Patui veik danak dak mbang nyaom kreh 2 mbang di Mbang nyaom ka 6, harei ini Ủy ban Thường vụ Quốc hội (TVQH) brei panuac tame rilo asal kadha hu makna. Dalam nan hu langyah, taduan panuac, rami ramik ngak pasiam danak dak hukum Căn cước. Harei 25/10 bahrau blaoh, tuk ginum biai di Hội trường ka danak dak Hukum Căn cước, urang Quốc hội rilo meng lac njauk gauk haong dom asal kadha di Hukum hu taduan panuac ngak pasiam, abih di nyu nan lac angan ieu di hukum saong dom khau tin njauk ngak, khau tin eng drei pabak. Di mbang nyaom harei ini, Ủy ban Quốc phòng saong An ninh di Quốc hội pathau khan bruk langyah, taduan panuac, ramik ngak pasiam saong likau panuac di Ủy ban TVQH. Tui nan, Dự thảo Hukum Căn cước hu ngak salah saong di Mbang nyaom ini, Ủy ban TVQH meda payua tagok Quốc hội pasang iek, brei tapa, khik kajap chất lượng saong mek hu bruk pachreih tui biak glaong.

Peih ngak danak dak “Klah rabha haong gru pato” kayua Hội Liên hiệp Thanh niên Việt Nam pakat negar pambuak haong Mintri Pato Megru, UB Bangsa saong Tập đoàn Thiên Long peih ngak, tal urak ini, Hội đồng pilih ruah hu ginum biai saong buh phiếu pilih ruah 58 gru pato piah pok meyaom di tuk pahadar harei Gru pato Việt Nam 20/11 anak tal. Dalam 58 gru pato hu pok meyaom thun ini, hu 19 gru pato lac urang bangsa takik. Jaik abih dom gru pato ini hu dang pato meng 10 thun tagok, dalam nan hu 11 urang dang pato meng 20-30 thun, 2 urang pato labaih 30 thun. Ini lac dom gru pato hu angan daok pato di dom xã kan kandah dalam bhum urang bangsa takik saong bhum ceik. 

Peih ngak danak dak bruk ngak negar, tukvak tapa tỉnh Gia Lai biak iek praong bruk peih ngak danak dak sangka iek glang dinh dưỡng tapa bruk ngak tapak di dom amaik matain, amaik raong anek dalam 1.000 harei camriep. Danak dak paglaong bruk pasiam veik dinh dưỡng uranaih, pasiam veik var mbang dalam sang bac, tui iek bruk dinh dưỡng, langyah ka dinh dưỡng lagaih saong paglaong bruk pahat rup, pacang caga bruk eik lipa, lavang lavaih…gam tui di nan jeng daong paglaong hatai sahaneng saong bruk ngak di dom urang tapa bruk paglaong bruk pathau khan khau tin, langyah sangka iek glang dinh dưỡng ka urang kumei matain, urang brei anek mom saong ranaih mala umo 16 thun.

Sở Ilamu, Thể thao saong Du lịch tỉnh Đắk Lắk bahrau brei thau bruk brei padang saong tabiak mbaok kalup kapul menyim khan bai di urang Ê Đê buôn Drai Hling, xã Hòa Xuân, ban Buôn Ma Thuột. Kalup kapul hu 12 urang lac urang kumei di 3 buôn dalam xã. Dom bruk ngak di kalup kapul hu daong khik ramik patagok dom yaom glaong meng kan di urang Ê Đê, bo daok hu daong dom urang dalam kapul patagok bruk ngak mbang piah patrun kathaot khang kajap. Kalup kapul hu peih tal pato bruk menyim khan bai Ê Đê brei ka  20 urang kumei dalam xã. Tỉnh Đắk Lắk hu alin hadiah brei kalup kapul dom pandap pabak ka bruk ngak, yau ye: mac jhik, mac vắt sổ, kik menyim, dom pandap ngak merai di urang Ê Đê...  

Bahrau ini, di dom bilai Biên phòng An Thạnh 3, Trung Bình saong Vĩnh Châu, Bol lin Biên phòng tỉnh Sóc Trăng hu peih bruk taom gaok pok mayaom dom urang angan je naih joi, patagok dom bruk ngak di Urang hu angan je di dalam bhum tapen negar. Tukvak tapa, urang jakar, urang hu angan je, dom kreih camin hadah krah dalam bhum mikva bangsa takik di bhum tapen negar pak tỉnh Sóc Trăng hu patagok siam lagaih dalam bruk pathau khan, jak ba mikva dom bangsa ngak njauk tui dom bruk pathau khan, jak ba mikva ngak njauk tui jalan ngak, sarak, hukum di Ndang saong Kanja, saong abih di nyu nan lac peih ngak siam sarak bangsa; halain hatain hu mbaok tame cak rok patagok kinh tế - xã hội, padang ngak dom danak dak pakacah gauk anit ranam taneh ia, dak padang talei jumpataom gauk dalam bangsa.

Hạ viện Mỹ bahrau brei tapa dự luật kadung jien karja di anak meta piah pacang bruk Rajaei liên bang kreik pabah mbang meneing. Harak văn kiện hu payua tagok Thượng viện saong mboh lac meda brei tapa kayua taduan hu bruk pachreih tui biak rilo di dom nghị sĩ Cộng hoà saong Dân chủ. Piah pacang cakak bruk kreik pabah mbang rajaei, dua viện Quốc hội Mỹ meda brei tapa dự luật saong Tổng thống Joe Biden hadei di nan mbaoh tangin brei tabiak dahlau di tuk pok jien daong urak ini ka dom jabat liên bang abih hạn di tuk kreh melam 17/11. Meyah dom nghị sĩ oh brei tapa dự luật kadung jien karja dahlau di tuk thun jien padai bahrau peih tabiak, dom jabat rajaei oh daok ngak bruk hu. Tal urak ini, Rajaei Mỹ hu blaoh labaih 20 mbang kreik pabah mbang saong hu dom mbang tok dui atah dalam 1 atau 2 harei.

Mintri Ngak bruk saong bruk ngak Hàn Quốc brei thau lac, rajaei negar ini meda pasang iek bruk patagok maong ngak bruk meng tanut 52 maong tagok 60 maong yaok adit dalam dom gah, yau ye y tế, sản xuất, padang ngak sang danaok,… Rajaei brei thau lac, bruk ramik veik yau nan meda daong ka urang ngak rami ramik lagaih tukvak ngak bruk saong padeih padai, gam tui di nan jeng daong patagok jien mek tame ka urang ngak hu hatai caong. Dahlau di nan, rajaei Hàn Quốc hu ba tabiak dom jalan ngak pasiam veik brei patagok tukvak ngak bruk yaok adit tagok 69 maong. Min, anak bruk brei panuac oh njauk hatai di gah cagar veik saong dom urang ngak ranaih umo kayua huac kanda oh lagaih di bruk ngak saong raiduk, rajaei hu mek gilac veik bruk ba tabiak.

Dom gah daong duah urang gaok bala di Ấn Độ daok kham merat daong ka  40 urang ngak gah padang ngak daok gar dalam lubang glut jaleih  di quận Uttarkashi, bang gah barak Uttarakhand. Labik glut jaleih ndaoh di pabah mbang lubang 270 mét saong daok dalam tuk padang ngak. Taong abih dom kham merat urak ini, lac ngak habar piah nao jaik labik 40 urang ngak daok gar gah likuk haluk patau atah labaih 55 mét. Hu thau, dom urang ngak daok gar nan, hu pabak brei pandap mbang saong không khí, saong hu ndom biai nao mai meng mac bộ đàm. Urak ini, oh ka hu urang halei njauk hagait dalam bruk glut jalei ini./.