Di tuk pahadar harei Gru jru Việt Nam (27/2), harei kabroi, akaok Quốc hội Vương Đình Huệ hu nao rivang saong ngak bruk haong Mintri Y tế. Lambaok ka urang pan akaok Ndang, Kanja, Quốc hội, akaok Quốc hội Vương Đình Huệ hu payua tal abih tih dom urang jakar, công chức, viên chức, bác sĩ, urang ngak dalam gah y te dom hatai anit ranam, biak thau dhar phol saong hu payua panuac tadhau ayuh siam makre abih di tuk Pahadar 69 thun harei Gru jru Việt Nam.

Brei panuac di Nyaom biai pataom iek veik bruk daong ka rahra mbang Tết thun sak ine girai 2024, taom mbaok akaok UB bhap bini phường, xã, ban sit thun 2024 kayua UBND TP.HCM peih tabiak di harei kabroi, UV Mintri Chính trị, Bí thư Thành ủy TP.HCM Nguyễn Văn Nên hu panuac ieu dom pakat, dom gah, dom puk palei brei pasang iek veik dom bruk, pilih ruah dom bruk ngak peih mbaok akaok thun ka nyu chreih chrai. Tuk Tết meng blaoh, TP.HCM hu buh tabiak jaik 1.300 tỷ đồng meng kadung jien karja saong jien ieu pataom dalam rahra, tagok jaik 5,3%, piah daong ka labaih 1,4 triệu menuac mbang Tết, rilo jang jaik 116.000 mbang duk haong Tết thun blaoh.

Palei tasik puk Lăng di xã Tân Phước, huyện Gò Công Đông, tỉnh Tiền Giang dalam dom harei ini biak chreih chrai tuk mboh dom sruh gilai tabiak tasik taong mek ikan atah harei akaok thun di tasik. Gam haong palei tasik Tân Long di ban Mỹ Tho, palei tasik di puk Lăng lac sa dalam dua palei tasik di tỉnh Tiền Giang hu kapul gilai taong mek ikan atah tasik di thềm lục địa gah maraong negar, bhum tasik Trường Sa, Hoàng Sa di negar. Tui Sở Ngak nong saong patagok palei pala tỉnh Tiền Giang, abih tih dom sruh gilai ikan dalam tinh urak ini lac 1.275 sruh gilai ngan haong 9.140 urang ngak, abih tih dom sruh gilai ikan jeng hu caik pandap pasang iek jalan nao.

UBND huyện Ia H’Drai bahrau peih bruk brei thau Harak di UBND tỉnh Kon Tum brei angan xã Ia Đal mek hu chuẩn palei pala bahrau thun 2023. Ini lac xã tapen negar ka 7 dalam abih tih 13 xã biên giới di tỉnh Kon Tum mek hu angan palei pala bahrau.. Hu padang tagok dahlau ini 11 thun, xã Ia Đal, huyện Ia H’Drai, tỉnh Kon Tum hu jalan tapen negar atah labaih 47 km haong taneh ia Campuchia. Tal urak ini, dalam tỉnh Kon Tum hu 48 dalam abih tih 85 xã mek hu chuẩn palei pala bahrau, dalam nan hu 4 xã mek hu chuẩn palei pala bahrau paglaong saong 1 xã mek hu chuẩn palei pala bahrau kiểu mẫu.

Ủy ban bhap bini xã Cư Êwi, huyện Cư Kuin, tỉnh Đắk Lắk bahrau peih Harei pataom ilamo bhap bini Việt Bắc mbang ka 8. Ini lac bruk ilamo siam gheih di mikva dom bangsa gah barak daok di huyện Cư Kuin saong Krông Pắc, dui pachreih hu rilo mikva saong tuai damuai dalam dom harei akaok thun bahrau. Dalam 3 harei, harei pataom hu rilo bruk ngak ilamo, daoh tamia yau ye daoh then, capi tính di bangsa Tày; daoh lượn hà lều di bangsa Nùng; Sình ca di bangsa Cao Lan; danak dak parang ma-in ragu ragam bangsa yau sáo mông, sáo trúc, đàn T'Rưng, đàn đá, kong chieng, dom kadha ma-in meng kan yau ye tung còn, jhul gei, katung kéo co, nduac cà kheo; pakacah gauk ngak pandap mbang…

Liên minh châu Âu bahrau tabiak panuac khan lac brei peih bruk duah thau ngan saong TikTok piah duah iek ứng dụng ini meda ngak suan bruk khik caga uraniah angaok labik online halei oh. Liên minh châu Âu meda iek tui Hukum Dịch vụ Kỹ thuật số (DSA) hu Khối ini brei tapa di thun blaoh piah ngak brei cambaih laih dom bruk ngak suan (meyah hu) di TikTok dalam bruk khik caga uraniah yau dom adat ka  tukvak pandar, bruk duah thau cambaih umo thun, bruk cài đặt quyền riêng tư mặc định atau bruk pandar nyu ba tal njin. 

Kapul doanh nghiệp Mỹ - Ấn Độ di Jabat Pablei salih Hoa Kỳ hu tabiak panuac brei thau lac padang Kapul Đặc nhiệm AI piah jhul khang bruk cak rok patagok saong njauk gauk dalam bruk khik ramik di Mỹ saong Ấn Độ dalam gah trí tuệ nhân tạo (AI). Kapul Đặc nhiệm AI hu bruk ngak lac jhul khang dom asal kadha saong adat ngak bruk di AI, ba kein lagaih ka dom gah hu mbaok tame yau ye jhul khang bruk cak rok patagok saong pablei salih di dom gah công nghệ AI ka bruk cak rok patagok kinh te saong bruk salih bahrau dalam rahra di dua taneh ia saong di dunya.

Trung Quốc bahrau khan lac brei peih sa bruk duah thau tài nguyên dữ liệu dalam negar. Dak padang “Trung Quốc kỹ thuật số” hu maong lac prein khang praong piah hiện đại hóa taneh ia dalam saman kỷ nguyên số, saong ngak jeng kein lagaih meriak gauk bahrau di taneh ia ini. Bruk duah thau nan, piah peih bruk “Ramik ngak abih janih piah padang Trung Quốc kỹ thuật số”. Tui dom urang ilamo Trung Quốc, tài nguyên dữ liệu urak ini daok jeng tài nguyên praong saong prein khang hu yaom biak praong ka bruk patagok kinh tế di taneh ia ini./.