Akaok Ủy ban Bangsa Hầu A Lềnh brei thau Harei pok mayaom anek saih, sinh viên, dam dara bangsa takik naih joi, angan je di thun 2023 kayua Ủy ban bangsa dang akaok, pambuak haong Mintri Pato magru, Kapul Dam dara Cộng sản Hồ Chí Minh pakat negar peih ngak bahrau ini, brei mboh sa pilih thun pambuak gam haong bruk bac taa di anek saih bhum ceik glaong, ngak jeng prein pambak tabiak, pachreih ba dom adei anek saih bangsa takik di mangaok jalan padang mbang ngui. Thun ini, bruk pilih ruah dom adei tame ĐH hu meng 28 điểm tagok tui tổ hợp 3 môn, oh kuhria gam điểm ưu tiên; dom adei hu prein bac mbaih, bac naih joi, hạnh kiểm siam dalam 3 thun bac THPT. Dom adei hu Pok mayaom thun ini naih joi di rilo gah, hu rilo bruk ngak gheih, njauk caik hatai.

Sở Ilamu saong Thể thao TP.HCM pambuak haong dom gah bahrau peih bruk pataom iek veik saong jao giải Bruk jak ba paneh kadha saong yaih khan kadha daoh hu asal Anit ranam taneh ia hu angan ieu lac “TP.HCM hatai jia hadah tanyak”. Ini lac bruk ngak piah pahadar 75 thun harei Chủ tịch Hồ Chí Minh tabiak panuac ieu Pakacah gauk anit ranam taneh ia (11/6/1948 - 11/6/2023). mBan peih bruk jak ba hu jao giải ka 7 kadha. Dalam nan 3 kadha mek hu giải Khuyến khích, yaok kadha taduan hu jien thưởng 10 triệu đồng; 2 kadha mek hu giải 3, taduan hu 20 triệu đồng yaok kadha, 1 kadha giải Nhì hu meyaom 30 triệu đồng. Giải Nhất lac kadha "Ban raya – Kadha daoh pakacah" di rapaneh Trần Công Nghị hu meyaom 40 triệu đồng.

Di tỉnh Đắk Lắk, tapa 3 thun, peih ngak danak dak “Jhul khang bruk pathau khan pacang caga kol toi pham ma tuy di bhum mikva bangsa takik saong bhum ceik” tui Sarak ka 677 di Ủy ban Bangsa, kein lagaih di bruk pathau khan pacang caga ma tuy hu patagok. Min, kol toi pham ma tuy dak harei dak ngak bruk kan thau dahlau saong kanjak jhak, njom tame biak catang di dom puk palei. Kayua yau nan ye, bruk pathau khan, jak ba piah ka mikva paglaong bruk caik hatai, mesuh metak haong kol tội phạm ka ma túy jeng njauk caik hatai paglaong saong hu jalan ngak lagaih. Dalam nan, njauk caga dahlau bruk pachreih tui di urang taha palei, akaok puk palei, urang hu angan je saong dom halau janeng piah pathau khan ka mikva di dom jalan ngak di kol tội phạm ma túy.

Thun ini, TP. Hồ Chí Minh saong tỉnh Bến Tre hu rilo labik dui pachreih urang buh jien tame ngak du lịch, dalam nan, Bến Tre hu rilo danak dak lagaih haong jalan ngak di dom doanh nghiệp, meng bruk pasiam gah hạ tầng, jalan mbak dom labik nao tal saong dom bruk pambuak pagam tal hu ngak salah blaoh.… Danak dak pambuak bruk Du lịch di Bến Tre haong TP. Hồ Chí Minh hu ba mbuan lagaih ka bruk cakrok du lịch di bhum jeng yau di dom labik. Bruk pambuak gauk nan hu ba mai rilo hadah hadai ka du lịch palei la-u. Thun 2023, dom bilik brei ka tuai daok veik hu bak abih tal 80%, abih tih tuai tui kuhria hu labaih 2,2 triệu mbang urang, tagok 72% duk haong tukvak ini thun blaoh. 

Ngan haong yaom padai brah tagok khang rilo mbang, dalam tuk hadang jeng daok yaom biak bier dalam tukvak suai lavik, rilo urang nong daok di bhum tapen tasik pak ĐBSCL ba gauk klak bruk raong hadang salih tapa pala padai, ngak ka mblang taneh pala padai tagok khang. Dalam tuk nan, oh takik doanh nghiệp pablei brah tabiak negar langiu hu kakei ka bruk tut angan tame harak pambuak gauk pablei padai that caga rilo bala. Mayah yaom padai brah dalam vụ đông xuân oh mboh trun yau bruk kuhria di dom doanh nghiệp ini, meda patui veik tagok, dom harak pambuak gauk pablei padai that meda khat lahik, meda lac doanh nghiệp meda oh hu pandap brah piah jao ka gah pambuak, ngak lahik hatai jia tame gauk ngan haong angan je di brah Việt Nam.

Tổng thư ký Liên hợp quốc Antonio Guterres hu payua harak brei panuac salam uan thun bahrau 2024, dalam nan ieu padang hatai jia saong hatai caong siam mekre. Ong Guterres hu ndom tal bruk taong paoh, mesruh gauk, biến đổi khí hậu, kan kathaot eik lipa saong kinh tế kan kandah. Ong ieu dunya pambuak gauk piah duah tabiak jalan ngak. Tổng thư ký Liên hợp quốc ndom lac: Thun 2024 kol drei brei ba gauk yam tapa dom neh rabha gauk piah duah tabiak jalan ngak haong gauk kayua khí hậu. Kol drei njauk dang tgaok mesruh veik haong bruk neh rabha saong pamaoh gauk, brei khik ka dom công nghệ bahrau yau ye trí tuệ nhân tạo lac prein khang piah cakrok. Liên Hợp Quốc daok hu panuac ieu dunya brei ngak ka sron mbon hòa bình, cakrok khang kajap saong quyền anek menuac.

Harei pataom limen Chitwan dane angan uan raok thun bahrau daok hu peih tabiak di ban du lịch Sauraha, Nepal, dui pachreih hu rilo tuai damuai meng grauk labik di dunya. Dom drei limen rik tame biak rilo ka gah du lịch di ban Sauraha, Nepal. Dom bruk ngak praong di harei pataom lamen hu mbang nao dã ngoại gam haong limen, mbang pakacah limen gheih, parang iek ilamo meng kan di bhum palei, pandap mbang pak ini. Dalam nan, mbang pakacah limen gheih taduan hu bruk caik hatai di tuai damuai. Dom drei limen hu ngak gheih meng dom bingu hu cih di akaok saong rup limen. Harei pataom limen jeng hu khan brei thau jalan taong ruak ka limen, brei mboh bruk pambuak gauk, kak kajap di rahra pak ini haong dom drei limen. 

Yaok thun, tuk Noel saong tame thun bahrau, tỉnh Chumbivilcas, Peru hu peih ngak sa bruk biak chreih chrai hu angan ieu lac Takanakuy. Bhap bini dalam bhum meng taha tal meda jeng oh huac atah dhua, ba gauk tal sa mblang taneh praong atau sa sân vận động piah tui iek dom mbang pakacah taong gauk di likei saong di kumei di ginup umo thun. Tui adat cambat di pak ini, bruk taong gauk dalam harei pataom oh jhak hagait tal prein yava di urang me-in, bo tok lac piah tathuak tabiak abih dom pandik hatai pataom veik dalam thun klak, piah yam tame thun bharau dalam bui sambai, chreih chrai. Menuac sia daok pak ini maong iek Takanakuy yau sa bruk ngak oh kurang hu dalam dom harei caga taduan raok thun bahrau./.