Pasang iek bruk “Gheih jak ba” dalam bruk cak rok patagok ilamu siam gheih jalan diukrai, ilamu saong prein khang di agama saong padang ngak raidiuk ilamu ban Cần Thơ di harei kabroi, ong Bùi Tuấn Quang, Pho Akok Mban Dân vận Trung ương caong khin pakat ủy dom pakat patui patagok prein khang, lagaih di bruk ba gauk “Gheih jak ba”, duah thau hatai sahaneng di bhap bini, taduan panuac meng cơ sở, abih di nyu lac dom bruk ngak hadah krah dalam dak padang bruk “Gheih ja ba”. Sangka pasang iek, tui iek, pambuak bruk ngak tui, patagok saong pambak praong dom bruk ngak gheih mekre. Pachreih bruk “Gheih jak ba” dalam thun, ban Cần Thơ tut angan 2.642 bruk di dom gah raidiuk, xa hoi.

Labaih 55 tỷ đồng lac abih tih paok jien bahrau hu dom kapul, doanh nghiệp; quận, huyện saong ban Thủ Đức, TP.HCM tut angan piah pachreih tui “Tết anit ranam” Xuân sak ine girai thun 2024. Ngan haong phun jien ini, danak dak meda sangka ka labaih 100.000 urang kan kathaot, urang jaoh jo, daong ka dom baoh sang gaok kan kandah hu jien piah mbang Tết. Abih di nyu nan lac alin pandap ka dom urang njauk ruak kan kandah, urang ngak lahik bruk ngak, urang umo praong thun oh hu gauk gar; anek saih, sinh viên langiu di tỉnh daok veik ban raya ngak veik dalam harei Tết, urang jaoh jo.

Kum pakacah dom tỉnh bhum Đông Nam bộ hu 7 tỉnh: Bà Rịa - Vũng Tàu, Bình Dương, Bình Phước, Bình Thuận, Ninh Thuận, Đồng Nai saong Tây Ninh hu jaik 35.000 halan hatian hu mbaok tame daong bruk chữ thập đỏ. Dalam thun ini, kuhria taong abih bruk ngak pahala xa hoi di kum peih ngak labaih 559 tỷ đồng, daong labaih 1,3 trieu mbang urang…Kapol Chữ thập đỏ dalam kum daok kham merat pathau khan, jak ba bhap bini halan hatian brei darah, brei mo, alin brei tạng saong dom karei di rup pabhap. Dalam thun hu 640 urang tut ngan brei alin tạng, dalam nan hu 4 urang brei alin blaoh.

Mban Bangsa saong Agama tỉnh Bạc Liêu bahrau peih mbang pasram duh ka 130 urang lambaok lac Urang hu angan je dalam bhum mikva bangsa takik. Di pak ini, urang hu angan je hu pang dom asal kadha ka bruk cak rok patagok kinh tế - xã hội; Khau tin pathau khan sarak, hukum ka bruk bangsa; patagok yaom glaong bruk ngak di Urang hu angan je bhum mikva bangsa takik ngan haong bruk bangsa saong peih ngak sarak bangsa. Tal bac pasram piah rik tame daong ka dom urang lambaok thau tantu cambaih laih ka jalan ngak, sarak di Ndang, sarak hukum di Kanja, dom sarak bangsa hu saong daok hu peih ngak dalam ban.

Kruac sành di dom tỉnh gah Meng daok tame bilan paik baoh ralo, yau nan min yaom pablei biar. Di Vĩnh Long yaom pablei di bein labaih meng 3.000 – 4.000 đồng sa kilo, ngan haong yaom nan urang nong khat lahik biak ralo. Ini lac mbang ka 2 yaom kruac sành di Vĩnh Long trun ngak kan kandah tal urang pala. Tui So Ngak nong - Patagok palei pala tỉnh, taneh pala kruac di Vĩnh Long tuk halei jeng khang tui yaok thun, kayua kein laba mek tame meng janih phun pala ini biak glong, yaom kruac meng dom thun 2015 -2020 tuk halei jeng glong, abih di nyu lac karei bilan, yaom kruac meda meng 13.000 - 18.000 đồng sa kilo. Yau nan ye, kruac sành yam tapa 900.000 tấn sa thun.

Hadei di dom mbang kham marat dui atah luac 16 harei di kapul daong duah urang gaok bala, abih tih 41 urang ngak kong daok gar dalam jalan lubang Silkyara pak bang Uttarakhand, gah barak negar Ấn Độ hu ba tabiak langiu salamat di melam kabroi. Tui dom bác sĩ, abih tih dom urang ngak kong jeng mboh prein yava siam. Akaok mintri jalan mbak saong jalan nduac samar Ấn Độ brei thau lac, mbang daong duah dom urang njauk bala lac bruk kham marat biak lagaih di rilo jabat hu ba mai bruk siam makre ini. Bruk ini hu taong yaom sa dalam dom bruk bruk daong duah urang njauk bala hu makna abih dalam dom thun jaik di ini pak Ấn Độ.

11 urang metai dalam sa bala rah tabiak di ceik dhan harei kabroi di tỉnh Hắc Long Giang, gah timur negar Trung Quốc. Bruk ba tal bala daok pasang iek veik. Meyah camereip lac kayua patuh patau tuk năng lượng pataom tame ba tal patau ra-ai talah khang. Dalam thun ini rilo ceik dhar di Trung Quốc rah tabiak ralo mbang bala ba tal metai manuac, oh lac rajaei Trung Quốc rilo mbang iew brei ngak tui tani tanat jang dom tanut chuan salamat. Dom kong ty mek dhar daok duah jalan jhul pakhang bruk mek hu ralo dhar.  

Meng bilan 1/2024, Australia meda pakauk blei tame negar pakao điện tử pandar sa mbang, piah trun manieng patakik dom urang ranaih umo njuk pakao điện tử. Patui di nan, meng harei 1/3/2024, Australia jeng meda oh brei ka urang halei ba pakao dien tu meng negar langiu tame negar ini; pakauk blei tame negar dom janih pakao dien tu oh daok dalam angan bac si brei pandar; gam tui di nan, meda pacang cakak bruk ngak, yaih khan, pabak, pandar pakao dien tu pandar sa mbang saong oh hu kein taong ruak di negar ini.