UB bhap bini tỉnh Đồng Tháp birau duah thau tapa urang ilamo mboh lac danak dak padang ngak tinh kieu mau ka bruk ngak nong sinh thái, ngak nong tui jalan birau, urang ngak nong hadah krah tal thun 2030.  Dalam nan danak dak ini kham merat  tal thun 2030 hu 80% taneh pala padai takik tathuak nerak, patagok yaom padai di hamu hu 250 trieu dong sa thun; patagok GRDP ngak nong labiah 3,5% sa thun. Tui nan, kham merat hu 60%  baoh sang tui ngak, pandar asar nerak saong pandar ka bruk karei; 80% taneh ngak hamu takik tathuak nerak; 98% baoh sang bhap bini dalam palei pala hu pandar ia hacih.

Birau ini, Kong an TPHCM pambuak haong dom jabat chuc nang daong langyah duah thau meng halei mai, tut angan labik daok saong CCCD ka dom urang kan kandah. Dahlau di nan, tapa pasang iek, Kong an ban raya hu taduan 575 mbang urang hu labik bảo trợ xa hoi, labik raong ba payua panuac mai, oh hu harak gal; abih di nyu hu dom adei daok bac THCS, THPT, khin caong hu harak gal định danh ca nhan  piah ngak harak pakacah bac tagok.

Yaom lac, phun pala hu ralo di tỉnh Hậu Giang min birau ini urang ngak nong  pala phun kruac aih  oh hu asar  oh daok laba ralo kayua yaom trun lap. Urak ini, yaom kruac aih oh hu asar  pablei di bein yaom meng 5.000 -6.000 đồng sa kilo. Yaom yau nan urang pala kruac aih takik laba. Tui rilo urang ngak nong, yaom kruac aih trun dalam lac kayua kruac piah rilo bo takik urang blei kayua hajan dui atah dalam tukvak tapa.

Hadei tukvak kham merat peih ngak, mbiah tal ini bruk peih ngak danak dak tatua Rạch Miễu 2 pambuak dua tỉnh Tiền Giang saong Bến Tre hu salah labaih 65%, meda sumu bruk ba tabiak. Danak dak padang ngak meng bilan 3 thun 2021, kuhria mboh dahlau tal puac thun 2025 meda ngak salah. Hadei ngak blaoh, danak dak meda daong patrun bruk gar jalan Roya 60, abih di nyu lac “ klak rabha” ka tatua Rạch Miễu urak ini bhian rah tabiak bruk gar jalan biak trak damak.

Sở Ilamo, Padhih saong Du lịch tỉnh Bình Thuận peih ngak rilo bruk Khik ramik, patagok dom yaom glong ilamo siam gheih di bhap bini bangsa takik gam bruk patagok yulit. Dalam dom mbang pasram pato akhar huroh Cam, pato alat ragam bangsa atau puac Ariya…hu mbaok di Po Dhiar Thường Hữu Xuân, Akok Hội đồng Halau janeng agam Ahier - Balamon tỉnh Bình Thuận, tui nan lac Urang hu angan je di palei Lạc Trị, xã Phú Lạc, huyện Tuy Phong. Po Dhiar Thường Hữu Xuân daok kham ba abih hatai haong bruk pato akhar Cam piah khik ramik drap ar di muk kei. 

Jabat  Khik iek Langik tasik, Địa vật lý saong Khí quyển Philippines brei thau meng ini tal puac thun hu 6 mbang ribuk nhiet ndoi veik meda tame Philippines. Taneh ia ini daok kuhria iek tani tanat ribuk birau lac Leon. Dalam tuk nan, Philippines daok gaok kan kandah hadei ribuk Trà Mi nao tapa hu tal 116 urang metai. 160 ban, ban sit daok gaok bala meng langik tasik kayua ribuk.

Mentri Jien padai Mỹ ba tabiak jalan ngak brei pakhang pakauk pablei ka Trung Quoc dom ilamo kong nghe meda pandar piah mesruh haong bol lin saong an ninh taneh Mỹ. Dom kong nghe  njuak pakauk tapa Trung Quốc nan lac chip bán dẫn, vi điện tử, kong nghe thong tin luong tu saong kong nghe AI. Tui urang jakar Mỹ, dom kong nghe nan ba mai kan kandah ka bruk salamat taneh ia Mỹ.

Palei Hiệp Thạch di ban Quảng Châu, tỉnh Quảng Đông, gah Meraong negar Trung Quốc, hu peih ngak sa bruk “ pacang jamoh meng jamoh”, palao meng 300.000 tal 500.000 drei jamoh tano hu pasaik blaoh yaok adit, piah pacang jit ruak pandiak tabiak darah. Piah ngak brei trun jamoh vằn tapa bruk palao dom drei jamoh  tano pasaih blaoh, tuk tui binai meda caik baoh oh hu anek jamoh./.