Langik pandiak, thu lagu, njom ia mbak daok rahtabiak di dom tỉnh Nam Bộ, ngak kan kandah tapak tal bruk ngak nong, pala drak saong raidiuk di rahra. Piah patakik dom khat lahik ka bruk ngak saong ka rahra, Thủ tướng Rajaei hu sarak ieu kakei dom mintri, dom bhum palei pak ĐBSCL pataom prein tame pacang caga haong mbang njom ia mbak. Dalam nan, biak caik hatai peih ngak dom jalan langyah lagaih haong bruk daok rah tabiak di labik piah khik ia taba pabak ka bruk ngak nong saong ia pandar di rahra. Mintri Ngak nong saong patagok palei pala caga dahlau bruk pato tacei dom bhum palei pacang caga bruk kurang ia, njom ia mbak ka nyu lagaih haong bruk di anak mata di yaok bhum, patakik dom kan kandah tal bruk ngak nong.

Ia daok tagaok glaong di rilo labik dalam tỉnh Tiền Giang, di ban Mỹ Tho mesup ini ia tagok tapa tanut báo động 3. Njauk caik hatai lac ia tagok glaong ini hu độ mbak biak glaong; ia di kraong Tiền dalam ban Mỹ Tho njaom mbak jaik 6 gam/lít, di labik gah mala kraong Tiền mbak daok glaong jang. Urak ini dom cống di huyện Chợ Gạo, ban Mỹ Tho, huyện Châu Thành, Cai Lậy daok brei pacang sre piah pacang ia tagaok saong pacang ia mbak tagok glaong, patakik khat lahik kayua bala meng langik tasik.

Mbao Tuổi Trẻ pambuak haong Mintri Pato magru, Sang bac Đại học Cần Thơ bahrau peih Harei pataom langyah pilih ruah – pato tacei bruk ngak thun 2024. Harei pataom ini hu labaih 150 labik langyah di jaik 100 labik pato magru đại học, cao đẳng, trung cấp, pasak pato bruk ngak dalam saong langiu taneh ia, ba mai ka anek saih dom jalan sahaneng lagaih, siam makre di gah sang bac. Harei pataom lac harei piah ka dom anek saih thau veik rilo khau tin siam gheih, ngak njauk ka bruk pilih ruah bruk ngak lagaih haong drei, pabak hu hatai caong di xã hội, di bhum palei, daong ka Cần Thơ saong dalam bhum patagok, mbeik drei yam tame bhum taneh saong dunya.

Mesup ini di ban Sóc Trăng, Bộ chỉ huy Bộ đội Biên phòng tỉnh Sóc Trăng peih bruk pathau khan Hukum Biên phòng Việt Nam saong quyền ngak po tasik, pulao ka labaih 1.000 anek saih dalam tỉnh. Dom adei hu khan brei thau dom asal kadha praong di Hukum Biên phòng Việt Nam saong quyền ngak po tasik, pulao Việt Nam; jalan pandar app Hukum Biên phòng Việt Nam. Tapa nan, daong pabak ilamu, paglaong jalan sahneng saong bruk njauk ngak di dam dara, rai ranaih dalam bruk hu mbaok tame khik caga quyền ngak po taneh ia, sron mbon jalan tapen negar, tasik, pulao di taneh ia. 

Jaik 10.000 baoh sang tái định cư meda hu Pasak khik ramik sang danaok saong taong yaom padang ngak ban raya Hồ Chí Minh taduan mek saong ba tame pandar. UBND ban raya jeng hu pato tacei dom kapul ba jalan ka bruk salih meng sang tái định cư tapa sang danaok pablei salih, brei thau quyen ngak po drap ar piah to yaom. Bruk njauk caik hatai mbang to yaom ini lac hu 3.790 baoh sang chung cư di labik đô thị bahrau Thủ Thiêm. Ini lac dom baoh sang hu padang ngak meng lavik mai ngan haong biak rilo baoh sang di labik hu yaom glaong, min dalam tukvak suai lavik jeng ka oh hu manuac daok.       

Bruk jao Giải thưởng Điện ảnh châu Á mbang ka 17 bahrau hu peih tabiak ngak di Hồng Kông, Trung Quốc. Đạo diễn Trung Quốc Trương Nghệ Mưu mek hu giải “Jak jeng luac rai”, lac giải thưởng praong glaong abih dalam thun ini. Ong Trương Nghệ Mưu lac sa đạo diễn, urang ngak phim, nhà văn, diễn viên, quay phim,... di Trung Quốc. Hu maong lac urang hu angan je abih dalam dom urang ngak phim rai ka 5 di taneh ia ini, mek hu rilo giải thưởng praong hu angan je dalam taneh ia saong mangaok dunya. Giải thưởng Điện ảnh châu Á hu padang tagaok di thun 2007. 

Hajan khang rilo harei hu ba tal ia sua saong glut jaleih taneh pak tỉnh Tây Sumatra - Indonesia ngak ka takik di nyu  19 urang metai saong 7 urang lahik, labaih 70.000 urang njauk panduan ba nao daok di labik salamat. Kapul daong duah urang njauk bala ngan haong labaih 150 urang mai hu mbaok kham marat duah dom urang lahik, min bruk daong duah urang njauk bala gaok rilo kan kandah kayua jalan mbak oh nao mai hu hadei di dom mbang glut jaleih. Bruk hajan ia sua dak harei dak trak damak kayua hajan dui atah rilo harei ngak ka  ia di dom baoh kraong tagok glaong, ngak kan kandah biak trak ka binek, ribaong.

15 uranaih njauk chap mek nao truh sa sang bac di Nigeria, jaik 2 harei hadei di tuk labaih 300 anek saih karei njauk cap mek ngak con tin. Urang brei panuac di cảnh sát brei thau lac kol pan phao nyu tame palei Gidan Bakuso di bang Sokoto tuk mon 1 kreh melam 9/3 (tui mon pak nan). Kol nan nyu cap mek dom uranaih di ký túc xá sang bac dahlau di tuk gah an ninh mai tal, saong daok cap mek gam 1 urang kumei dalam palei. Ini lac bruk cap mek rilo menuac mbang ka 3 di taneh ia Tây Phi ini dalam oh ka tal 1 adit, hadei di tuk takik abih 287 anek saih njauk cap mek./.