Mintri Y tế hu taduan panuac caong hu vaccine 5 dalam 1 di taong abih 63 tinh ban. Tui nan, brei pabahra, min tui jalan brei dahlau ka dom tỉnh bhum atah bayah, bhum kan kandah, labik hu bruk klauk jru takik. Piah khik kajap salamat ka uranaih dalam tuk klauk jru, danak dak klauk jru peih praong hu panuac ieu dom tinh ban ngak tui tacei pato di Mintri Y tế, abih di nyu lac ngak njauk bruk pasang iek dahlau di tuk klauk jru, saong tui iek hadei di tuk klauk jru blaoh.

Harei 17/12 anak tal, di Cung văn hóa Lao động TP.HCM hu peih Harei pataom yaih khan bruk ngak praong abih thun 2023 ngan haong hatai caong pilih ruah jaik 20.000 labik ngak bruk. Tui kuhria, harei nan dui pachreih hu meng 1.500 tal 2.000 urang ngak saong meng 80 tal 100 doanh nghiệp hu mbaok tame dom bruk ngak. Tui Liên đoàn Lao động TP.HCM, meng akaok thun tal urak ini, bruk ngak mbang, pablei salih di dom doanh nghiệp, abih di nyu nan lac gah ngak takhaok kalik, jhik manyim khan aw gaok rilo kan kandah, ngak ka yaok piluh ribau urang ngak gaok kan kandah, njauk trun maong ngak bruk atau lahik bruk ngak.

Kuhria tal harei 30/11, dalam tỉnh Đồng Nai hu peih jien labaih 5.458 tỷ đồng (dalam abih tih phun jien jaik 13.000 tỷ đồng). Yau nan, Đồng Nai bahrau peih hu 37% tui bruk ba tabiak, biar jang tanut kuhria rah tapa di taneh ia lac 60% saong dang ka 54 dalam 63 tỉnh, ban. Tui Sở Kế hoạch & Đầu tư tỉnh Đồng Nai, makna di bruk nan, lac kayua bruk pambuak gauk oh ka siam di dom po đầu tư haong UBND pakat huyện saong dom sở, ngành dalam bruk peih ngak dom adat padang ngak dom danak dak. Sa makna tra hu meng lavik thun mai nan lac bruk bayar jien peih taneh suai nan ye danak dak oh padang ngak hu.

Công ty TNHH Điện lực Vĩnh Tân 1 bahrau jao labaih 50 baoh komputer saong mban kik ka Sang bac Tiểu học Vĩnh Tiến saong Sang bac Trung học cơ sở Lý Tự Trọng di huyện Tuy Phong, tỉnh Bình Thuận. Tukvak tapa, labik bac, pandap pato bac di dua sang bac ini daok kurang biak rilo, dom komputer ka oh ginup piah pabak ka bruk bac taa di dom adei anek saih. Min, kayua gaok kan kandah nan ye dom sang bac ka oh rami ramik samu phun jien piah blei pandap panda pato bac. Kayua yau nan ye, bruk taduan mac komputer bahrau meda daong palagaih ka dom adei bac taa hu siam makre jang, thau hu ilamo ka kong nghe thông tin. 

Tỉnh An Giang hu biak rilo inem krung ilamu phi vật thể hadah krah di dom bangsa Khmer, Chăm saong Hoa. Ini oh lac drap ar inem krung ilamu biak rilo janih bo daok lac prein khang piah cakrok du lịch. Tỉnh An Giang daok hu peih ngak rilo bruk khik ramik saong patagok inem krung ilamu phi vật thể. Gam haong nan, patagok pathau khan, yaih khan, taom gaok nao mai dom bruk pambuak tal gah inem krung ilamu phi vật thể. Tapa nan, paglaong hatai sahneng saong pabak prein ka dom nghệ nhân bhap bini patui jalan yaih khan dom yaom glaong inem krung ilamu phi vật thể tal bol bhap rahra.

Quốc hội Mỹ hu brei tapa dự luật kadung jien quốc phòng dalam nan hu gam dom paka pacang cakak Tổng thống eng drei tabiak truh NATO bo oh hu bruk njauk hatai di Quốc hội atau sa Đạo luật Quốc hội. Paka ini brei thau sanya di Quốc hội Mỹ ngan haong liên minh NATO hu kanja Tổng thống John Biden iek praong jang  dut saong kanja dahlau di nan, abih di nyu nan lac hadei di tuk bruk mesuh metak di Nga saong Ucraina. Kanja Tổng thống Biden hu buh jien tame rilo ka NATO meng di akaok nhiệm kỳ tuk sanya paglaong bruk hu mbaok saong prein khang quân sự di châu Âu.

Dalam thun blaoh, menuac sia Australia tagok samar, haong tanut tagok lac 2,4%. Njauk caik hatai lac, menuac sia dalam taneh ia tagok tok hu labaih 106 rabau menuac. Daok veik, meblah tal 83% lac menuac negar langiu mai taneh ia ini daok saong bac megru, dalam nan, rilo abih lac sinh viên negar langiu. Bruk menuac sia tagok samar dalam tukvak katut panak daok kateik trak tal rilo bruk xã hội saong sang daok, nan ye rajaei Australia bahrau tabiak jalan nhập cư bahrau piah patrun patakik veik dom menuac negar langiu mai tal Australia.

Gah Y tế Dunya (WHO) ieu rajaei dom taneh ia ngak catang bruk khik ramik ngan haong pakao điện tử (atau daok ieu lac vếp) piah patakik veik bruk pandar janih pakao hu rilo urang ranaih takre di rilo taneh ia. Gah Y tế Dunya brei thau lac, vếp ba tabiak rilo janih hóa học dalam tuk pandar njuk, dalam nan hu janih brei thau lac ngak tabiak ruak ung thư atau ngak brei ruak glo akaok, hatai baoh saong phổi ka dom urang pandar njuk. Dom nicotine hu dalam vếp tui kuhria ngak njil ka dom urang ka oh bhian njuk pakao./.