Hội đồng Đội pakat negar haong dom gah daong brei, bahrau jao paok daong suai lavik ka 371 uranaih matui kayua jit COVID-19, uranaih gaok kan kandah di dalam dom tỉnh Đồng Nai, Bình Dương saong Ban raya Hồ Chí Minh, tui yaom jien abih tih lac 8,9 tỷ đồng. Dalam nan yaok adei hu taduan paok daong lac 24 triệu đồng sa thun (2 triệu đồng yaok bilan). Taphia di nan, dom adei daok taduan hu sa paok pandap Tết, hu sa gu ahar tapei nung, tapei lik, sa kadung ia tasau saong jien mbaok lac 1,5 triệu đồng. Dalam 3 thun tapa, Hội đồng Đội pakat negar pambuak haong dom gah daong piah sangka, peih bruk daong suai lavik ka 816 uranaih matui kayua  jit praong COVID-19.

Bộ Chỉ huy Bộ đội biên phòng tỉnh Sóc Trăng pambuak bruk haong UBND ban sit Vĩnh Châu, Hội chữ thập đỏ tỉnh Sóc Trăng bahrau peih danak dak “Xuân Biên phòng bui hatain menuac palei” Tết Giáp Thìn thun 2024. Dalam danak dak, Bộ đội biên phòng Sóc Trăng hu alin hadiah 3 baoh sang ka anek saih kan kathaot takre bac ta-a, brei 20 pok jien bac dalam danak dak “Pok takai adei tal sang bac”; alin hadiah 350 pok pandap ka sang sarak karja, sang kan kathaot, iek ruak, brei jru ka urang kan kathaot, peih “Labik pablei pandap 0 đồng” haong dom janih pandap yau : brah, pandap mbang, khan ao, pandap bac ta-a…

Tết Nguyên đán thun ini, dom doanh nghiệp di TP.HCM caga pandap Tết yaom labaih 20.000 tỷ đồng, dalam nan doanh nghiệp buh tabiak 8.000 tỷ đồng ka pandap tani tanat yaom kaom di darak pasa. Dom doanh nghiệp hu tut angan pambuak bruk haong dom labik ngak tabiak, doanh nghiệp di 50 tinh, ban piah caga pandap ka Tết. Dahlau di nan, Sở Công thương ban raya hu peih nyaom biai pambuak bruk cung cầu tapa danak dak pambuak bhum, ngak jeng chuỗi pabak pandap tani tanat, rilo janih.

Dom po bein di tỉnh Tiền Giang daok kham merat iek glang bein phun, abih di nyu lac gah pruh ia, pacang caga halak halin palai kaik piah hu baoh siam pablei Tết.. Rilo janih phun mbang baoh, po bein brei ngak dom jalan langyah yau truac gom, cakak ia, pruh jru ka phun tabiak baoh saong paik pablei tuk Tết yau ye: pa-ok, thanh long, manaih, vú sữa… haong taneh praong labaih 7.000 ha. Tui panuac khan di dom po bein, baoh kayau pablei tuk Tết dom thun dahlau hu yaom jang tuk oh ka Tết meng 10-20%, abih di nyu lac dom janih baoh kayau piah parang dalam salao 5 janih baoh.

Akaok UBND tỉnh Cà Mau bahrau hu harak jao ka Akaok UBND dom huyện U Minh, Trần Văn Thời, Phú Tân, Năm Căn, Ngọc Hiển, Đầm Dơi pambuak bruk khang kajap haong dom sở dom gah pambuak tal peih pasang iek bruk padang ngak sang danaok suan adat hukum di taneh glai; pasang iek bruk padang ngak palei pala bahrau, quy hoạch hạ tầng ilamo cak rok patagok kinh tế - xã hội (dalam nan hu quy hoạch sang danaok) piah langyah tui thẩm quyền atau roh duah, likau pabak thẩm quyền jalan langyah tui njauk adat hukum, lagaih haong bruk cak rok patagok kinh tế - xã hội di puk palei. Mayah labiki halei caik rahtabiak bruk padang ngak sang danaok suan adat hukum di taneh glai, urang dang akaok kapul khik iek glai njauk taduan bruk ngak di drei haong pakat glaong.

Melam blaoh, tui mon Việt Nam, amuk patao Đan Mạch Margrethe II mbaoh tangin tabiak panuac lac padeih ngak patao. Anek likei kacua di amuk patao Margrethe II, Thái tử Frederik tagok rai, jeng patao Frederik X. Dahlau di nan, di harei akaok thun 2024, amuk patao Margrethe II tabiak panuac lac padeih ngak hadei di 52 thun ngak patao, jeng patao camereip abih hadei di jaik 900 thun di taneh ia ini halan hatain padeih ngak patao.

Sa bruk jaleih mỏ ameh bahrau rahtabiak di bhum Simiyu, gah barak Tanzania ngak ka 22 urang metai. Urang jakar brei thau, ini lac mỏ ameh sit saong daok ngak bruk suan adat hukum. Makna tuk camriep hu brei thau lac kayua hajan khang rilo harei di labik ini. Tanzania lac taneh ia ngak ameh dang ka pak di châu Phi. Rajaei ini hu ngak bruk dalam rilo thun piah pasiam veik bruk salamat ka dom urang ngak pak mỏ labik sit min bruk ngak suan adat hukum jeng daok bhian rahtabiak.  

Dom urang roh duah di Mỹ hu panuac khan ka bruk tagok rilo dom mbang njauk ruak CWD di athur glai di grauk Bắc Mỹ. CWD, daok ieu lac “ruak hưu zombie", lac sa janih ruak ngak brei srau kadau bruk glo akaok cakrok, oh taong ruak hu saong oh ka hu vaccine pacang caga, meda ngak brei metai. Ruak hu mboh di dom drei hươu, rasa di gah Brak taneh ia  Mỹ, Canada, Na Uy saong Hàn Quốc. Tiến sĩ Cory Anderson, sa urang roh duah ka CWD di Đại học Minnesota khan lac, ruak ini "tuk halei jeng ba tal matai, oh taong ruak hu saong mbuan njaom mbak"./.