Tui Mentri Ngak nong saong patagok palei pala, dalam negar jak ba hu labaih 2 trieu 8 rituh ribau ty ndong buh tame ka bhum palei pala, dalam nan hu bruk padang ngak palei pala birau. Dalam negar, hu 22 tỉnh, ban di trung uong hu taong abih dom xã mek hu tanut chuan palei pala birau. Hu 5 tinh lac: Nam Định, Đồng Nai, Hà Nam, Hưng Yên saong Hải Dương hu Thu tuong Rajaei taduan ngak salah bruk padang ngak palei pala birau. Tui kuhria mboh dahlau tal abih thun ini, dalam negar  hu labaih 79% dom xã mek hu tanut chuan palei pala birau.

Labaih 1,6 ty dong lac jien Kapol pachreih bac TPHCM hu alin ka anek saih sinh vien kham merat bac megru  naih joi dalam thun ini. Paok jien Pachreih bac - Pachreih megru 1&1 hu jeng angan iew biak gheih di danak dak jien bac di Kapol pachreih bac TPHCM. Ini lac paok jien bac  alin brei ka dom sinh vien yam tapa kan kandah bac megru naih joi, daong dom adei yam tapa kan kandah dalam raidiuk. Mbiah tal ini, jien Pachreih bac naih joi peih ngak hu 24 thun, brei ka labaih 2.700 sinh vien, kuhria abih tih jien hu jaik 28 ty dong.

So Khau tin saong Pathau khan tinh Soc Trang pambuak haong don vi daong brei 11 baoh mac jamraih ka xa Thuận Hưng, huyen Mỹ Tú. Thuận Hưng lac xa hu labaih meteh dom bhap bini Khmer diukrai. Muk Châu Thị Muỗi, Akok UBND xa Thuận Hưng khan lac, hu dom baoh mac jamriah nan meda daong ka dom puk palei dalam xã pandar hu ralo kong nghe dalam bruk ngak salih pandar so saong dom bruk chinh tri di puk palei, pakhang bruk pandar hu lagiah, pabak hu bruk ngak yau urak ini. 

Mban Bangsa tỉnh An Giang pambuak haong Rayo Papar sap – Papar binguk An Giang  hu alin 131 paok pandap kuhria abih tih  jiak 40 trieu dong brei ka urang kathaot di xa Mỹ Khánh, ban Long Xuyên. Dom paok pandap nan yaomalc sit min hu pabak preih pachreih dom baoh sang  birau tabiak trun kathaot brei pasiam kan kandah piah yam tagok ngak mbang patruh kathaot.

Gah chuc nang tinh Long An saong bhap bini bhum Đồng Tháp Mười daok samar drah njuk tathuak ia tabiak ka dom mbang hamu, taneh pala njam patam saong phun mbang baoh, pasang iek veik dom ar pacang ribaong kraong, dom labik mbuan jaleih. Akok UB bhap bini tinh Long An iew dom bhum palei ramik kuhria brei caga manuac, pandap panda, radaih piah sumu ngak bruk tuk hu bala rah tabiak. Dahlau di nan, ia ribuk tagok samar gam haong ngak khut khat labaih 700 ha padai, njam patam saong  phun mbang baoh. Tui kuhria mboh dahlau, meyah ia ribuk daok tagok samar veik meda labaih 15.000 ha padai, phun mbang baoh saong njam patam njauk khut khat.

Dom urang srong daong bala di Philippines daok kham duah yaok pluh urang daok labik kayua ribuk Trami, dalam tuk urang metai  tagok tal 100 urang. Tui kuhria di jabat gah bala taneh ia Philippines, ribuk Trami ngak panduan ba labaih 560.000 urang brei nao labik karei saong takik abih lac 36 urang lahik. Yaok rituh palei  dauk dalam ia tasik. Urang ngak praong di Philippines khan brei thau chip ngan haong 84 ban saong ban sit. Urang metai meda daok patagok dalam dom harei anak tal tuk gah daong duah urang gaok bala meng tame hu labik daok gal tavak.

Meng akok thun mbiah tal ini Campuchia taduan hu jaik 5 trieu tuai damuai negar langiu, tagok 22% dut saong tukvak ini thun dahlau. Quoc vu khanh gam ba panuac di Mentri Yulit Campuchia khan lac, bruk tani tanat chinh tri saong an ninh di taneh ia ini  lac bruk njauk pachreih tuai damuai dunya mai rivang saong buh jien tame di Campuchia. Langiu di nan, Campuchia daok lac taneh ia hu rilo labik rivang ma-in, meng dulich ilamo, sajarah, alam langik tasik tal jitvu tuk halei jeng paglong piah duk ka tuai hu siam abih.

Ceik apui Marapi lac sa dalam dom ceik apui daok diuk catang abih di Indonesia, pruh dom mbuk bau dhur mur, me-om dom palei. Urak ini oh ka brei thau bruk metai lahik kayua bau apui pruh nan. Ceik Marapi, di Pai Sumatra danei angan dom bruk apui pruh bau kan thau dahlau kayua ceik apui oh lac kayua magma, ngak megei taneh njauk brei tui iek. Bruk pruh bau catuah meng bilan 12 thun blaih ngak 24 urang ndik ceik metai. Kuhria meng nan, dua jalan ndik ceik brei kareik./.