Dah page ini, di Hà Nội, Thủ tướng Rajaei Phạm Minh Chính hu mbaok tame nyaom biai Công an pakat negar mbang ka 79 kayua Mintri Công an peih tabiak. Brei panuac di nyaom bia, Thủ tướng taong yaom, bruk ngak di Công an thun 2023 mek hu dom jak jeng siam jang thun 2022. Dalam nan, Công an bhap bini hu ngak siam bruk pok panuac tagok Ndang, Kanja ba tabiak dom jalan ngak di dom gah chính trị, kinh tế xã hội, khik kajap siam makre , sron mbon, … rik daong khik kajap tani tanat chính trị, pabak ka bruk cak rok patagok kinh tế, khik kajap siam makre dalam rahra, peih praong talei pambuak gauk mbeik drei tame dunya, ngak jeng bruk saron mbon, an ninh, tani tanat ka bruk cak rok patagok di taneh ia.

Mintri Jalan mbak Pajeng ba ieu dom gah, dom kapul nyaom, menuac urang hu pambuak tal bruk jeng ba, pataom tame rami ramik, khik iek catang bruk pajeng ba, duh ka bruk nao mai di bhap bini tuk Tết Nguyên đán jaik tal, oh caik ka tuai suai nao palei mbang Tết kayua oh hu radaih pajeng. Dom gah chức năng patagok bruk tui iek yaom kaom, peih bruk pajeng ba pandap panda hu siam mekre dalam tuk dahlau, dalam saong hadei di Tết, abih di nyu lac dom bhum atah bayah, bhum urang bangsa takik, kaoh, pulao.

Thun ini, dalam tỉnh An Giang hu 20 doanh nghiệp hu mbaok tame bruk tani tanat yaom kaom ngan haong abih tih yaom jien khik caga pandap panda tui kuhria lac 1.250 tỷ đồng, tagok labaih 3% dut saong thun dahlau. Dom kapul hu mbaok tame pablei pandap panda tani tanat yaom kaom hu ba kein lagaih pambuak haong bruk masaiy jien laba lap saong lagaih di abih. Gam tui di nan, jeng hu bruk ngak lac peih bruk ngak mbang, pablei salih, khik caga pandap panda piah khik hu chất lượng, pablei pandap tui njauk yaom haong panuac sanya, samar drah pabak ginup pandap panda tuk darak pasa trun tagok; hu mbaok tame dom danak dak pambuak cung cầu, daong duah jalan pablei tabiak dom pandap panda kaya nong, pandap mbang salamat, peih dom mbang radaih ba pandap Việt mai tal palei pala, mai labik ngak kong, peih dom danak dak khuyến mại,.…

Dalam 1 adit tapa, di tỉnh Đắk Lắk hu mboh saong langyah bruk 2 kapul anek saih blei jru hóa chất mai ngak pháo pandar saong pablei ka ayut sahabat. Dom adei dalam 2 bruk ini, hu umo meng 10 tal mala 15 thun, oh ka sahneng mboh dom kanjah jhak di bruk me-in pháo patuh. Di kreh bilan 12 ni, sa uranaih umo 12 thun daok di xã Cư Êbua, ban Buôn Ma Thuột sanh abih 2 palak tangin tuk me-in phao. Trung tá Kiều Mạnh Hùng, urang dang akaok công an huyện Krông Pắk, tỉnh Đắk Lắk brei thau, piah pacang cakak dom bruk dreih yau nan saong pandik harao meda rah tabiak, amaik ame dom anek saih saong dom gru pato njauk jhul khang bruk pathau khan, tacei pato, langyah brei thau dom kanjah jhak, pandik harao di bruk me-in pháo brei dom anek saih thau. Meng nan, paglaong hatai sahneng mboh di dom adei ka dom kan kandah, pandik harao di bruk ini

Dah page ini, Tòa án bhap bini pakat glaong di Hà Nội hu tuyên án phúc thẩm ngan haong 21 bi cao dalam duas "mbang par daong ba". Tui nan, Tòa taong yaom lac rilo bị cáo hu taduan dom bruk ngak suan di drei, kham marat ngak pasiam veik dom bruk ngak suan, hu dom pakat, kanja bhum palei likau trun án. Kayua yau nan ye, hu asal kadha piah trun duas ka rilo urang bi cao. Dalam 4 urang hu kaoh duas daok guk luac rai dalam mbang langyah tui hukum tok hu urang điều tra dahlau deih ong Hoàng Văn Hưng hu pakat phúc thẩm kaoh duas trun daok 20 thun guk, 3 bị cáo Phạm Trung Kiên, Nguyễn Thị Hương Lan saong Vũ Anh Tuấn kaoh duas daok guk luac rai. Dom bi cao karei hu trun bruk taong phat duas saong tuk án sơ thẩm. Daok dom bi cao hu ngak pasiam dom bruk ngak suan, Tòa hu brei langyah bruk khan cambaih laih, pacang cakak drap ar.

Taong Yam ndok Gah Y tế Dunya (WHO) Tedros Adhanom Ghebreyesus hu tabiak harak ndom puac jhung thun 2023, hadei di 3 thun srau kadau Covid-19. Dalam harak nan, urang dang akaok WHO hu ndom tal rilo bruk y tế di dunya, dom cuang kandah saong dom siam mekre dalam gah y tế thun 2024, gam haong panuac ieu caga pacang dom jit praong meda hu di anak tal. Ong Tedros jeng ndom lac, anak dom jit ruak meda tamuh tabiak di anak tal, dunya jeng daok dom wang huan dalam bruk caga, pacang. Taong Yam ndok WHO caong lac, thun 2024 meda “ba mai sa jalan piah langyah dom wang huan ini”, tuk dom taneh ia kham merat ginum biai ka sa harak pambuak bruk dunya camereip abih ka dom kan kandah di jit praong.

Công ty kong nghe rilo taneh ia di Mỹ - Apple harei kabroi hu buh harak kháng cáo brei pakauk blei tame đồng hồ thông minh (Apple Watch) di Mỹ. “Urang praong di kong nghe” ini jeng hu payua harak ieu kakei samar drah payua tal Tòa phúc thẩm Liên bang Mỹ piah brei padeih harak pakauk ngan haong pandap panda ini takik di nyu tal tuk Jabat Hải quan saong Khik caga jalan tapen negar Mỹ tabiak panuac lac dom pandap panda hu ngak tabiak gilac di đồng hồ thông minh hu ngak suan bằng ngak tabiak di Công ty kong nghe prein yava Masimo halei oh saong brei padeih harak pakauk dalam tuk Tòa án pasang iek panuac ieu kakei di Apple. Apple brei thau lac Jabat Hải quan meda ba tabiak panuac ka bruk nan di harei 12/1 thun hadei. 

Chứng khoán châu Á harei ini tagok khang, tui hadei bruk tagok veik meng Phố Wall. Gah đầu tư chreih chrai caong lac, Cục Dự trữ Liên bang Mỹ (FED) meda cakak trun yaom laba samar abih lac di bilan 3 thun hadei, dui tui bruk dom gilang pariak trung ương praong di mangaok dunya meda brei pacadu yaom jien laba di thun 2024. Hatai chreih chrai daok jhul tagok bruk oh huac khat lahik saong jhul tagok veik chứng khoán dunya. Angaok darak pasar jien padai, jien đô la Mỹ jeng daok di labik oh khang saong trun mai tanut biar abih dalam 5 bilan duk haong canaih jien padai saong biar abih dalam 4 bilan duk haong jien Euro.