Danak dak tatua Bạch Đằng 2 tapa kraong Đồng Nai pambuak ban Tân Uyên, tỉnh Bình Dương haong huyện Vĩnh Cửu, tỉnh Đồng Nai lac sa dalam dom danak dak praong piah pambuak Bhum. Tui kuhrua, danak dak hu ngak salah di quý II/2024. Danak dak atah labaih 2,8km, hu ngak haong yaom phun jien buh tame labaih 490 tỷ đồng meng kadung jien kanja di 2 tỉnh. Tuk ngak salah brei ka radaih nao mai, tatua Bạch Đằng 2 meda daong patagok prein pajeng pandap panda saong jhul khang bruk cak rok patagok kinh tế - xã hội di dua bhum palei. Abih di nyu nan lac, rahra saong radaih oh daok nao tapa phà gaok biak rilo cuang kandah, tavak taviay yau urak ini.

Tui panuac khan di mblang kapal haoh dunya Tân Sơn Nhất, tuk Tết meng blaoh, dom tuai tapa mblang kapal haoh lac labaih 3,8 triệu mbang, rilo jang duk haong tukvak ini thun dahlau saong glaong jang tukvak dahlau di jit COVID-19. Kuhria rah tapa, hu 817 mbang par yaok harei, tabung glaong lac harei 9 bingun Tết hu 975 mbang par. Maong rah tapa, yaom lac tuai saong dom mbang par hu rilo jang, min meng hu kuhria caga dahlau, nan ye bruk nao mai di mblang kapal haoh hu siam mekre, mbuan lagaih

Amuk Trịnh Thị Khơng, ndih tapui thun 1905, daok di xã Bình Lộc, ban Long Khánh, tỉnh Đồng Nai thun ini umo 119 thun, daok lac urang praong thun abih di Việt Nam saong praong jang 2 thun dut saong urang taha abih di dunya hu Kỷ lục Guinness dunya pok brei angan. Ong Tăng Quốc Lập, Phó akaok UBND ban Long Khánh brei thau, amuk Khơng tuk halei jeng taduan hu bruk sangka di dom pakat, kanja, dom kapul nyaom dalam bhum palei. Yaok thun, amuk hu taduan pandap di Akaok negar alin ngan haong urang umo 100 thun tagok. Ong Lập jeng caong maong lac, tapa gah kapar sap, gah Guinness dunya meda sangka tal amuk Khơng.

Gah Cảnh sát điều tra - Công an tỉnh Đồng Nai daok duah thau, langyah dom bruk hình sự pambuak tal "mbang hối lộ", "pachot blah mek drap ar", "ngak suan gah bayar jien daong labik daok bahrau tuk karja mek veik taneh" rah tabiak di huyện Long Thành pambuak tal bruk mek veik taneh ngak mblang kapal haoh Long Thành, saong khởi tố 6 urang pambuak tal dom bruk nan.  Công an jeng hu panuac ieu dom urang hu bayar jien daong labik daok bahrau suan hukum di bruk ngak mblang kapal haoh ini, mai taom gaok công an, bayar veik jien labaih tui adat.

Tui Cục Kiểm lâm, Mintri Ngak nong saong patagok palei pala, bhum Tây nguyên saong Nam bộ daok patui veik takik hajan, langik pandiak khang dui atah dalam 10 harei tal, abih di nyu nan lac bhum Đông Nam bộ langik pandiak meng 35 độ tal 37 độ C, độ ẩm trun bier mala 50%. Anak bruk oh siam lagaih ini di langik tasik, Cục Kiểm lâm kakei lac, rahra oh pandar apui dalam saong jaik glai dalam dom harei ini. Langik thu lagu, pandiak bhang ngak ka tal thực bì mala dom binah glai thu lagu, dalam tuk glai daok dalam bilan salih hala nan ye tal thực bì dak harei dak kapan jang, tok gaok hasit apui meda ngak brei khuah praong.

Cục Hàng không Dân dụng Trung Quốc bahrau ba tabiak brei thau jalan ngak piah patagok gah kapal haoh pajeng tuai di taneh ia ini. Tui nan, tal thun 2035, Trung Quốc meda jeng taneh ia praong khang gah pajeng ba jalan kapal haoh. Jalan ngak ba tabiak bruk padang 3 - 4 labik praong pambuak jalan par abih gah di dunya haong prein meriak gauk khang pakat dunya, dom mblang kapal haoh pajeng tuai hu labaih 400, hu prein khik kajap 30 triệu mbang par trun tagok yaok thun. 

Pambuak tal bruk 9.000 bác sĩ jak gauk padeih ngak dalam dom harei tapa, Mintri Y tế Hàn Quốc brei thau lac, tok hu 294 bác sĩ tập sự mai gilac ngak bruk di harei 29/2. Mintri Y tế khan lac, meda peih ngak adat cakak dom harak adat saong peih ngak tui hukum meng harei 4/3. Bruk ini ngak ka bruk duh hatai di manuac sia huac lac meda  rah tabiak sarau kadha gah y te dalam bilan 3 daok jeng bruk biak.

8# Tui pathau khan bharau abih di Gilang pariak dunya, tal thun 2050, dom nerak tachauk di dunya meda tagaok rilo jang 3,4 tỷ tấn sa thun, samu tanut tagok 70% duk saong nerak tachauk di thun 2016. Bruk patagok nerak khang di dunya meda ngak kan kandah rilo abih tal dom taneh ia kan kathaot di abih. Dom taneh ia ini oh hu ginup prein piah khik iek nerak nan hu siam lagaih. Makna praong ba tal tagok rilo nerak ini, lac kayua patagok kinh tế saong tagok rilo menuac sia./.