pagam bien so tinh Ninh Thuận daok pajeng hadang pajaih tapa huyện huyện Hoà Bình, tỉnh Bạc Liêu brei padeih piah pasang iek. Tuk pasang iek, gah chuc nang mboh hu labaih 1,470 trieu drei hadang pajaih, dom urang peih radaih oh hu harak gal hagait tal dom hadang pajaih nan. Meng akok thun tal ini, jabat chức năng tỉnh Bạc Liêu mek hu 6 radaih pajeng hadang pajaih oh hu harak gal pasang iek jit ruak ngan haong labaih 10 trieu drei hadang pajaih.

Piah pacang cakak dom bruk ma-in mbia saong pachot tapa mạng (online), Karja Campuchia daok caga ba tabiak truh taneh ia drei 195 urang negar langiu pambuak tal dom bruk me-in mbia saong pachot tapa negar. Dahlau di nan, harei 14/02/2024, Thủ tướng Campuchia Hun Manet hu tacei pato dom tỉnh ban brei ngak pakhang bruk cap mek kol me-in mbia suan adat hukum. Ini lac sa dalam dom bruk praong di rajaei dalam tukvak anak tal piah khik adat hukum saong siam mekre salamat rahra, jhul patagok KTXH saong ba mai raidiuk trei sir ka taong abih menuac sia

Tổng thống Hàn Quốc Yoon Suk Yeol iew brei peih ngak samar bruk salih birau gah Y tế di Rajaei, dalam nan hu gam bruk palih ruah parilo sinh viên sang bac y, dalam tuk bruk ndok padeih ngak di bác sĩ pasram ngak dalam taneh ia daok rah tabiak. Ong Yoon Suk Yeol ba panuac iew nan di mbang taom gaok dom thư ký pakat glong. Dalam 3 adit tapa, labaih 90% dalam 13.000 bác sĩ pasram dalam negar ba gauk padeih bruk piah cagar veik bruk ba tabiak di Rajaei brei patagok bruk palih ruah saih megru di dom sang bac y tagok 2.000, piah lang talaih bruk kurang bác sĩ.

Karja Mexico daong paklah hu ka 200 urang, hu gam uraniah, daok dalam sa thùng di sa radaih pajeng pandap di ban Ramos Arizpe, gah brak taneh ia ini. Akaok bilan 1/2024, urang jakar Mexico jeng daong paklah hu ka 726 urang di cư, mai meng dom taneh ia Trung Mỹ, daok di sa nhà kho di mbang gah kreh negar Tlaxcala. Tui yaok pataom di gah Hải quan saong khik caga bhum tapen negar Mexico, dalam thun 2023, hu tal 2,2 triệu menuac di cư nap tapa Mexico piah duah jalan tapa Mỹ./.