Page ini 20/12, Hoi ndong jien bilan pakat negar ginum biai mbang ka 2, ndem ka jien bilan biar abih di bhum thun 2024. Dahlau di nan, akaok bilan 8 tapa, Hoi ndong jien bilan pakat negar hu ginum biai mbang akok meti ka bruk ramik pasiam jien bilan biar abih di bhum thun 2024. Di nyaom biai, taong abih dom urang dalam ginum biai hu klak rabha dom kan kandah haong doanh nghiep, klak rabha dalam raidiuk haong urang ngak kong, urang ngak mbang apah tuk jien mek tame oh ginup kuhria ka raidiuk. Di nyaom biai, kong ndoan caong khin brei ramik pasiam jien bilan biar abih di bhum thun 2024 tagok meng 5 tal 6%.

Kapul dam dara TP. Hồ Chí Minh, Hội Đồng đội, Pasak daong anek saih, SV TP. Hồ Chí Minh bahrau peih bruk jao jien bac SCG Sharing the Dream thun 2023 ka 200 SV, anek saih kan kathaot kham merat yam tapa kan kandah. Abih tih yaom jien lac 2 tỷ 700 triệu đồng. Dalam nan hu 100 pok jien bac brei ka SV (yaom 15 triệu đồng sa pok) saong 100 pok jien bac ka anek saih (yaom 2 triệu đồng sa pok), daok veik lac pandap lin hadiah. Dalam luac 16 thun tapa, danak dak jien bac hu daong labaih 5.500 pok jien bac ka anek saih, SV dalam negar haong yaom jien abih tih tagok tal 38 tỷ đồng.

UB bhap bini tỉnh Đồng Nai hu harak văn bản tacei pato UB bhap bini huyen Long Thành duah thau ngak brei cambaic laic bruk bao chi ndem ka bruk “Meblah taneh danak mblang kapal haok dunya Long Thành”. Dalam nan, UB bhap bini tỉnh Đồng Nai ieu pasang iek, langyah catang bruk ngak suan ngan haong dom kapol nyaom, urang pambuak tal tui hukum, blaoh khan brei UB bhap bini tỉnh thau dahlau harei 25/12/ 2023. Dahlau di nan, bao chi hu ba khaw tin lac, mblang taneh praong jaik 100 ha di xã Bình Sơn, huyện Long Thành hu mek veik piah padang ngak danak dak Mblang kapal haok dunya Long Thành, min rilo urang tame meblah taneh pala bei blom.

Dom sang pala bingu kiểng di tỉnh Trà Vinh daok jar var caga bingu pajaih ka Tết Nguyên đán. Di 2 palei bingu kiểng praong abih di tỉnh lac Vĩnh Yên saong Long Bình dalam ban Trà Vinh trun pajaih hu 300.000 pheing bingu kiểng dom janih pablei tết thun anek sak girai. Min thun ini pala tankik jang jaik 1/3 duk saong tết thun blaoh. Makna lac kayua urang pala bingu huac oh pablei hu, dalam tuk yaom blei pandap pala saong jien pah menuac ngak daok tagok glaong. Piah daong ka dom baoh sang tani tanat bruk pala ngak, ban Trà Vinh hu daong ka mikva hu mesraiy phun jien, ngak pasiam jalan mbak, jalan điện, ia piah pruh ka phun pala.

Jaik abih bilan 12, yaom lac ia mbak njom tame suai min pandiak khang nan ye karja saong bhap bini tỉnh Tiền Giang samar peih ngak dom jalan pacang caga bala meng langik tasik meda rah tabiak. Urak ini, taong abih dom pabah ribaong, kraong meng huyen Chợ Gạo tal ban Mỹ Tho saong dom huyện gah Tây brei peih pabah mbang piah ba ia taba tame ribaong. Abih di nyu, tuk ia mbak angaok kraong Tiền 1 angaok sa ribau ye pabah kraong Xuân Hòa, huyện Chợ Gạo kareih saong pabak ia taba ka mblang hamu praong labaih 25 ribau ha padai Đông Xuân bhum pataba ia mbak Gò Công. Ngan haong bruk caga hu halau ia, bein phun mbang baoh, padai, njam patam bilan Đông Xuân jeng daok tamuh hijao.

Thái Lan hu menuac njaom biến thể JN.1 di virus corora camereip abih di ban ine Bangkok. JN.1 lac biến thể phụ di BA.2.86 dalam biến thể Omicron. Biến thể phụ ini bahrau rah tabiak đột biến mangaok protein gai duk haong BA.2.86 jeng yau dom đột biến di dom labik karei. Kayua hu prein plaih njaik bruk pacang ruak di anek menuac, nan ye biến thể ini meda ngak brei njaom mbak jit ruak biak samar. Yau nan min, bhap bini jhui huac rilo, kayua lac nyu takik ngak brei ruak trak tuk njaom biến thể ini. 

Nga halan hatian ginum biai haong Ucraina, Mỹ saong châu Âu ka bruk anak tal di Ucraina meyah dom taneh ia ini caong khin yau nan. Min, Nga kham pacang khik kein laba di taneh ia drei. Ini lac panuac di Tổng thống Vladimir Putin di mbang ginum haong dom urang ngak praong dang akaok Mentri Quoc phong taneh ia ini. Tổng thống Putin jeng lac oh klaak dom bruk ngak quân sự di Ucraina.

Bang Texas di Mỹ bahrau tabiak adat lac menuac nhập cư suan hukum lac menuac duas. Tui adat bahrau di bang, tui kuhria lac hu ba tame pandar meng bilan 3/2024, bang Texas brei cap khik dom menuac nhập cư suan hukum. Meyah daok ngak suan, meda njauk kaoh duas trak jang saong meda njauk guk meng 2 tal 20 năm. Urang ilamu mboh lac, adat ini di bang Texas meda dang anak dom cuang kandah gah adat hukum bak kan kandah kayua bruk nhập cư lac bruk di pakat liên bang./.