Jien mek tame meng pablei tabiak negar langiu kaya nong, kaya glai, kaya tasik thun 2023 di negar drei tui kuhria mek hu labaih 53 tỷ USD, dalam nan hadang hu labaih 3,6 tỷ USD, pablei tabiak tal labaih 100 taneh ia. Taeng di Cà Mau hu rik tame jaik 28% kim ngạch pablei hadang tabiak negar langiu. Festival hadang Cà Mau lac bruk ngak praong di tỉnh Cà Mau, piah yaih khan angan je di gah hadang, dom pandap panda OCOP di tỉnh tal tuai dalam saong langiu taneh ia; palagaih ka dom kapul nyaom, doanh nghiệp hu taom gaok, yaih khan pandap panda, duah jalan pambuak gauk, cak rok patagok.  

Danak dak pambuak bruk cakrok du lịch di TP. Hồ Chí Minh haong 13 tỉnh, ban bhum ĐBSCL vaktu 2020-2030 lac danak dak pambuak gauk camereip abih gah du lịch di 14 tỉnh, ban. Danak dak pataom tame dom asal kadha praong yau ye: Khik ramik karja gah du lịch; pambuak gauk cakrok pandap du lịch; yaih khan, peih ngak du lịch; patagok prein ngak du lịch... Meng hu yau nan, dalam thun ini, hu labaih 2 triệu 700 rabau mbang tuai pandar danak dak du lịch pambuak gauk di bhum ĐBSCL piah duah thau ka ilamu, langik tasik, kraong ribaong bein phun pala di Nam bộ.

Nerak tachrauk tabiak meng bruk ngak mbang ngak huak yaok harei daok lac bruk kan kandah di tỉnh Tiền Giang, dom nerak dak harei dak kandaong biak rilo. Urak ini hu rilo mblang nerak praong, yaok harei taduan labaih 600 tấn nerak, rilo meng lac caik langiu langik ka oh tapa langyah. Di dom huyen, ban, dom mblang nerak biak rilo, dom nerak caik tapa rilo thun ngak tachrauk nerak alam môi trường di rilo labik. Taeng di mblang nerak di huyện Gò Công Đông (pak xã Kiểng Phước) ngak tachrauk nerak alam, ngak metai phun glai pacang caga saong tui kuhria mbuan thek tabiak tasik. Urak ini tỉnh Tiền Giang hu ieu gah buh jien tame padang ngak dom sang mac langyah nerak, min samar abih jeng  tal puac thun 2025 meng ngak salah.

Kapul khik caga langik tasik saong alam môi trường Việt Nam hu pok angan 162 phun kayau praong taha di Tiểu khu 379 glai Mã Đà, tỉnh Bình Phước lac phun inem krung. Phun inem krung di pak ini hu 15 janih, dalam nan hu 117 phun mangaok 500 thun, 18 phun labaih 900 thun, 7 phun labaih 1.000 thun, 1 phun jaik 1.230 thun. Akaok UBND tỉnh Bình Phước Trần Tuệ Hiền khan lac, bruk 162 phun praong, taha hu brei angan lac inem krung nan, nyu hu makna praong dalam bruk khik ramik đa dạng sinh học, rik daong khik caga langik tasik alam môi trường, rik daong tame khik ramik saong khik caga dom phun inem krung, jeng yau bruk khik caga glai di puk palei.

Sa drei limen glai di bhum Cát Tiên, tỉnh Đồng Nai hu mboh di labik ka oh ngak paga ndien pacang di xã Tà Lài, huyện Tân Phú, tal puh di rahra duah pandap mbang, drei limen ini biak sahanac saong pagui rahra, hadei di nan daok jhul jaleih sa gheng paga pacang ndien tu blaoh nduac tame glai veik. Paga ndien atah 75 km rah tui jalan glai meng xã Mã Đà saong Phú Lý, di huyện Vĩnh Cửu tal sa binah di xã Thanh Sơn, huyện Định Quán. Paga ndien piah pacang oh brei limen tame labik rahra saong khik caga ka phun pala, njam patam di rahra. Paga ndien khik caga ka limen ngak bruk tui jalan peih kareik ndien 1 dalam 3 giây gam gam, oh ngak pametai manuac.

193 taneh ia dalam Đại hội đồng Liên hợp quốc harei ini (11/12) meda buh phiếu ka dự thảo sarak ieu padeih cuh gauk piah ngak pahla chip di Dải Gaza. Ini lac mbang ka 2 Đại hội đồng Liên hợp quốc buh phiếu ka bruk padeih cuh gauk piah ngak pahla di Gaza. Bruk ngak nan di Đại hội đồng Liên hợp quốc rah tabiak dom harei hadei di tuk Mỹ puac adit blaoh phủ quyết ka bruk ieu padeih cuh gauk piah ngak pahla chip di Gaza pak Hội đồng Bảo an.

Thun ini hu brei thau lac thun pandiak abih dalam sajarah, min thun 2024 meda daok pandiak jang. Urak ini bahrau akaok bilan laar min rilo labik pak châu Âu dauk dalam tuyết mbong patih, hu labik kapal tal 1,5m ngak kan kandah biak trak tal bruk nao mai saong saong bruk ngak mbang di rahra. Tui dom urang roh duah ilamo, bruk pandiak tagok di baoh taneh meda ngak ka ia tuyết takik jang min laik trun rilo jang. Daok di Australia, langik pandiak rahtabiak di bhum takai tasik gah Timun saong jhul nhiệt độ di ban ine Sydney tagok  glaong abih jaik tal 39 độ C.

Sa mblang bein me-in bui sambai di Florida, Mỹ bahrau brei thau lac mbang camereip abih sa drei baya mbong patih biak quý hiếm hu ndih tapui tabiak dalam labik raong kreik pak ini. Drei baya mbong patih meta hijao takik hu ini, trak 96 gram saong atah 49 cm, hu ndih tapui tabiak haong sa drei karei hu klik sambo yau dom drei baya karei. Drei baya mbong patih lac biến thể “ndi truyền” takik hu di baya Mỹ. Lambaok di mblang bein me-in bui sambai brei thau, urak ini, drei baya ini hu khik caga salamat, plaih atah tuai ravang iek piah praong tagok hu siam mekre./.