Mentri LĐ - TB saong XH hu ngak salah bruk duah thau hatai sahaneng ka bruk padeih Tet Nguyen dan nasak Girai - Giáp Thìn 2024. Mentri hu pok tagok likau Thu tuong brei padeih 2 harei dahlau saong 3 harei hadei Tet. Tui jalan ngak nan, Tet Nguyen dan 2024, kong chuc, vien chuc meda padeih 7 harei, meng harei Jip 8/2/2024 mbiah harei But 14/2/2024, lac harei 29 bilan 12 tui saka ia bulan thun nasak Qúy Mão tal harei lime bingun bilan Tha thun Giáp Thìn. Bruk ba tabiak nan hu taong yaom lac lagaih haong tukvak padeih dahlau saong hadei Tet.

Mintri Y tế bahrau hu dự thảo Thông tư tacei tabiak dom bruk dom kadha pambuak tal iek ruak, taong ruak saong pato pakai paglaong ilamu ka urang ngak bruk y tế puk, palei, amuk mbuai puk, palei. Ini lac kapul urang hu taong yaom glaong dalam iek glang prein yava urang amaik, uranaih bhuum urang bangsa takik saong bhum ceik. Dự thảo tacei tabiak cambaih laih bruk iek glang prein yava urang amaik saong uranaih ngan haong urang ngak bruk y tế puk, palei, amuk mbuai puk, palei lac: pathau khan, tacei pato gah prein yava metian menek saong bruk pacang metian ka urang kamei dalam umo ndih tapui, jak ba urang kumei saong urang kumei metian khik iek prein yava, mbang menyum siam, lagaih…

UB bhap bini tỉnh Bình Thuận birau ba tabiak brei mbaoh tangin Danak dak “ Khik ramik saong patagok Kate di urang Cam ba tame patagok bruk dulich”. Katê  di urang Cam tỉnh Bình Thuận hu Mentri Ilamu, The thao saong Dulich ba tame Angan drap ar ilamu oh mboh di meta pakat negar. Tui UB bhap bini tỉnh Bình Thuận, bruk padang ngak Danak dak “ Khik ramik saong patagok Kate di urang Cam  ba tame patagok bruk dulich” lac bruk njauk ngak chip piah dom sở, gah, bhum palei pambuak  bruk daong khik ramik saong patagok yaom glong di Kate  duh ka bruk agama, adat cambat di bhap bini, rik daong  jhul pasamar KT-XH di  bhum palei cak rok patagok.

mBan Ilamu - Xã hội HĐND TP.HCM hu ba tagok UBND TP.HCM rilo jalan ngak piah langyah tal gha bruk uranaih saong menuac likau mbang. Tui jalan ngak ini, TP.HCM hu pataom tame tacei pato dom jabat, kapul nyaom peih ngak Sarak ka 812 thun 2023 di UBND TP.HCM ka bruk pambuak gauk pataom veik uranaih, urang bal glai bal klo daok likau mbang. Min urak ini, uranaih saong urang bal glai bal klo likau mbang jeng daok hu biak rilo, abih di nyu lac di TP. Thủ Đức, Quận 1, quận Bình Thạnh, Quận 6. Dalam tuk nan, bruk pambuak gauk di dom sở, ngành, puk palei oh ka siam, oh ka samar drah, phone jalan talei pandiak oh ka yasa

Dom harei tapa, kayua hanjan rabuk ia sua, di jalan roya meng Ninh Thuận tagok ban Đà Lạt, tỉnh Lâm Đồng njuak glut jaleih, mbuan rah tabiak bala ka urang nao mai angaok jalan. Dalam nan, di labik jalan tapen ceik Đèo Ngoạn Mục di xã Lâm Sơn, huyện Ninh Sơn hu 11 labik glut jaleih taluy dalam, taluy gah langiu, tui kuhria kluk patau glut jaleih labaih 1.850 m3, patau praong 350 m3… Yaom lac, dom đơn vị daok ramik pasiam labik glut jaleih , min bruk glut jaleih daok rah tabiak veik kayua langik meda hajan veik , ngak kan kandah tal bruk nao mai di urang jeng yau radaih angaok jalan.

Mesup ini (18/10), Nyaom biai pakat glaong pambuak bruk dunya “Vil vak saong mbaok jalan” mbang ka 3 hu peih tabiak di Bắc Kinh. Brei panuac di pak ini, Chủ tịch Trung Quốc Tập Cận Bình hu khan brei thau 8 jalan ngak jhul patagok bruk “Vil val saong mbaok jalan” cakrok chất lượng glaong, lac padang 1 jalan pambuak pagam lập thể, padang bruk kinh tế dunya peih, ba tabiak ngak dom bruk pambuak gauk siam, pachreih patagok hijao, pachreih salih bahrau ilamu công nghệ, patagok taom gaok bhap bini, padang 1 BRI hacih patih saong pasiam dom sarak pambuak gauk pakat dunya di bruk ngak ini.

Bruk mesruh gauk di Israel saong gah Hamas pambak praong di Trung Đông meda ba tal  dom kan kandah birau pambak tal kinh te dunya, daok kan kandah kayua hadei dom mbang jit ruak praong COVID-19 saong mesruh metak di Ukraine. Mentri Jien padai Pháp Bruno Le Maire hu panuac lac yaom năng lượng meda  tagok glong jhul tagok bruk lạm phát  ngak patrun hatai jia di dom urang buh jien tame ngak mbang. Kadung jien dunya jeng mboh lac, dunya daok dang anak  “dom bruk pandik having kaok ralo”, dalam nan gam hu bruk mesruh metak di Trung Đông urak ini saong bruk nan meda pambak tal yaom năng lượng.

Tòa án pakat glaong abih di Ấn Độ tah klaak đơn likau lac njauk adat hukum bruk lakah caga di likei haong likei atau kumei haong kumei piah pachreih tui quyền LGBTQ di taneh ia rilo menuac abih di dunya ini. Panuac kaoh di Tòa án pakat glaong abih di Ấn Độ hu ba tabiak hadei di sa harak likau lac, bruk oh công nhận dom gu likei haong likei atau kumei haong kamei tok gauk nyu suan haong dom quyền ba tabiak di menuac LGBTQ. Yaom lac bruk likei tok likei atau kamei tok kamei di Ấn Độ hu adat hkum brei ngak meng di thun 2018, dom urang ngak bruk gah LGBTQ ndom lac dom menuac gah ini bhian gaok bruk iek lap dalam raidiuk yaok harei./.