Kuhria tal abih thun 2023, dalam negar hu labaih 31.300 HTX, dalam nan hu labaih 20% HTX hu yam ndoc lac urang kumei pan bruk, hu mbaok tame Hoi dong quan tri. Dalam jaik 2,6 trieu urang ngak bhian ngak bruk dalam labik Kinh te kapol nyaom, HTX ye hu tal 70% lac urang kumei. Rilo urang kumei  khang hatai ngak tui hatai takre, padang mbang ngui meng HTX.  Bruk hu mbaok di urang kumei tame dom HTX, kapol nyaom brei mboh jalan tacei ba di Karja ka bruk patagok Kinh te kapol nyaom, HTX daok hu rilo  urang kumei  pachreih tui, meng nan hu rik tame ngak siam bruk padang ngak palei pala birau sinh thái, palei pala birau, urang nong hadah krah.

UBMT negar VN ban Cần Thơ bahrau peih bruk padang ngak 100 baoh sang jum pataom ka dom sang kan kathaot, sang hu raidiuk kan kandah daok dalam ban. Tuk peih bruk padang ngak, UBMT negar ban Cần Thơ hu jao bảng tượng trưng daong padang ngak 100 baoh sang jum pataom ka 9 quận, huyện; dalam nan huyện Thới Lai hu 15 baoh, yaok baoh yaom 50 triệu đồng haong yaom jien abih tih lac 5 tỷ đồng kayua dom jabat, doanh nghiệp, urang ngak pahla daong brei.

Dom mbang tabung glaong ia mbak njom tame di labik pabah kraong Cửu Long meda rah tabiak gam gam meng ini tal abih bilan 4 di dom kraong Vàm Cỏ, Cái Lớn. Piah trun takik khat lahik di urang ngak nong, Mentri Ngak nong saong Patagok palei pala tacei ba  UB bhap bini do tỉnh, ban di bhum taneran kraong Cửu Long pakhang dom jalan pacang caga tuk ia mbak njom tame glong. Abih di nyu, kakei bhap bini oh trun pajaih padai di dom  bhum mbuan njom ia mbak. Dom bhum palei oh brei mikva kurang ia pandar atau brei pandar ia nerak. 

Urak ini dalam tỉnh Cà Mau hu jaik 12.000 baoh sang dalam bhum daok kurang ia taba piah pandar. Dom sang brei nao blei ia taba meng dom ghe, gilai haong yaom glaong, abih di nyu lac dom labik oh raok hu bingun. Gah ngak nong tỉnh Cà Mau kakei bhap bini pandar ia patak pataom, pandar dom pandap hu blaoh piah khik ia pandar caga tuk ia trun biar, ngak kan kandah ka bruk mek ia. Gah chức năng daok pasang iek dom sang kurang ia piah hu jalan daong, yau pabak brei bồn padang ia, peih praong bruk pabak ia. 

Di palei Hamu Craok, ban sit Phước Dân, huyện Ninh Phước, tỉnh Ninh Thuận, langiu bruk ngak lan, bhap bini  daok hu bruk ngak sarak pariak biak gheih. Dom baoh sang ngak bruk sarak pariak duah jien tame tani tanat, kham padang ngak palei pala birau kaya meda. Pandap mikva palei Hamu Craoh ngak tabiak lac mbah hala, hop hala, thon hala saong dom pandap karei karei hu pandar dalam adat ngak Kareih di urang Cam Bini yau laok cur, patin tuh ia, mbah hala.

Rajaei Hàn Quốc khan lac brei peih praong jalan talei pandiak piah daong dom bác sĩ daok dang anak bruk srau kadau meng ayut sahabat meyah oh hu mbaok tame bruk đình công piah cagar veik dom bruk kuhria salih bahrau di rajaei. Akaok Mintri Y tế Hàn Quốc ndom lac daok sangka brei ka dom thực tập sinh y khoa meda mai ngak bruk veik bo oh njauk hagait. Kuhria tal harei ini, Hàn Quốc hu 5.556 bác sĩ padeih bruk hadei di đình công. (VOV) 

7 urang metai saong 2 urang daok gar mala labik jaleih  hadei di bruk patuh khí gas trak di sa mỏ dang di tỉnh An Huy, gah timur Trung Quốc. Mbang patuh  rah tabiak di jala pandiak harei kabroi ( tui tukvak pak nan) hu 24 urang jang daok ngak bruk ala lubang dang. Bala di lubang dang ngak metai manuac oh takik di Trung Quốc. Bilan 2 meng blaoh, 10 urang metai dalam bala di Bình Đỉnh Sơn, bhum kreh Trung Quốc ngak brei jakar pak nan njauk ngak bruk pasang iek salamat.

Bilan eik Ramadan di urang Islam daok tal mai dalam tuk bruk mesruh gauk di Gaza jeng daok rah tabiak. Yaok ratuh urang Palestine pataom gauk di labik sang megik Islam Al-Aqsa di Jerusalem piah tui iek ia bulan tagok di melam adit blaoh, piah huak eik malam camereip di bulan Ramadan. Ini lac sa dalam dom labik ginreih abih di dunya ngan saong urang Islam saong jeng lac labik ginreih di urang Do thái, hu ieu lac Núi Đền. Dom adat ka quyền tame labik ini, bhian ngak brei bruk di labik ini catang tagok, abih di nyu lac dalam dom tuk hu dom harei hu makna praong yau ye bilan eik Ramadan.