Tui panuac khan brei thau meng Mintri Ngak nong saong patagok palei pala, dom janih jit ruak, yau ye cum manuk ada, ruak laka kalik ndaih baoh di limo, kubau, blaoh jit eik traoh pabui saong ruak laka cambuai, saluah kakau jeng daok tamuh gilac veik, meda pambak tabiak rilo tinh, ban. Tal urak ini, dalam taneh ia hu 4 sruh jit cum manuk ada hu virus cúm A/H5N1 di dom tỉnh: Bắc Ninh, Ninh Bình, Long An saong Tiền Giang ba tal bruk am cuh klak jaik 7.000 drei manuk ada. Piah pacang caga jit ruak di athur raong, manuk ada tamuh tabiak saong njom mbak, saong piah pacang caga jit ruak njom pambak meng athur tapa manuac, Mintri Ngak nong saong patagok palei pala ieu kakei UBND dom tinh, ban dalam taneh ia peih ngak bilan puh ramik, ngak hacih, pametai anek ruak, am cuh klak anek ruak dalam labik daok.

Akaok thun ini, Kalup kapul urang nong tỷ phú di Bình Phước hu ba cửa hàng S’Tiêng Farm tame ngak bruk di ban Đồng Xoài. Cửa hàng pataom hu labaih 300 pandap OCOP dom janih di 100 labik mai meng rilo puk palei dalam tỉnh hu mbaok tame. Ong Nguyễn Viết Vị, akaok kalup kapul brei thau, jaik abih dom pandap di cửa hàng S’Tiêng Farm jeng hu mã QR piah thau hu asal di nyu saong hu pablei tapa online. Mã QR lac jalan piah S’Tiêng Farm peih mbang nyaom darak pasar kaya nong online tui jalan livestream.

Thun ini, tỉnh Đồng Nai kuhria pablei to yaom 17 labik taneh praong abih tih jaik 410ha, tui kuhria jien pataom mek hu meng bruk to yaom lac 7,7 ribau tỷ đồng. Dom labik mblang taneh kuhria hu ba tabiak to yaom jeng hu khau tin cambaih laih ka jalan ngak, ngak salah dom adat hukum jang yau tukvak kuhria peih bruk to yaom. Tui Sở Tài nguyên - Môi trường tỉnh Đồng Nai, 3 thun ini mai, kayua hatai caong di darak pasa taneh riya, sang danaok bier, sarak pambuak tal bruk buh jien tame padang ngak sang danaok pablei, jalan langyah hu brei thau tantu cambaih ka yaom taneh hu rilo salih karei ba tal bruk to yaom quyen pandar taneh ka oh pabak tui njauk hatai caong.

Patui khau tin ka bruk jaik 200 urang nduac tabiak truh labik cai nghiện ma túy di Sóc Trăng, ông Lâm Tấn Hòa, Akaok mBan Tuyên giáo Tỉnh ủy Sóc Trăng brei thau, dalam tuk sinh hoạt, sa kapul urang kandah gauk ba tal taong gauk, ngak brei  4 urang daok cai nghiện njauk rambus. Pagam pambak tame bruk ini, dom urang dalam nan pacuh gauk nduac klaak, ba tal srau kadau. Thường trực Tỉnh ủy Sóc Trăng hu peih ginum biai haong dom gah chức năng piah pasang iek, taong yaom bruk nan, duah tabiak makna, saong ginum biai jalan ngak piah samar pasiam bruk nan.

“Harei rija Văn Thánh Miếu” saong “Ilamo daoh hát bội tỉnh Vĩnh Long” di tỉnh Vĩnh Long bahrau hu Mintri Ilamo - Thể thao saong Du lịch ba tame Angan Inem krung ilamo oh mboh di mata pakat negar. Nan ye tal urak ini, Vĩnh Long hu 4 inem krung ilamo oh maong mboh hu ba tame Angan inem krung ilamo oh maong mboh pakat negar lac Harei rija Lăng Ông Thống chế Điều bát Nguyễn Văn Tồn; palei ngak tàu hũ ky, xã Mỹ Hòa, ban sit Bình Minh; Harei rija Văn Thánh Miếu saong Ilamo daoh “hát bội”.

Tapa yaok pataom oh ka ginup abih di UB Bầu cử taneh ia Campuchia khan brei thau di melam 25/2 brei mboh lac, Đảng bhap bini Campuchia pan quyền mek hu rilo phiếu bầu di abih dalam mbang pilih ruah urang ka Thượng viện mbang V. UB Bầu cử taneh ia Campuchia brei thau, meyah oh hu hagait karei, bruk pilih ruah urang ka Thượng viện Campuchia mbang V hu khan brei thau dalam tukvak meng harei 4 - 6/3 tal.

Yaok rabau bác sĩ pak Hàn Quốc hu mbaok tame bruk padeih ngak meda gaok bruk brei padeih harak adat ngak bruk saong dom kan kandah karei gah adat hukum karei mayah dom urang ini oh mai ngak bruk gilac dahlau di bilan 3. Thứ trưởng Mintri Y tế Hàn Quốc Park Min-soo brei thau lac, kuhria tal urak ini hu labaih 9.000 bác sĩ thực tập sinh peih ngak piah đình công. Dom mbang padeih ngak hu ngak klaih klaoh bruk ngak di rilo sang iek ruak, dalam nan hu dom bilik cấp cứu oh taduan urang ruak saong rilo urang ruak blaic raih njauk brei padeih veik.      

Dalam 3 thun gam, mbaok ia patau tasik vil val Nam Cực trun daok mala 2 triệu km2. Tui kuhria mboh di Pasak Dữ liệu băng tuyết negar Mỹ, 3 thun tapa lac 3 thun biar abih ka dom ia patau tasik seik ndaong angaok dom lục địa. Dom urang ilamu brei thau, bruk lahik ia patau daok ngak ka rilo lục địa mblo tabiak gah tasik, jhul samar bruk lahik ia patau angaok mbao taneh, meng nan meda jhul ia tasik angaok duya tagaok glaong.