Dah page ini, dang akaok Mbang nyaom Rajaei ka bruk padang ngak hukum bilan 02/2024 piah ginum biai, pasang iek brei panuac ngan haong 11 asal kadha lac 5 danak dak hukum, 5 kadha ieu padang hukum saong asal kadha ka Danak dak padang hukum, sarak, Thủ tướng Phạm Minh Chính ieu kakei pasang iek cambaih, tani tanat ka bruk padang ngak hukum, ba tame pandar hukum cambaih laih, tantu, jaik haong bruk di anak mata. Dalam nan, dom asal kadha brei mboh hu tantu cambaih laih, oh caik sa asal kadha halei hu sahaneng mboh rilo jalan karei di gauk. Gam haong bruk padang ngak hukum, njauk samar drah padang ngak, ba tabiak dom sarak peih ngak piah ka hukum hu biak biai saong samar drah tame dalam raidiuk.

Dom labik dalam TPHCM mesup ini peih bruk jao brei, taduan mek urang lin nao nghĩa vụ quân sự thun 2024. Thun ini, TPHCM hu brei bruk ieu 4.906 dam dara nao ngak lin. Dom dam dara TPHCM nao ngak lin thun ini hu ilamu chính trị saong bac ta-a biak glaong dalam dom urang tame ngak lin di 9 tỉnh, thành di Quân khu 7. Dalam nan hu 108 urang đảng, labaih 48% dom rahra tame ngak lin thun ini hu rilo menuac bac tamat đại học, cao đẳng, trung cấp.

Gam haong taneh ia, dom tinh, ban dalam Quân khu 7 jeng hu peih bruk jao taduan lin ka dom kapul bol lin saong công an. Dalam bui sambai, chreih chrai, 1.550 dam dara tỉnh Bình Dương jeng tagok jalan nao ngak lin. dalam nan hu labaih 1.000 dam dara halain hatain vak harak tagok jalan nao ngak lin. Thun ini, tỉnh Đồng Nai hu 3.238 dam dara tagok jalan nao ngak lin. Daok tỉnh Bà Rịa - Vũng Tàu, hu 1.802 dam dara. Jeng dalam dah page harei ini, labaih 3.400 dam dara di tỉnh Long An saong Bình Thuận chreih chrai tagok jalan nao ngak lin. Dom dam dara nao lin hu ilamo bac cao đẳng, đại học, dam dara lac urang jakar, viên chức daok ngak bruk di dom bhum palei tagok rilo jang dut saong thun blaoh.

Pandiak bhang toa riya dui atah dalam labaih 3 bilan tapa di tỉnh Bình Phước ngak brei dom glai di pak ini dang anak bruk lac biak mbuan si khuah. Ong Trần Quốc Hùng, akaok Chi cục Kiểm lâm tỉnh Bình Phước brei thau, jaik abih dom glai di tỉnh urak ini daok dalam bruk lac mbuan si khuah, rilo labik mboh lac glai mbuan si khuah di pakat 5, lac pakat mbuan si khuah di abih. Anak bruk mbuan khuah glai biak khang, gah khik iek glai hu panuac ieu tagaok bruk khik iek glai, pacang caga khuah glai piah khik caga catang dom glai daok hu urak ini. 

Meng akaok thun tal urak ini di huyện Trần Văn Thời, tỉnh Cà Mau hu 341 mbang glut jaleih, atah labaih 9 km, khat lahik labaih 12 tỉ đồng. Makna hu brei thau lac kayua labaih 70.000 ha taneh di huyen daok dalam labik bhum ia taba di tỉnh Cà Mau. Rahra ngak mbang , pala drak pagam pambak tame ia hajan. Bilan hajan thun ini tamat aval, langik pandiak khang ngak ka ia thu samar. Langiu di nan, piah khik ka bruk pala drak, rahra njuk ia tame mblang hamu ngak ka dom kraong, ribaong thu lagu. Bruk ini ngak brei glaong biar  oh samu gauk di mbaok jalan tapen kraong ba tal glut jaleih. 

Brei panuac peih mbaok mbang nyaom ka 55 Hội đồng Nhân quyền Liên hợp quốc (LHQ) di Genève, Thụy Sĩ, Tổng thư ký LHQ Antonio Guterres ndom lac, dunya daok salih karei biak samar tal having akaok, mesruh gauk tagok rilo daok ba mai dom pandik harao oh ka bhian mboh. Ong jeng hu ndom veik dom panuac ieu patrun mesriay ka dom taneh ia kan kathaot abih di dunya saong buh jien tabiak ngak rilo jang ka bruk pacang biến đổi khí hậu.  

Tui danak dak hukum hu Mintri Y tế, urang ngak saong Phúc lợi Nhật Bản ba tabiak, dom cty hu labaih 100 urang ngak brei pandar bruk padeih manek anek ka dom urang ngak lac likei, hukum hu ba tame pandar meng bilan 4/2025 mayah hu quốc hội negar ini brei tapa. Adat bahrau di Nhật Bản piah pachreih dom gu diuk pasang manek anek jang yau patrun manieng bruk oh samu gauk di urang kumei, lac dom urang njauk klak bruk ngak saong taduan dom naong trak iek glang sang danaok, anek mbik.

Labik ngak pakao xì gà dang akaok di Cuba Habanos khan lac jien mek tame meng pablei pakao tagok glaong abih lac 721 triệu USD di thun 2023, dalam tuk darak pasar dak harei dak caong hu dom janih pakao bingi pakat glaong, abih di nyu lac darak pasar Trung Quốc. Tui yaok pataom, Trung Quốc, Tây Ban Nha, Đức, Pháp saong Thụy Sĩ lac dom taneh ia blei rilo abih dom janih pakao di Tập đoàn Habanos. Urak ini, Habanos hu labik pablei di drei hu mbaok di labaih 150 taneh ia./.