Mbang pakacah tamat THPT thun ini, Binh Thuan saong Ninh Thuan hu jaik 20.000 anek saih tut angan pakacah. Gah Pato tacei mbang pakacah di 2 tinh, gam haong urang dang akaok dom so, dom gah pambuak tal hu pasang iek ka bruk srap gap di dom labik pakacah. Tal tukvak ini, dom labik pakacah hu srap gap ginup, tani tanat dom kein lagaih co so vat chat jeng yau bruk khik kajap an ninh, salamat ka mbang pakacah rah tabiak tui njauk jalan kuhria dahlau.

Biar harei kabroi, 142 anek saih daok di kaoh pulao Hòn Tre, Lại Sơn saong An Sơn di huyen Kiên Hải, tỉnh Kiên Giang nao tapa tasik tame ban Rạch Giá meng gilai kapal peih drah samar piah sumu mai pakacah tamat THPT thun 2025. Thun ini, dalam tinh Kien Giang hu labaih 15.000 anek saih tut angan pakacah tamat THPT, hu 30 labik pakacah. Dom bruk ramik caga blaoh blai, tani tanat, piah ka anek saih pakacah dalam siam mekre, njauk tui hukum ba tabiak.

Ong Y Thanh Hà Niê Kđăm, Uy vien Trung uong Ndang, Bi thu Tinh uy Lam Dong, Akaok Mban Pato tacei ngak bruk pagam jeng sa tinh Lam Dong, tinh Binh Thuan saong tinh Dak Nong ndom meyai lac, bruk dom jabat karja pakat xa ngak iek dahlau oh lac sa “takai yam ilamo” piah ngak randap haong bruk ngak bahrau, bo daok lac kein lagaih piah ka dom jabat, labik, bhum palei ngak salah blaoh bruk karja. Ini jeng lac “kadha pasang iek” ka prein ngak, pambuak di dom jabat, dom gah, urang pan akaok 124 xa, phuong, dac khu hu ba tame ngak bruk.

Meng harei 1 bilan 7 anak tal, tinh Dong Thap hu ba taong bih urang jakar, kong chuc meng akaok jabat tagok saong 70% urang jakar pho akaok jabat, chuyen vien ngak bruk di Pasak Chinh tri – Hanh chinh birau ngan haong labaih 609 urang;  dom urang daok veik ngak bruk di dom labik lac labaih 204 urang. Bi thu Tinh uy Dong Thap  Lê Quốc Phong caong khin dom pakat, dom gah, karja palei thau ka bruk ngak di drei saong cang khin di bhap bini ka bruk  cakrok patagok birau; caga blaoh tani tanat piah tame ngak bruk di karja dua pakat.

        Tinh uy Kon Tum bahrau padang Nyaom biai kuhria iek veik 6 bilan akaok thun ka bruk brei abih 2.740 baoh sang oh daok taik tahak dalam bhum. Tinh hu jak ba dom gah rik daong hu jaik 200 ty dong, dalam nan jak ba meng dom gah ngak pahla hu labaih 102 ty dong, daok Mentri Kong an hu 84 ty dong saong rahra rik daong hu jaik 50 ty dong gam haong labaih 182.000 harei buh prein ngak bruk. Bingun ini, UB Bhap bini tinh Kon Tum alin Harak pok meyaom ka 21 kapul saong 32 urang hu ngak jak jeng dalam bruk ngak danak dak pakacah brei oh daok baoh sang taik tahak dalam tinh

Pahadar 80 thun jayak bruk mesruh kol Nhat saong fat-xit, Trung Quoc peih ngak rilo bruk hu makna praong, gah chinh tri saong xa hoi biak dalam, hu rilo bhap bini pachreih tui. Dom bruk nan hu peih ngak tui adat pakat negar, hu peih ngak praong prang di Mblang bein Thien An Mon, ban ine Bac Kinh di harei 3/9 anak tal. Tui kuhria mboh dahlau, Tong Bi thu, Akok Quan uy Trung uong Trung Quoc Tập Cận Bình hu mbaok di var duyet binh saong bac kadha hu manak biak praong dalam.

Nga hu jak jeng dalam bruk salih 80% ilamo kong nghe di chau Au dalam gah xang menyek saong nang luong meng dom ilamo kong nghe dalam negar, jalan ngak anak tal lac mek hu tanut salih lac 100% dalam tukvak katut abih. Akaok mentri Nang luong Nga Sergei Tsivilev brei thau bruk ini daok dalam danak dak “chu quyen ilamo kong nghe” negar, dalam nan dom kapul praong di Nga hu jao brei bruk ngak patagok dom kong nghe salih./.

Dom mbang ribuk hu dut mboh dahlau meda ngak jhak tal Baoh taneh dalam dua harei, harei ini saong harei paguh 26/6. Bruk nan kayua hu labik huan di jalan hadah vin taom dar Ia harei ba tal. Dom urang ilamo kakei bhap bini tui iek khaw tin ka bruk langik di dom jabat gah dut iek langik saong brei hu jalan pacang caga ka prein yawa di drei, takik gaok ndap ndien tu tuk ribuk rah tabiak./.