Di mbang nyaom pang pathau khan, langyah ka dự thảo Hukum Bảo hiểm xã hội (pasiam veik) hu peih tabiak di harei kabroi, Ủy viên Mintri Chính trị, Phó Akaok thường trực Quốc hội Trần Thanh Mẫn ieu dom jabat ngak dự thảo njauk caik hatai tal dom bruk pambuak tal yau ye Hội đồng khik ramik Kadung jien Bảo hiểm xã hội; peih praong dom urang hu mbaok tame bảo hiểm xã hội bắt buộc; khik ramik bruk pataom mek kadung jien Bảo hiểm xã hội; ka tukvak kak jien bảo hiểm xã hội takik di abih piah hu mbang jien padeih huu; ka adat mbang jien bảo hiểm xã hội sa mbang; brei thau kja bruk ngak suan plaih kak jien, suai kak jien bảo hiểm xã hội saong yaom taong phat.

Kadung jien An sinh xã hội TPHCM hu padang tagok tui Sarak di Akaok UBND TPHCM. Kadung jien An sinh xã hội TPHCM hu brei adat ngak bruk hadei di tuk hu Akaok UBND TP công nhận, Kadung jien ginup paka piah ngak bruk saong daok dalam kapul khik ramik Kadung jien tui Điều lệ Kadung jien saong tui adat hukum. Kadung jien An sinh xã hội TPHCM ngak bruk oh kayua kein laba, piah pambuak dom prein khang daong ka urang mbuan gaok kan kandah saong urang  ngak gaok kan kandah

Mban Khik ramik Sang magik Jamiun Aman di palei Khánh Mỹ, xã Khánh Hòa, huyện Châu Phú, tỉnh An Giang bahrau peih bruk uan salam Bilan eik Ramadan thun ini. Dalam luac Bilan eik Ramadan, taong abih dom urang Isalam oh mbang, oh menyum, oh njuk pakao, oh brei hagait tame rup tuk harei. Uan bruk ini, dom mban, dom gah di huyện Châu Phú saong xã Khánh Hòa hu alin pandap, tadhau ayuh Mban khik ramik Sang magik Jamiun Aman saong mikva cam uan raok Bilan eik Ramadan dalam siam makre, salamat.

Di tỉnh Kiên Giang, bhum mbuan khuah glai urak ini lac labaih 41.000ha, meblah jaik meteh dom glai di tỉnh. Meng akaok thun tal ini, hu 7 mbang khuah glai di Bein pakat negar Phú Quốc. Piah pacang caga khuah glai, Sở Ngak nong saong Patagok palei pala Kiên Giang brei pambuak bruk haong gah chức năng saong puk palei hu glai, bhian khan brei thau bruk mbuan khuah glai ka bhap bini daok tapen glai thau, paglaong hatai sangka, hu mbaok tame bruk pacang khuah padam khuah glai, langyah catang dom po glai oh ngak dom bruk khik kajap salamat ka pacang caga khuah glai.

Piah pacang caga hu siam lagaih anak bruk glut jaleih takai kraong, takai tasik daok rah tabiak samar, kan kandah yau urak ini, tỉnh Cà Mau daok padang ngak Danak dak “pacang caga glut jaleih takai tasik, takai kraong tukvak 2021 - 2025 kuhria tal abih thun 2030 di dalam tỉnh". Danak dak meda buh jien tame padang ngak 177 danak dak pacang caga glut jaleih takai kraong, takai tasik, ngan haong phun jien buh tame labaih 31.000 tỷ đồng. Dalam nan, tukvak 2021 - 2025, buh jien tame padang ngak 30 danak dak, ngan haong phun jien labaih 6.000 tỷ đồng; tukvak hadei padang ngak 147 danak dak, ngan haong phun jien labaih 24.000 tỷ đồng.

Indonesia kuhria mboh dahlau lac, sa bruk nao mai praong tagok tal 137 triệu mbang menuac meda hu mboh dalam bilan eik thun ini di urang Islam. Mintri jalan mbak Pajeng ba Indonesia daok caga “Danak dak Pajeng ba oh mek jien” daong ka rahra mai sang hu siam mekre salamat, mbuan lagaih. Tui nan, labaih 700 radaih buýt hu ba mai caga pajeng labaih 30.000 mbang tuai, gam haong 30 radaih pajeng yaok rabau radaih patuh 2 kong. Tổng cục Đường sắt Indonesia jeng hu ba tabiak danak dak pajeng ba brei saoh labaih 28.000 tuai saong labaih 12.000 radaih patuh 2 kong angaok rilo sruh kapal.

Rajaei Nhật Bản kuhria mboh dahlau lac meda tagok jang dua mbang bruk taduan urang ngak hu tangin gheih ngak glaong dalam tukvak 5 thun tal, meng thun tài khóa 2024. Tui nan, dom urang ngak negar langiu hu tangin gheih ngak meda tagok meng 345.000 urang urak ini jeng 800.000 urang piah trun manieng dom kan kandah ka urang ngak dalam taneh ia. Rilo doanh nghiệp Nhật Bản hu ieu rajaei brei adat taduan rilo jang dom urang ngak negar langiu dalam tuk oh pilih ruah ginup urang ngak dalam taneh ia, yaom lac hu tagok jien bilan saong peih ngak dom sarak daong brei karei karei.

Urang brei panuac di Điện Kremlin Dmitry Peskov ndom lac, taneh ia ini oh ka mbang halei saong oh ba tangin tame bruk pilih ruah urang tagok ngak Tổng thống Mỹ. Dahlau di nan, Mỹ hu rilo mbang ndom lac Nga ba tangin tame dom bruk bầu cử Tổng thống Mỹ thun 2016 saong 2020, min Nga jeng tah klaak abih dom panuac lac nan./.