Mintri Ilamo, Thể thao saong Du lịch bahrau hu harak brei ba tame Angan inem krung ilamo oh mboh di mata pakat negar bruk ngak meng tangin meng kan Bruk manyim khan bai di urang S’Tiêng tỉnh Bình Phước. Tal urak ini, Bình Phước hu dua Inem krung ilamo oh mboh di mata pakat negar ngan haong bruk ngak meng kan meng tangin. Ini lac jalan adat hu makna praong, lac prein jhul khang bruk khik ramik, patagok dom yaom glaong inem krung; gam daong paglaong jang bruk hu mbaok tame di rahra ngan haong bruk khik ramik, patagok dom yaom glaong ilamo oh mboh di mata di dalam ban.

Salam uan Ramưwan thun ini, Kapul urang kumei tỉnh Ninh Thuận hu mai ravang, tadhau ayuh sang dom adei sa-ai kumei Cam daok ngak bruk dalam kapul urang kumei tỉnh. Urang Cam tỉnh Ninh Thuận urak ini hu labaih 85.000 urang, meblah 11% dom menuac sia dalam tỉnh. Urang Cam tui darah gah amaik saong tui 3 agama lac: Ahier, Awal saong Islam. Thun ini, urang Cam Awal tame bilan Ramưwan – mbang muk kei saong urang Cam Islam tame bilan eik Ramadan meng harei 11/3 saong dui atah dalam 30 harei.

Hadei di labaih 3 bilan kham marat peih ngak dom jalan pacang, padam sruh jit, tal urak ini, tỉnh Tiền Giang hu tabiak panuac lac abih jit ngan haong dom labik pandiak jit aih traoh papui Châu Phi di xã Xuân Đông, huyện Chợ Gạo. Tui nan, yaok bruk raong glang, pajeng ba, sik ralaow, pablei salih pabui saong pandap meng pabui di dalam xã Xuân Đông hu peih ngak veik. Tui dom gah chức năng, sruh jit aih traoh papui Châu Phi di xã Xuân Đông, huyện Chợ Gạo, njom mbak samar saong dui atah abih kuhria meng dahlau mai di palei ini, uảng raong glang daok gaok biak rilo kan kandah.  

Tỉnh Bến Tre urak ini hu taneh bein la-u praong abih dalam taneh ia, dalam nan bein la-u chuyên canh lac labaih 79.000 ha, tagok jang 1,36% duk haong tukvak ini thun blaoh. Urak ini, yaom la-u thu trun tagok meng 40-45 rabau đồng sa pluh (12 baoh), la-u that yaom oh ka tal 40 rabau đồng sa pluh. Tui yaom ini, urang pala la-u oh hu laba saong jien mek tame biar jang dom janih phun mbang baoh karei. Langiu di nan, bein la-u di pak ini daok njauk rilo janih ruak palai kaik, ngak ka 94 ha bein la-u njom ruak njauk kaoh klaak.

Kayua yaom padai tagok glaong, dom urang ngak nong pak Sóc Trăng daok ngak vụ Đông Xuân muộn (vụ 3) di tukvak rahtabiak bruk ia mbak njom tame nan ye biak mbuan njauk khat lahik glaong. Huyện Long Phú hu tal labaih 6.000ha padai Đông Xuân muộn, kayua kurang ia saong njauk jru mek lakhur kayua pandiak bhang nan ye hu tal labaih 573 ha padai njauk kan kandah, dalam nan hu labaih 32ha njauk khat lahik abih tih di padai tukvak tabiak dhar. Piah khik caga mblang taneh ngak padai di urang ngak nong, gah ngak nong hu paglaong bruk pathau khan tal rahra piah pacang caga pandiak bhang, njom ia mbak, brei peih – kareik binek pacang ia mbak – khik ia taba.

Thụy Điển hu tame NATO, tamat 200 thun trung lập – dang kreh. Akaok Mintri Bruk ngak saong Ba drei tame Thụy Điển Johan Pehrson maong iek bruk tame NATO lac "sa bruk peih akaok praong ka sarak sron mbon bahrau di Thụy Điển", saong daok brei thau lac ong cang bruk ini dalam 20 thun tapa. Hadei di tuk Nga ba tabiak bruk quân sự đặc biệt di Ukraine, Thụy Điển saong taneh ia jaik taphia lac Phần Lan – taneh ia hu jalan tapen negar haong Nga atah 1.340 km, hu ngak harak likau tame NATO.

Hadei di jaik 5 bilan mesuh gauk di Israel - Hamas, jaik abih bhum taneh Dải Gaza jeng labik tayah tayac, ba tal bruk srau kadau gah ngak pahla dak harei dak trak damak. Bruk trak damak nan di Dải Gaza daok ngak ka Liên hợp quốc njauk ba tabiak panuac brei thau ka bruk eik lipa meda rah tabiak di pak ini. Abih di nyu nan lac di labik gah barak Gaza njauk kan kandah trak damak, rilo urang daok glaih glar piah hu pandap mbang piah diuk tapa harei, ngak trak damak ka Israel saong Hamas piah ba tabiak hu sa jalan langyah. Tổng thống Mỹ Joe Biden hu ndom tal bruk brei samar drah patagok bruk daong ka Dải Gaza, saong ndom cambaih laih lac “kol drei njauk ba rilo jang pandap daong tame Gaza"

Di Patagonia, gah daok di Argentina, dom urang roh duah bahrau duah mboh jaik  900 blah rup cih hang động hu umo thun aval di abih bhian hu duah mboh di Nam Mỹ dahlau daih, tui kuhria mboh lac 8200 thun. Tapa nan brei mboh bruk oh ka bhian hu thau tal ka ilamu nghệ thuật jeng yau prein ba ilamu di dom menuac sia man pateok duan mek daok dalam labik ini di saman Holocene (lac tukvak meng 7.000 - 5.000 thun dahlau./.