Padang tabiak meng thun 1999, hadei 25 thun ngak bruk, Mban ngak bruk di Kadung jien bac Vừ A Dính rik tame padang ngak, ngak jeng prein khang suai lavik ka bhum urang bangsa takik saong kaok pulao, dom bhum kan kandah, bhum taneh akaok Negar. Abih di nyu, meng thun 2009 mbiah tal thun ini 2024, dom danak dak hu buh tabiak labaih 470 tỷ đồng, daong ka 1.737 anek saih, sinh vien, ralo lac urang bangsa tasik, dom bhum kaok pulao tasik. Kadung jien bac Vừ A Dính dak harei dak hu mai tal dom adei anek saih, sinh vien  dom bangsa takik di grauk labik dalam negar.

Tỉnh Bình Thuận daok pasang iek padang ngak, ramik pasiam veik sang anit ranam, sang uranam ka baoh sang sarak karja, baoh sang kathaot saong biak kan kandah ka sang daok. Ong Nguyễn Hoài Nam, Bí thư Tỉnh ủy Bình Thuận caong khin dom gah, dom pakat  kham merat tal puac thun 2025 brei ngak salah bruk padang ngak, ramik pasiam, kham merat abih hatai  piah ngak oh daok baoh sang halei tahak tui tacei ba di Thu tuong Rajaei. Meng thun 2021 mbiah tal inil, Mban khik iek Kadung jien bayar dhar phol jak ba hu ralo jang bruk ba tabiak labaih 38 tỷ đồng. Jien nan meda hu daong ka dom  baoh sang kan kandah ka sang daok.

Tỉnh Kiên Giang hu 27 bangsa diukrai haong gauk, ralo abih lac 3 bangsa  Kinh, Khmer, Lo. Dalam 5 thun tapa, meng phun jien labaih 340 tỷ đồng meng Danak dak pakat negar ka bruk patrun kan kathaot khang kajap, tỉnh hu buh jien tame ngak jalan mbak sang danaok, hu 103 tatua, jalan, sang ilamo; peih ngak hu labaih 50 danak dak daong cakrok patagok bruk ngak mbang pala drak, parilo bruk ngak brei patrun kathaot ka labaih 300 baoh sang…Meng nan, jien mek tame  di palei pala thun 2023 hu 63 trieu dong sa urang sa thun. Dalam tinh urak ini hu labaih 37 dalam 41 xã bhap bini urang bangsa takik mek angan palei pala birau.

Urang ngak nong dom tỉnh Trà Vinh, Bạc Liêu, Cà Mau, daok tame mek arieng tasik pablei min yaom arieng trun lap. Urak ini, urang blei arieng di danao raong meng 250.000 -270.000 đồng sa kilo. Yaom lac trun tal 100 ribau dong dut saong puac bilan 9, yau nan ye urang ngak nong trun jien laba meng 30 tal 50 trieu dong sa hecta. Dalam tuk nan, yaom durien daok tabung glong. Baoh durien Thái A baoh praong siam glong abih 150.000 đồng sa kilo. Di tỉnh Tiền Giang, yaok ribau baoh sang urang ngak nong chreih chrai tuk durien pablei hu yaom.

Labaih 2.600 anek saih sa sang bac  di Ban Biên Hòa, tỉnh Đồng Nai harei ini brei padeih bac kayua ia tame sang bac dauk dalam. Dahlau di nan, melam 28/10, di Ban Biên Hòa hu hajan praong ngak kraong Buông ia tagok, dauk ralo labik. Di biar harei 28/10, hajan praong ngak 4 urang saong sa sruh radaih tai gar di labik palei 2, xã An Viễn, huyện Trảng Bom saong 1 pablei njuak cakak kayua ia ribuk. Hajan praong gam ia ndik  tagok  saong ia di dom labik karei tuh mai ba tal dom palei di xã Bình An, huyen Long Thành dauk dalam ia.

 Mbiah tal ini, dom urang metai kayua ribuk Trami di Philippines tagok 136 saong 39 urang lahik. Rilo baoh sang lahik abih patih hadei ribuk Trami. Rajaei Philippines khan lac hu jaik 240.000 urang panduan mai daok di dom pasak, 7.510 tuai damuai njauk gar tavak di dom labik mblang radaih saong 36 mbang kapal haok njauk brei padeih  dalam dom harei tapa. Yaok thun hu labaih 20 mbang ribuk khang tuh tame Philippines, ngak khat lahik trak sang danaok, jalan mbak khut tayak saong ngak metai rilo manuac.

Ban ine  New Delhi, Ấn Độ gam gam dalam nyaom dom ban njom nerak tachrauk yawa langik trak abih di dunya. Dalam adit tapa, yawa langik daok trun jak ralo kayua cuh nerang, sauk kong nghiep saong jalan mbak, ngak jhak tal raidiuk bhap bini. Anak bruk nan, karja padang jalan pacang caga  bruk njom nerak yau brei radaih puh ramik jalan saong pruh ia harei harei di dom jalan, pacang dhur mun di dom labik padang ngak. Bhap bini hu iew oh brei cuh nerang langiu langik saong takik peih radaih ta-eng drei.

Dom sang bac ka uranaih umo ala 5 thun lac mau giao di Trung Quoc trun daok biak takik, dalam thun 2022 hu labaih 289.000 ribau sang bac mau giao, dalam thun thun 2023 daok tok 274 ribau sang bac. Dom sang bac mau giao trun takik gam gam dalam tuk taneh ia ini daok dang anak  takik ndik tapui anek saong rahra umo taha, dom jalan daok ngak pandik akaok ka dom urang ngak sarak. Tukvak tapa, Karja  hu ngak iek rilo jalan karei di gauk piah pachreih bhap bini ndik tapui anek ralo jang min oh hu yau caong khin.