Mentri Jaan mbak pajeng ba caong khin Mban Khik iek danak Mỹ Thuận (lac po buh jien tame ngak) jhuk pasamar bruk ngak danak dak jalan peih drah samar Mỹ Thuận - Cần Thơ piah hu ngak salah dom bruk njauk tukvak ba tabiak hu dom đơn vị po thầu sanya blaoh. Tui nan samar ngak salah harak gal piah ba danak dak tame pandar dahlau harei 31/12/2023. Danak dak  jalan peih drah samar Mỹ Thuận - Cần Thơ atah jaik 23 km. Kuhria taong abih jien buh tame ngak danak dak  labaih 4.800 tỷ đồng. Vaktu ka 1, jalan hu ngak praong 4 jalan radaih, peih nduac hu 80 km/h.

Dom harei ini, dom radaih mai dom pasak đăng kiểm di TP Hồ Chí Minh daok rilo tagok. Tui kuhria dalam bilan 12, dalam ban raya hu labaih 60.000 sruh radaih caong hu kiểm định. Tui Cục Đăng kiểm Việt Nam, TPHCM mbuan rah tabiak veik bruk tapa prein ngak di puac thun ini kayua hu biak rilo radaih tal tuk pasang iek tapak. Tukvak tapa, labaih 70% menuac urang pandar bruk tut angan đăng kiểm angaok phone tangin saong hu daong patrun biak rilo bruk gar radaih. Anak tal, piah plaih bruk gar pataom radaih rilo, dom pasak hu kakei bhap bini rami ramik tukvak piah mai kiểm định radaih dahlau.

Di nyaom biai online ka bruk cak rok patagok kinh te dulich di bhum palei peih tabiak di harei 8/11, Akok UB bhap bini tỉnh Sóc Trăng  Trần Văn Lâu brei panuac lac, Thủ tướng Rajaei  mboh tangin tame quy hoạch  tỉnh Sóc Trăng vaktu 2021 - 2030, pamong tal thun 2050. Ini lac jalan adat hukum hu makna biak praong, piah pambak tame nan peih ngak dom  danak dak patagok dulich tui prein khang, lagaih di tỉnh. Tui nan, gah dulich tỉnh cak rok patagok tui jalan khang kajap, chuyen nghiep, salih birau saong kham merat tal thun 2025, dulich hu jeng bruk ngak kinh te  hu makna praong, mbiah tal thun 2030 hu jeng bruk ngak kinh te praong abih di  tỉnh Sóc Trăng.

Pambuak tal bruk labaih 260 lồng, bè raong ikan di 20 sang dalam labik padang ngak tatua Thống Nhất, ban Biên Hòa, tỉnh Đồng Nai bo Thủ tướng Phạm Minh Chính hu blaoh panuac tacei tỉnh Đồng Nai langyah, urak ini, gah chức năng tỉnh Đồng Nai daok peih bruk panduan ba lồng, bè ikan, tui kuhria hu ngak salah dahlau di harei 15/11. Meng di tuk panduan ba lồng, bè, gah chức năng hu daong yaok baoh sang 15 triệu đồng. Di labik panduan ba nao, urang jakar hu brei padang gheng piah khik kajap lồng, bè ikan. Hadei di tuk panduan nao tal labik bahrau, dom lồng bè nan jeng daok hu raong veik ikan.

Dalam 2 thun 2022 saong 2023, huyen Bù Gia Mập, tỉnh Bình Phước hu jao brei  labaih 155 tỷ đồng piah jhul pasamar tukvak peih ngak danak dak bhum bangsa takik. Urak ini, huyện daok langyah bruk kurang taneh daok, taneh pala drak, ia pandar, daong cak rok patagok bruk ngak nong - ngak glai khang kajap, padang dom bruk ngak tabiak pandap panda, pasiam veik, paglong dom bruk  ngak ilamu. Meng bruk buh jien tame ngak yau nan hu daong ka mikva bhum palei paglong raidiuk, jalan sahaneng di bhap bini, daok lac prein khang jhul cak rok patagok kinh te – xa hoi, patrun kan kathaot  khang kajap di bhum bangsa takik.

Đảng Dân chủ (DP), lac đảng cagar veik praong di Hàn Quốc, daok ieu quốc hội taneh ia ini samar brei tapa hukum pakauk mbang ralow sau. Menuac sia dalam taneh ia taong yaom lac Quốc hội Hàn Quốc meda brei tapa hukum pakauk rahra mbang ralow sau dalam tuk đảng Quyền lực Quốc dân pan karja jeng pachreih tui jalan ngak ini. Dalam dom pluh thun jaik di ini, ralow sau pablei di Hàn Quốc trun khang kayua hu rilo menuac salih jalan sahneng ka pandap mbang meng kan ini. Kuhria tal urak ini, hu 5 hukum pambuak tal bruk pakauk oh brei mbang ralow sau oh ka hu Quốc hội Hàn Quốc brei tapa. 

 Harak mbao Japan Times brei thau, sa bruk pruh tabiak meng ceik apui di ala tasik Nhật Bản hu ngak jeng kaoh pulao atah di ban ine Tokyo labaih 1.200km gah Meraong. Bruk nan hu rah tabiak sa mbang di thun 2013, ngak jeng kaoh pulao sit 2km, jeng daok dalam dom kaoh pulao Ogasawara. Ini iew lac pruh magma yau bingun, tuk magma pruh ala ia saong khan veik jeng patau ala ia tasik, karei jang dung nham pruh di angaok mbaok taneh. Tui urang ilamu, kaoh pulao birau ini meda hu mboh, peih praong veik saong ba tame haong kaoh pulao Iwo Jima meyah ceik apui daok pruh veik.

Tui gah Khí tượng dunya (WMO), meda lac 90% bruk El Nino daok rah tabiak meda dui atah mbiah tal abih bilan barak di Bắc bán cầu, saong daok brei thau lac, bruk ini meda dui atah tal takik di abih lac bilan 4/2024. Yam ndok WMO Petteri Taalas kuhria mboh dahlau lac, dom bruk langik tasik oh siam yau ye sóng nhiệt, pandiak bhang, khuah glai, hajan praong saong ia dauk ia sua meda rah tabiak di dom labik angaok dunya saong dak harei dak khang, ba tal dom kan kandah praong./.