Page ini 10/10/2024, Pahadar pakat negar 70 thun Harei peih paha Thu do (10/10/1954 - 10/10/2024) peih ngak dalam praong prang di Pasak Nyaom biai pakat negar ( Ha Noi) . Puac harak di var pahadar, Tổng Bí thư, Akok negar Tô Lâm mboh lac, 70 thun tapa dalam bruk ngak cách mạng hadah hadai di Đảng di bangsa hu bruk tacei ba Wa Ho praong uranam naih joi, di Trung uong Đảng saong Rajaei, Ban ine Ha Noi tuk halei jeng hu bruk ngak labaik dang biak iek praong, pambuak pagam haong dom bruk ngak hadah mbaok meta, njauk pok meyaom. Gam haong bruk caong khin, tukvak anak tal Ban raya  patui pataom tame  dom jalan peih ngak, peih lahei pachreih dom prein khang, abih di nyu lac prein di bhap bini, gam haong  prein khang di bangsa haong prein di samar birau padang ngak Ban ine Ha Noi njauk haong angan pasak chinh tri - hanh chinh pakat negar, baoh hatai di taneh ia.

Danak dak Mblang Kapal ahaok Dunya Long Thành bahrau hu Mentri Jalan mbak – Pajeng ba pathau khan tal Rajaei brei kadun tukvak salah dalam thun 2026. Langyah ka bruk brei salih tukvak ngak mbang ka 1 di danak dak tal thun 2026 bo oh njauk dalam thun 2025, Mentri Jalan mbak – Pajeng ba brei thau, kayua bruk buh jien padang jalan pan saong trun di kapal ahaok ka 3 labaih 24 bilan, hadei tuk hu pakat iek tapa brei salih bruk buh jien padang, dalam nan tukvak srap gap labaih 12 bilan saong tukvak padang ngak labaih 12 bilan. Yau nan ye, bruk hu Karja brei tapa bruk buh jien dalam mbang nyaom biai puac thun 2024, danak dak hu salah jalan pan saong trun di kapal ahaok ka 3 dalam puac thun 2026.

Bruk glut jaleih ar kraong di tỉnh Bến Tre daok rah tabiak sraw kadau, abih di nyu lac di bilan hajan ribuk, ia ndik tagok glong. Dalam vaktu meng thun 2015 -2024, Bến Tre hu labaih 102 labik glut jaleih ar kraong, atah labaih 83 km. Ta-eng dalam 9 bilan tapa, rah tabiak 12 bruk glut jaleih ar kraong, ngak jhak tal 400m jalan mbak, ar pacang; 12 baoh sang daok; ngak dauk labaih 3 heta phun mbang baoh. Mneg thun 2021 mbiah tal ini, UB bhap bini tỉnh Bến Tre hu ba tabiak 3 bruk praong samar chip ka bruk glut jaleih taneh ar ribong kraong, tapen tasik. Ta-eng kaoh pulao Phú Đa (xã Vĩnh Bình, huyện Chợ Lách) jaleih veik yaok thun, yau nan ye bruk ramik pasiam biak trak damak, khat lahik rilo jien ndo.

Sở Ngak nong saong Patagok palei pala tinh Dong Nai bahrau salah blaoh bruk pasang iek ka bruk ngak tui adat hukum dalam bruk pasang iek, pandar taneh riya, bruk mbaoh tangin, ngak, kaoh harak pambuak bruk haong Mban Pasang iek glai pacang caga Xuân Lộc. Tapa pasang iek, jabat chuc nang hu mboh yaok pluh baoh sang rahra taduan bruk pandar taneh glai min oh ngak njauk tui harak pambuak bruk. Rilo bruk ngak tui hatai sahneng, eng padang oh likau pakat angaok, eng peih praong atau pasiam veik sang danaok, slih thaik thaot sang danaok.

UBND huyen Giồng Riềng, tỉnh Kiên Giang brei thau, hajan praong gam hangin khang di biar harei 9/10 ngak jaleih abih 23 baoh sang, par tabung 29 baoh sang saong ngak rilo urang njauk rambuac, dalam nan hu rilo urang brei ba tagok sang iek rauk angaok jru ruak. Kuhria khat labik abih 3 tỷ đồng. Urak ini dom jabat, dom gah daok daong rivang baoh sang hu samar tani tanat raidiuk. Makna praong abih lac brei kuhria labik daok ka mikva, kham merat oh brei thei kurang pandap mbang atau oh hu labik daok.

Harei ini (10/10), dom ndang di Japon hu yam tame bruk tranh cử piah srap gap ka bruk pilih ruah Hạ viện mbang ka 50 di taneh ia ini, kuhria rah tabiak dalam harei 27/10 anak tal. Dahlau daih meng bier harei mesup kabroi 9/10, Thu tuong bahrau di Japon hu pathau khan brei tayah Hạ viện saong abih tih dom hạ nghị sỹ saong lambaok dom ndang di Japon hadei nan camereip yam tame jalan samar drah di bruk jak ba tranh cử.

Harak Times Higher Education di Anh birau khan brei thau labik dang angan đại học dunya thun 2025. Tui nan, sa metah dom sang bac đại học dang akok di Australia trun labik dang di dunya. Dalam nan đại học Melbourne, sang bac đại học hu dang di labik glong abih saong tok ta-eng dang di 50 dunya di Australia, trun dang 2 mbang kuhria meng labik dang 37 trun dang di dhi 39. Dom urang ilamo kakei lac bruk pasang palih ruah anek saih dunya meda ngak jhak tal labik dang angan di dom sang bac Australia./.

Sa kapal ahaok di hãng kapal ahaok Turkish Airlines meng Mỹ pan tal Thổ Nhĩ Kỳ hu brei pan trun samar drah di New York meng harei kabroi 9/10 hadei tuk phi công metai katuak dalam mbang pan. Hadei di tuk phi công oh daok thau drei jar, dom urang dalam nan daong ka phi công tuk nan blaoh brei ka kapal ahaok pan trun samar drah. Min, phi công metai dahlau di tuk kapal ahaok pan trun. Tuai damuai dalam kapal ahaok hadei di nan jeng hu pajeng nao tal Istanbul meng New York.