Kapol Jum pataom sư sãi anit ranam taneh ia ban Cần Thơ birau jao brei 6 baoh ghe Ngo sit kuhria tui yaom jien jiak 400 trieu dong ka dom baha saong Học viện Phật giáo Nam tông Khmer dalam ban.  Di tuk jao brei, Hòa thượng Đào Như, Akok Mban Trị sự Giáo hội Phật giáo Việt Nam ban Cần Thơ caong khin, tapa mbang jao brei ini, bhap bini Khmer hu mbuan lagaih piah pasram pakacah dom giải ghe Ngo dalam bhum saong khik ramik ilamu biak gheih mekre di harei pataom ghe Ngo dalam bhap bini Khmer di ban.

UBND huyện Long Thành, tỉnh Đồng Nai hu pasang iek mbaoh tangin brei tapa yaom taneh di danak dak binah 1, binah 2 di danak dak jalan nduac samar Biên Hòa - Vũng Tàu. Di danak dak binah 1, huyện Long Thành kaoh yaom jaik 50ha taneh, dalam nan taneh yaom glaong di abih lac 12 triệu 300 rabau đồng/m2, biar di abih lac labaih 2 triệu đồng/m2. Di danak dak binah 2, abih tih taneh hu kaoh yaom lac 124ha. Yaom ka janih taneh di puk palei glaong di abih lac 8 triệu 800 rabau đồng/m2, biar di abih lac 1 triệu 400 rabau đồng/m2. Bruk kaoh yaom taneh nan piah kuhria jien bayar tuk Karja mek veik taneh piah ngak jalan nduac samar Biên Hòa - Vũng Tàu vaktu ka 1. Jalan piah kuhria yaom bayar jien hu ngak tui bảng yaom taneh di tỉnh Đồng Nai vaktu 2020-2024.

Dom harei tapa, ia di huyen Tân Hưng, tỉnh Long An daok trun, nan ye mikva urang nong  ramik caga ginup pandap panda piah trun pajaih bilan padai Đông xuân 2023-2024. Piah yuak kuak hu rilo padai brah bilan Đông xuân, UB bhap bini huyện Tân Hưng tacei pato karja palei brei pabak bruk pathau khan, jak ba mikva urang ngak nong brei ramik hacih hareik harom di mblang hamu; li-ua lam nerang  piah ka taneh la-man, takik jru mek hưu cơ, pacang ruak njom mbak; brei pametai tikuh, baoh bao darang dahlau di tuk trun pajaih.

Tukvak tapa, bruk glut jaleih takai kraong rah tabiak rilo di tỉnh Hậu Giang, abih di nyu lac di huyện Châu Thành, lac huyện daok rah tui kraong Hậu. Meng thun 2021 tal urak ini, huyện Châu Thành hu 104 labik glut jaleih takai kraong, ngak brei lahik labaih 3.000m2 taneh, khat lahik labaih 8 tỉ đồng. Huyện hu pataom tame ngak pasiam dom labik glut jaleih, pacang paga di dom labik mbuan glut jaleih, daong ka bhap bini panduan nao labik salamat… haong yaom jien ngak abih labaih 9 tỉ đồng. Gam haong nan, jak ba bhap bini oh lih tabiak kraong, ngak pakhang dom labik mbuan glut jaleih saong takik brei ghe gilai nduac samar ngak jeng riyak paoh tame ar pacang…

Tui Thượng tá Lê Mạnh Hà, Phaok akok Jabat Tham mưu Công an TP. Hồ Chí Minh, dom dam dara pandar hareik cỏ Mỹ kayua kurang thau, sahneng nyu lac phun jru oh ngak jhak tal prein yawa, oh ngak brei nyin, ba tal pandar iek bo oh sahaneng tal bruk jhak hadei. Lambaok Công an TP. Hồ Chí Minh mboh lac, cỏ Mỹ lac cần sa tong hop pruh tagok phun hareik thu blaoh caoh klik. Ini lac sa janih ma tuy biak khang, ngak brei nyin saong jhak jang rilo mbang dut saong cần sa. Urang pandar  cỏ Mỹ  meda njauk sraw kadau akaok sahaneng , sraw kadau cảm xúc, ba tal ngáo đá, ngak jhak ka rup saong dom urang daok jaik drei, meda ba tal metai.

Gah Y tế dunya (WHO) hu panuac kakei lac, bruk pandar rilo jru kháng sinh daok ngak patrun prein taong ruak di jru saong tamuh tabiak vi khuẩn pacang jru. Bruk ini meda ngak brei 10 triệu menuac metai yaok thun di dunya dalam thun 2050. Tui pasang iek di WHO, bhum châu Âu di 14 taneh ia, di dom negar, labaih 40% jru kháng sinh hu pandar bo oh hu panuac tacei di bác sĩ. WHO brei thau lac, meyah oh hu jalan pacang chip, bruk pandar jru kháng sinh meda ba tal bruk lac 10 triệu menuac metai yaok thun di dunya tukvak kreh abap ini. 

Cảnh sát Ireland chap khik sa urang likei hadei tuk urang ini klauk 4 urang, dalam nan hu 3 uranaih umo ala 6 thun, di sa sang bac di Dublin harei kabroi. Bruk nan ba tal dom bruk trun jalan khnag di ban Dublin, tuk thau lac  urang nan lac menuac negar langiu. Tui truyen thong pak ini,  urang klauk to tame rup hu bhap bini pacang  saong chap mek chip. Urang ini jeng hu ba tame sang iek ruak  piah jru laka saong hu cảnh sát  khan lac likei umo 50 thun.

Mblang kapal haok Chiang Mai di gah brak Thái Lan brei klaak atau salih harei par di 160 mbang par dalam 2 harei lac 27 saong 28/11 piah peih harei pataom palao gom langik Yi Peng yaok thun. Bruk ini nyu gaok tal 47% dom mbang par mai saong nao meng mblang kapal haok Chiang Mai. Harei pataom palao gom langik Yi Peng lac sa bruk ngak yaok thun dane angan di Thái Lan, bhian hu peih ngak di harei ia bulan bak baoh di bilan 10 atau bilan 11. Harei pataom praong ini biak bhian randap di tỉnh Chiang Mai, gah brak taneh ia ini saong tuk halei jeng ba jien tame rilo ka labik ini.