Dalam dua harei 24 saong 25/2 anak tal, di Palei Ilamo, Du lịch dom bangsa Việt Nam meda peih tabiak Harei pataom “Sắc Xuân di grauk labik dalam negar” ngan haong rilo bruk ngak ndung bak ilamo dom bangsa. Harei pataom tui kuhria hu labaih 200 urang hu mbaok tame, lac dom urang lambaok ka 28 bangsa, di 16 tinh, ban, gam tui di nan jeng jak ba dom bangsa Tày, tỉnh Cao Bằng, bangsa B’ru Vân Kiều, tỉnh Quảng Bình, bangsa Kinh, tỉnh Thanh Hóa saong bangsa Cam Bà-la-môn, tỉnh Ninh Thuận. Thun ini, 3 rija hu ngak veik di Harei pataom lac adat Trỉa padai di urang B’ru Vân Kiều, Rija roya Nàng Hai di urang Tày saong Rija tamia akaok thun – Rija Nagar di bangsa Cam.

Tỉnh Bình Phước hu maong lac "pasak asar pa-ok blait" di Việt Nam, hu rilo menuac thau tal kayua taneh bhong bazan biak siam di bhum Đông Nam Bộ daong ka phun pa-ok blait tamuh biak siam, asar pahe bingi. Di huyện tapen negar Bù Gia Mập, labik hu taneh pala phun pa-ok blait praong di tỉnh Bình Phước daok chreih chrai bruk duan mek asar pa-ok blait di rilo bein. Rilo menuac pataom gauk duan mek haong rilo sap ndom klao bui sambai yau brei mboh bruk chreih chrai di akaok thun bahrau pambak tabiak bruk ngak mbang akaok thun. Tỉnh Bình Phước urak ini hu labaih 152.000 ha taneh pala pa-ok blait, meblah jaik meteh dom taneh pala pa-ok blait dalam taneh ia, ngan haong labaih 1.400 labik ngak asar pa-ok blait saong ba bruk hit ngak mbang gam gam brei ka labaih 50.000 urang ngak dalam palei saong langiu tỉnh. 

Dah page ini, Sở Ngak nong saong patagok palei pala tỉnh An Giang pambuak haong UBND huyện Chợ Mới peih Harei pathau khan bruk pablei tabiak negar langiu pa-aok asal lapih camriep tapa darak pasa Hàn Quốc saong pambuak gauk ngak, duah jalan pablei tabiak pa-aok tui jalan chuỗi giá trị. Dom pa-aok pablei mbang ini lac 13 tấn pa-aok asal lapih. Huyện Chợ Mới hu mblang taneh pala pa-aok praong abih di tỉnh An Giang, ngan haong labaih 6.400ha. Dalam nan, mblang taneh pala pa-aok tui tanut chuan VietGAP lac labaih 700ha. Huyện pabak ka 41 mã số bhum pala di mangaok pa-aok tượng kalik hijao, pablei tapa dom darak pasa, yau ye Trung Quốc, Mỹ, Hàn Quốc, Nhật Bản, Úc…

Jaik ini, dom radaih nao mai tapa tatua Rạch Miễu harei dak rilo, ba tal tapa prein di tatua. Tui panuac khan di Cty TNHH BOT tatua Rạch Miễu, kuhria rah tapa yaok harei malam, hu jaik 23.000 mbang radaih ô tô dom janih nao tapa tatua ini. Tui panuac di dom gah chức năng, anak tal, dom radaih meng dom tỉnh yau: Trà Vinh, Vĩnh Long, Sóc Trăng, Bến Tre nao mai tapa tatua Rạch Miễu tagok rilo jang. Jalan ngak siam di abih lac brei jhul samar bruk padang ngak tatua Rạch Miễu 2, samar ngak salah saong ba tame pandar piah parabha prein haong tatua Rạch Miễu urak ini daok tapa prein biak khang. 

Dah page in, rilo sruh radaih oto, radaih mac nduac sit sit tapa tatua Sài Gòn kayua radaih container ginuh tame jalan phân cách. Khau tin camriep brei thau lac, tuk maong 5 dah page, saai Nguyễn Hữu Lợi, ndih tapui thun 1980, daok di huyện Hóc Môn, TP.HCM peih radaih o to akaok katung hu biển số 50H-172.03 dui tui rơ móc nduac di tatua Sài Gòn gah meng ban Thủ Đức mai quận Bình Thạnh ye ginuh tame dải phân cách di labik ka 7. Bala oh ngak urang halei njauk hagait, min ba tal bruk gar radaih di labik jalan Võ Nguyên Giáp meng tatua Cát Lái tal tatua Sài Gòn. Ô tô, radaih mac pablak gauk, nduac sit sit tapa tatua. 

Gah chức năng Thái Lan ba tabiak harak brei mboh lac, 2 thun tapa, menuac sia taneh ia ini trun labaih 35.000 menuac. Meyah bruk ini daok rah tabiak veik, Thái Lan meda trun meteh dom menuac sia dalam 50 thun tal. Rajaei Thái Lan daok pataom prein pacang bruk taha nao di menuac sia. Bruk ini meda ba tal rilo kan kandah gah kinh tế - xã hội di Thái Lan yau ye: trun bruk cakrok, kurang, takik kadung jien karjat, patagok yaom jien iek ruak, an sinh xã hội… Tui dom urang ilamu, hu biak rilo makna ba tal bruk takik ndih tapui anek di Thái Lan.  

Mintri Jalan mbak pajeng ba Singapore harei ini brei thau lac negar ini daok kuhria ba tabiak bruk ngak lac ieu abih dom mbang par tabiak meng Singapore njauk pandar nhien lieu gah kapar haok khang kajap (SAF) meng thun 2026. Ini hu maong lac sa bruk kham marat di gah kapar haok dunya piah dak harei dak salih tapa nhien lieu hijao. Nhien lieu kapar haok khang kajap urak ini meblah 0,2% di darak pasa nhien lieu kapar haok. Rilo urang roh duah ilamo gah kapar haok caong lac, paka ini meda tagok jang 65% di thun 2050 yau sa bruk ngak dalam jalan ba tabiak piah mek hu tanut tathuak nerak alam trun meng zero di tukvak nan. Min, bruk ini meda abih rilo phun jien, tui kuhria lac meng 1,45 tal 3,2 ribau tỷ USD. 

Mesup ini, Jabat Khí tượng negar Trung Quốc brei ba tabiak sa mbang blaoh 4 kadha brei thau ka bruk langik tasik oh siam, nhiệt độ trun khang, ngin praong, rabuk cuak saong ia kakua meda hu mboh di dom bhum taneh biak praong, ngak kan kandah jalan mai veik ngak bruk hadei di mbang padeih Tết di rahra taneh ia ini. Tui kuhria mboh dahlau di jabat ini, nhiệt độ meda trun khang di jaik abih dom labik dalam taneh ia Trung Quốc, haong tanut trun meng 8-12℃. Hu dom labik di tỉnh Hồ Bắc saong Hồ Nam, bhum kreh negar taneh ia ini, nhiệt độ meda trun tal 20℃ atau trun biar jang./.