Dom công ty du lịch di TP.HCM bahrau brei thau dom danak dak khuyến mãi uan salam bilan xuân 2024 haong yaom lap, rilo labik nao tal… Công ty Vietravel, tui kuhria dalam tuk Tết 2024, công ty pabak ka labaih 150.000 mbang tui, tagok 15% dut saong tukvak Tết 2019. Hu labaih 300 pandap du lịch dalam saong langiu taneh ia hu Vietravel peih pablei dalam tuk tết. BenThanh Tourist jeng brei thau lac, daok peih pablei jaik 100 danak dak du lịch dalam saong langiu taneh ia. Công ty CP Truyền thông Du lịch Việt daok hu rilo paok tour Nhật Bản, Hàn Quốc, Trung Quốc, New Zealand... langiu di bruk paglaong dom bruk ba drei tame ma-in bahrau, siam makre, dom doanh nghiệp jeng pambuak haong dom gah pambuak pajeng ba, bhum palei piah khik yaom lagaih saong patagok bruk bruk ưu đãi ka tuai damuai.

Meng harei 29/11 tal harei 1/12 di ban Kon Tum, tỉnh Kon Tum hu peih Harei pataom ilamu, thể thao saong du lịch dom bangsa bhum Tây Nguyên mbang ka I thun 2023 ngan saong kadha “Glai ram Tây Nguyên – Gheih mrekre taom gauk”. Harei pataom hu mbaok di 500 nghệ nhân, diễn viên, vận động viên lac urang bangsa takik di 5 tỉnh bhum Tây Nguyên. Harei pataom piah pok meyaom, patagok ilamu dom bangsa daok di bhum Tây Nguyên. Ini lac tuk piah ka bhap bini dom bangsa daok di Tây Nguyên hu taom gaok, ndom biai nao mai, klah rabha saong pambak tabiak ilamu siam mekre. Harei pataom daok hu rik daong ka rai ranaih paglaong hatai sahneng khik ramik ilamu meng kan.

Dom thun tapa, urang ngak di Bình Dương hu yaok rabau dom bruk ngak gheih dalam bruk ngak, ba kein laba ka doanh nghiep yaok rituh tỷ đồng. meng nan, dui pachreih hatai pachreih bac taa, roh duah, duah bruk ngak bahrau di urang ngak, salih ka bruk tok ngak dom bruk hu ba tabiak lac pandar hagait ngak nan. Maong mboh dom bruk rik tame di urang ngak, bahrau ini, kapuk ngak bruk tỉnh Bình Dương hu peih mbang nyaom pok mayaom 249 urang ngak naih joi – urang ngak duah bruk ngak bahrau, dalam nan hu 4 urang hu bruk ngak biak naih dalam danak dak pakacah gauk anit ranam taneh ia vaktu 2021 - 2023. Dalam thun 2023, Bình Dương hu 7 bruk ngak bahrau hadah krah angan je di urang ngak hu Kapul ngak bruk Việt Nam pok mayaom di Jai thuong Nguyễn Đức Cảnh.

Jabat Bangsa huyện Bác Ái, tỉnh Ninh Thuận bahrau pambuak bruk haong UBND xã Phước Thành peih pato pathau khan pacang bruk khin gauk tuk daok sit, tuk oh ka tal umo lakhah saong tok gauk dalam but pajaih ka urang jakar, urang đảng saong bhap bini pak ini. ​Tapa nan, urang pathau khan hu brei thau ka Hukum lakhah caga saong baoh sang; bruk lakhah caga tuk daok sit oh ka tal umo di dalam huyện; ilamu pathau khan piah ngak brei salih bruk nan… Mbang pato pasram hu daong ka mikva paglaong hatai sahneng ka patrun bruk tok gauk tuk daok sit saong lakhah caga dalam but pajaih.

UBMTTQVN tỉnh An Giang pambuak haong Gilang paraik Sarak kanja dhar An Giang peih bruk jao 5 baoh sang Jumpataom ka mikva bangsa Khmer daok di xã Núi Tô, huyện Tri Tôn. ​Dom baoh sang hu jao sang rilo meng lac nao ngak pah, oh hu jien piah ngak pasiam veik sang danaok. Dom baoh sang bahrau nan hu yaom jien padang ngak meng 80 - 100 triệu đồng sa baoh. Dalam nan, Gilang paraik sarak kanja dhar An Giang daong 50 triệu đồng đồng sa baoh sang, binah daok veik lac kayua sang masaiy jien di Gilang paraik sarak kanja piah ngak. UBMT negar VN huyện Tri Tôn jeng hu daong ka mikva dom pandap panda pandar dalam sang.

Japon lac gah pabak dang akaok dom janih pandap piah ngak “chip” daok lahik nao labik dang akaok di drei dalam dom pluh thun jaik di ini saong daok daong ka dom labik ngak tabiak chip piah padang prein khang. Rajaei Japon meda parabha 13 tỷ USD piah daong jhul tagok gah ngak chip di taneh ia dalam kadung jien karja pabak ka thun jien padai urak ini. Dom kadung jien tui kuhria hu pandar piah daong ka Cty ngak tabiak chất bán dẫn TSMC di bhum taneh Đài Loan (Trung Quốc) saong liên doanh ngak chip Rapidus. Mintri Kinh tế, Pablei salih saong ngak kong Japon brei thau lac rajaei taneh ia ini meda pabak yaom jien daong pabak 1,3 tỷ USD ka sang mac daok di tỉnh Hiroshima di Cty ngak chip Mỹ Micron Technology.  

Dom quan pablei salih saong pablei lẻ praong di Thái Lan jeng daok khik tani tanat yaom saradang yau klak hadei di mbang tagok yaom di dalam taneh ia jaik di ini lac 2 baht /kg. Thái Lan hu dom jalan ngak piah pacang caga khik piah pandap panda ini. Kanja Thái Lan hu brei tapa panuac likau di Ủy ban Tabau saong saradang ka bruk tagok yaom pablei lẻ saradang veik 2 baht/kg. tanut tagok ini takik jang 2 baht dut saong bruk likau tagok 4 baht yaok kg saradang bo Ủy ban ba tabiak meng puac bilan 10 piah samu haong bruk kuhria tagok yaom di dunya. Tập đoàn pablei lẻ Big C brei thau lac: dom cửa hàng Big C hu ginup saradang daok caga khik piah saong meda patui veik pablei haong yaom klak. Min, gah pablei lẻ ini tok pablei ka yaok baoh sang rilo abih lac 3 kg yaok harei, ngan haong yaom 24-25 baht/kg.

Trung Quốc brei thau lac meda daok brei payua gấu trúc tal Mỹ, ieu nyu lac "phái viên" ka talei rohim di bhap bini 2 taneh ia. Chủ tịch Trung Quốc ong Tập Cận Bình brei thau: Sở thú San Diego saong rahra California biak caong hu taduan raok gấu trúc mai veik. Kol dahlak halan hatian pambuak bruk haong Mỹ dalam kham merat khik veik gấu trúc saong kham merat abih drei piah pabak hatai caong di rahra California, piah kak kajap jang talei pambuak bruk di 2 taneh ia. Trung Quốc hu brei ka labaih 20 taneh ia di dunya nyim gấu trúc, janih athur hu pagap yau "quốc bảo" di taneh ia ini dalam danak dak "ngoại giao gấu trúc" rilo thun tapa di Bắc Kinh./.