Kapol urang jakar di Mban Dân vận Trung ương birau ngak bruk haong tỉnh Hậu Giang ka bruk jka ba bhap bini. Di var ngak bruk, ong Đỗ Văn Phới - Pho akaok Ban Dân vận Trung ương taong yaom glong Tỉnh ủy Hậu Giang ba tabiak 34 harak tacei ba bruk jak ba bhap bini saong nan lac sa dalam takik tỉnh, ban hu brei bo tieu chi taong yaom bruk jak ba di karja saong tacei pato peih ngak hu siam  dom sarak pambuak tal bruk jak ba bhap bini. Piah bruk jak ba hu siam jang dalam tukvak anak tal,  Pho Akok Ban Dân vận Trung ương Đỗ Văn Phới caong khin tỉnh bhian pasang iek, tui iek bruk peih ngak pambuak haong bruk pataom iek, kuhria iek taong abih bruk, bac megru tapa bruk ngak saong ba tabiak dom jalan tacei ba  lagaih haong bruk rah tabiak.

Pamaong tal Pahadar 93 thun Harei padang Kapul urang kamei Việt Nam (20/10/1930 - 20/10/2023), Palei Ilamu – Ravang iek dom bangsa Việt Nam di Đồng Mô, Sơn Tây, Hà Nội hu peih rilo bruk ngak hu makna ngan saong kadha “Gheih mekre urang kamei bangsa tapa dua plak tangin gheih ngak”. Dalam nan, harei paguh 20/10, bhap bini dom bangsa daok di Palei Ilamu – Ravang iek dom bangsa Việt Nam hu peih ngak danak dak daoh tamia ragu bhap bini di dom bangsa, yaih khan tal tuai damuai bruk menyim khan bai di dom bangsa Tà Ôi, Ba Na, Thái  … saong bruk pak yot meng kan di dom bangsa.

Di huyen Bác Ái, tỉnh Ninh Thuận hu 10 bangsa daok diukrai haong gauk, dalam nan bangsa Raglai hu 87%. Tukvak tapa, huyện hu rilo jalan piah khik ramik saong patagok dom ilamu meng kan di bangsa Raglai, abih di nyu  lac dom alat ragam bangsa, dalam nan hu Chapi. Meng tal bac alat ragam meng kan urak ini rilo urang Raglai thau paik Chapi, di dom xã hu padang dom kapol main alat ragam bangsa. Langiu di dom alat ragam biak gheih karei yau  Mã la, Chapi, urang Raglai daok hu rilo janih alat ragam biak gheih karei, hu ngak meng dom pandap bhian randap di ceik glai.

Sở Y tế TP.HCM pambuak bruk haong UBND huyện Cần Giờ bahrau peih bruk tabiak mbaok kapul nduac thận nhân tạo vệ tinh di Sang iek ruak huyện Cần Giờ. Kapul nduac thận nhân tạo ini kayua Sang iek ruak Lê Văn Thịnh, ban Thủ Đức padang tagok, haong jamriak halang ia RO saong 5 jamriak lọc thận. Tui bác sĩ CK2 Trần Văn Khanh – Yam ndok sang iek ruak Lê Văn Thịnh, huyện Cần Giờ hu 41 urang ruak nduac thận nhân tạo dalam tuk urak ini bahrau hu 5 mac nduac thận, pabak hu ka 16 urang ruak min. Nan ye sang iek ruak caong khin hu bruk ba tangin tame daong di dom gah piah ka bruk nduac thận ka urang ruak oh klaih klaoh. 

Meng bruk peih ngak sumu gauk rilo jalan gam haong kham merat, ngak bruk tani tanat catang di gah y te saong gah pato megru, nan ye  ruak pandik meta bhong dalam sang bac di tỉnh Bến Tre hu kadun likuh, urang ruak trun daok takik. Dalam harei 17 – 10, urang ruak birau 95 mbang,  kuhria abih tih meng harei 11/9 mbiah tal ini lac labaih 22.700 mbang. Tui Sở Y tế Bến Tre, ralo urang ruak pandik meta bhong hanjol, oh hu urang halei tame sang iek ruak.

Bilan bầu cử di Indonesia hu peih tabiak meng di harei ini (19/10) dom urang ứng cử daok tame bruk tut angan pakacah tame labik ngak Tổng thống hadei di ong Joko Widodo ngak Tong thong jaik pluh thun. Jaik 205 triệu dalam labaih 270 triệu rahra nao tal dom labik buh phiếu di bilan 2/2024 piah pilih ruah urang pan akaok taneh ia rilo kaya ngui meng langik tasik ini. Tui kuhria, Indonesia brei peih bruk pilih ruah Tổng thống, Phó Tổng thống, saong dom urang ka Thượng viện saong Hạ viện di harei 14/2/2024.  

Kuhria tal bilan 9 mneg blaoh, Malaysia cakak labaih  2,6 tỷ mbang iew phone medil lac pachot pagat, tui nan hu jaik 20.000 mbang pagat ngak khat lahik labaih 700 triệu ring-gít (sumu 145 triệu USD) kuhria meng akok thun 2023. Kuhria meng thun 2021 mbiah tal bilan 7 meng blaoh, jaik 23.000 mbang ndem puac pachot pagat hu ba tabiak kaoh tui Bộ luật Hình sự taneh ia ini saong labaih 2.200 urang pagat njauk langyah tui hukum.

Tổng thống Mỹ Joe Biden hu panuac lac daok patui jalan pachreih tui Israel saong daong ngak pahla ka urang Palextin gaok kan kandah meng bruk mesruh gauk di Israel haong dom kapul pan phao kraong di labik Gada. Tui kuhria dalam adit ini, Tổng thống Mỹ hu panuac ieu Quốc hội taneh ia ini brei tapa pok jien daong biak praong oh ka bhian mboh piah daong ka Israel. Hu dom khau tin khan lac, pok jien daong meda hu kuhria tame pok daong 100 triệu đôla bo urang dang akaok Mỹ sanya daong ngak pahla di labik Gaza saong Bờ Tây.