Tui Mintri Ngak nong saong patagok palei pala, dalam 2 bilan akaok thun, kim ngạch pablei tabiak negar langiu gah kaya nong, kaya glai, kaya tasik di dalam taneh ia tui kuhria mek hu 9,84 tỷ USD, tagok mateh dut saong tukvak ini di thun dahlau. Thứ trưởng Mintri Ngak nong saong patagok palei pale Phùng Đức Tiến brei thau lac, meng bruk rami ramik veik darak pasa brei mboh chat luong kaya nong di Việt Nam pabak hu hatai caong di darak pasa pakat glaong. Pagap yau Mỹ, châu Âu, kaya nong Việt hu mboh hadah hadai jang, bruk ini brei mboh bruk pasiam veik di dom darak pasa jang yau bruk rami ramik veik gah ngak nong hu pambuak haong darak pasa khang kajap jang.

Tui panuac khan di Sở Du lịch TP.HCM, kuhria dalam  7 harei padeih Tết meng blaoh, du lịch TP dui pachreih hu 75.000 mbang tuai dunya, tagaok 15,4% duk haong tukvak ini thun blaoh. Di dom labik ravang iek, me-in sambai di TP, hu 1,8 triệu mbang tuai; Jien mek tame hu jaik 6.550 tỷ đồng. Piah mek hu bruk taduan raok 44 triệu mbang tuai haong yaom jien mek tame abih tih 190.000 tỷ đồng dalam thun ini, gah du lịch TP.HCM hu ba tabiak rilo bruk ngak praong piah dui pachreih tuai, gam patagok yaih khan du lịch di darak pasar rilo taneh ia di mangaok dunya. 

Tỉnh Tây Ninh njauk gauk brei tapa bruk quy hoạch 3 đô thị bahrau di dom huyện Châu Thành, Tân Biên, Tân Châu, cak rok 3 palei ini jeng labik cak rok patagok bhum tapen negar gah barak di tinh tal thun 2045. Jalan ngak ini lac piah cak rok patagok 3 bhum palei ini jeng gah patagok dalam bhum tapen negar gah barak di tinh, pambuak haong ban Tây Ninh saong dom pabah mbang negar Phước Tân, pabah mbang negar dunya Xa Mát saong bhum Đông Nam Bộ.

Viện Kiểm sát bhap bini pakat glaong di abih bahrau ngak salah harak truy tố Trần Quí Thanh (dahlau daih ngak Yam ndok Cty TNHH Thương mại – Dịch vụ Tân Hiệp Phát) haong 2 urang anek kumei lac Trần Uyên Phương, Trần Ngọc Bích ka duas “Pambak tame hatai jia blah mek drap ar”. Meng bilan 1/2019 tal bilan 11/2020, Trần Quí Thanh haong kol tangin takai ngak 4 bruk “Pambak tame hatai jia blag mek drap ar” di 4 urang. Dalam nan hu: 2 danak Minh Thành, Nhơn Thành; 29 mblang taneh hu kaoh tabiak meng mblang taneh 452 di sa-ai Nguyễn Văn Chung, 4 mblang taneh di ong Lâm Sơn Hoàng saong 2 mblang taneh di sa-ai Nguyễn Huy Đông hu yaom abih tih lac labaih 1.048 tỷ đồng.  

Pambuak tal bruk 3 urang taong mek ikan pak Kiên Giang njauk taong paoh di bhum tasik Cà Mau di bilan 11/2023, jabat Cảnh sát pasang iek, Công an tỉnh Cà Mau hu brei langyah tui hukum bruk ini piah pasang iek ka duas “Taong paoh urang karei njauk rambuac” tui khoản 1 Paka 134 Hukum Hình sự. Tukvak tapa, di bhum tasik di tỉnh daok tagok bruk meriak gauk labik taong mek ikan. Kayua yau nan ye, akaok UBND tỉnh hu pato tacei jalan ka Công an tỉnh dang tabiak, pambuak haong Bộ Chỉ huy bol lin Biên phòng saong dom kapul hu pambuak tal paglaong bruk pasang iek, khik ramik bhum tasik, samar drah duah mboh, pacang cakak, langyah dom bruk ngak suan tui adat hukum, oh caik rahtabiak labik pandiak…

Tanut menek anek di Singapore thun 2023 trun daok 0,97, mbang camereip abih tanut ini trun mala 1. Tui Jabat Thủ tướng Singapore, taneh ia ini hu 26.500 mbang lakhah caga thường trú saong 30.500 mbang ndih tapui thường trú dalam thun. Kuhria rah tapa, dom menuac sia Singapore tok gauk saong hu anek dalam 5 thun tapa takik jang duk haong vaktu 5 thun dahlau nan. Tui jabat thủ tướng, rilo makna ngak brei bruk ndih tapui trun daok takik yau ye jit praong COVID-19 ngak brei klaih klaoh, dui atah  bruk ngak lakhah jeng yau ndih tapui anek, trak damak meng bruk duah jien raong anek, glaih glar di bruk ngak haong bruk iek glang anek bhik, saong bruk salih karei dalam jalan sahneng ka bruk njauk ngak dahlau atau hadei di dam dara, urang ranaih umo thun. 

Braxin negar dang tabiak peih Nyaom biai akaok mintri jien padai 20 thun ini brei thau lac, mbang nyaom  camriep dalam thun di dom Akaok Mintri Jien padai, nyaom dom gah kinh te cak rok patagok saong bahrau tagok dang akaok dunya (G20) hu tamat di harei kabroi bo oh hu ba tabiak panuac ndom haong gauk. Makna meng bruk dom urang dalam nyaom neh rabha gauk pambuak tal dom bruk mesuh gauk urak ini. Brei panuac di mbang họp báo, Akaok Mintri Jien padai negar ini brei thau: dom gah oh ba tabiak hu panuac ndom haong gauk yau di dom mbang nyaom G20 dahlau daih, bruk ini nyu ngak kan kandah tal bruk padang bruk njauk gauk.

Sa pathau khan di Liên minh Viễn thông Dunya (ITU) brei mboh lac hu oh ka tal 40% menuac daok di châu Phi hu quyền tame mạng Internet. Yau nan, bhum taneh ini hu menuac pandar Internet biar abih di mangaok dunya. Dalam tuk nan, jaik 90% menuac sia di châu Âu, Bắc saong Nam Mỹ pandar Internet. Rilo chuyên gia mboh lac, bruk lahik điện dui atah saong kurang labik kurang bruk kỹ thuật số di châu Phi lac dom makna praong ba tal pambuak Internet takik siam di châu Phi.