Amuk Trương Mỹ Hoa, Phó akaok negar dahlau deih, akaok kadung jien bac Vừ A Dính, akaok kalup kapul “kayua Hoàng Sa - Trường Sa anit ranam” bahrau jao 100 paok pandap tet ka 100 sang sarak, mikva bangsa takik gaok kan kandah di xã Quang Minh, ban sit Chơn Thành, tỉnh Bình Phước. Dom pandap ini hu Pho akaok negar dahlau deih, amuk Trương Mỹ Hoa jak ba meng dom doanh nghiep. Ini lac dom paok pandap piah pachreih hatai kham marat, piah meng nan dom baoh sang caga raok tet bui sambai, chreih chrai, trei sir.

LĐLĐ tỉnh Bình Dương hu alin hadiah 32 harak vé kapal haoh nao mai ka urang ngak nao palei mbang Tết. Urang dang akaok LĐLĐ tỉnh Bình Dương hu nao tal mblang kapal haoh palao dom urang ngak nao palei. Langiu di nan, Tổng LĐLĐ Việt Nam jeng hu daong harak vé kapal haoh ka 20 urang ngak daok di Bình Dương. Dom urang ngak hu taduan harak vé kapal haoh hu par dalam dom harei tal. Thun ini Bình Dương daok khik "Sruh radaih akaok thun anit ranam" ba 1.450 urang ngak nao palei mbang Tet. Công đoàn pakat angaok hu alin hadiah 3.500 harak vé radaih ka urang ngak.

Dua harei ini, dom tuai mai tal sang ga Sài Gòn daok tagok rilo. Meng ngak siam bruk caga dahlau saong rami ramik kapul ngak bruk nan ye bruk taduan raok tuai nao radaih pui di ga Sài Gòn hu rahtabiak tani tanat. Ong Nguyễn Ánh Luyện, Phaok yam ndok dhar radaih pasei Sài Gòn brei thau, tukvak tabung glaong ahlau tuk Tết di ga Sài Gòn lac di harei 28 bilan Mat ngan haong 19 sruh radaih pui hu peih nduac, pajeng tui 10.000 urang sa harei. Iek tui bruk, gah jalan pasei meda brei pambuak veik toa tame dom sruh radaih pui piah pabak labik daok. Urak ini, harak ve radaih pui tukvak dahlau saong hadei di Tet jeng daok, taeng dalam tukvak meng harei 23 – 28 bingun bilan Mat saong harei 5 bingun saong 8 bingun bilan tha lac daok takik.

Mban tacei jalan jak ba brei darah ngak pahla tỉnh Hậu Giang bahrau peih bruk jak ba brei darah di tuk Tết saong harei pataom Xuân hồng thun 2024 ngan saong kadha “Jalan nao di dom tanjaoh darah anit ranam”. Jalan daok pamaong tal di bruk ngak ini, lac jak ba 3.000 menuac tut angan brei labaih 2.300 đơn vị darah piah hu ginup darah khik caga ka dom sang iek ruak dalam tỉnh. Gam haong nan, lac jak ba takik di abih 100 urang caga brei darah dalam dom harei padeih Tết Nguyên đán thun 2024.

Mbang pakacah anek saih naih joi thun bac 2023 - 2024 hu 5.812 anek saih hu mbaok tame. Dom bhum palei ba akaok ka anek saih naih joi pakat negar lac Hà Nội, TP.HCM, Hải Phòng, Nghệ An, Hà Tĩnh, Vĩnh Phúc, Hải Dương, Nam Định, Bắc Giang, Quảng Ninh saong Thanh Hóa. Dalam dom bhum palei, Hà Nội ba akaok ngan haong abih tih 184 anek saih mek hu jai, TP.HCM hu 110 adei. Dalam top 10 tinh, ban hu dom anek saih mek hu jai dalam mbang pakacah thun ini hu TP.HCM tagok 10 pakat meng labik dang 12 tagok labik dang ka 2 dut saong thun blaoh. Thun ini, taphia di bruk pabak harak pok brei angan ka dom anek saih mek hu jai, dom adei daok veik jeng hu harak pok brei angan lac hu mbaok tame mbang pakacah.

Trung Quốc daok dang anak bruk langik tasik akaok thun kan kandah di abih kuhria meng di thun 2008. Sa mbang hajan, ribuk tuyết saong langik biak la-an hu tukvak atah di abih saong praong di abih kuhria meng akaok bilan brak jaik tuh tame taneh ia ini meng harei ini (31/1). Hu 15 tỉnh, ban njauk bão tuyết meng praong tal biak praong saong la-an biak khang. Gah tui iek bruk langik tasik pakat negar Trung Quốc brei thau, ini lac mbang tabung glaong nao palei mbang Tết, jeng lac tukvak praong dalam bruk ngak nong bilan brak, nan ye njauk caik hatai tal dom bruk oh siam di mbang langik tasik ini ngan saong bruk ngak nong saong jalan mbak nao mai. 

Sa bala jalan mbak rahtabiak di Tây Bắc Mexico ngak ka takik di nyu 19 urang saong 22 urang njauk rambuac. Mbang bala rahtabiak di jalan nduac samar di sa sruh radaih pajeng pandap saong sa sruh radaih buýt pajeng tuai di bang Sinaloa pak Tây Bắc Mexico di dah page harei kabroi. Taong abih dua sruh radaih jeng khuah saong bruk nao mai di mangaok jalan nduac samar ini njauk padeih kayua bala.

Tập đoàn Toyota Motor urak ini jeng daok khik kajap lac labik ngak ô tô pablei laik abih di dunya dalam thun ka 4 gam gam, pablei hu rilo abih, lac 11 triệu 200 rabau sruh radaih di thun 2023. Min, Toyota daok mbuan mboh bruk pablei suai veik hadei di tuk hãng radaih Daihatsu bilan dahlau brei padeih pajeng ba taong abih dom mẫu mã radaih kayua sa bruk pasang iek duah thau ka bruk oh kajap karo pambuak tal 64 mẫu radaih, dalam nan hu jaik 20 mẫu radaih hu pablei haong angan Toyota. Hãng ini jeng daok brei padeih pajeng ba dom mẫu radaih di hãng lac radaih pajeng pandap Hilux saong SUV Land Cruiser 300 hadei di tuk mboh suan dalam dom bruk nduac iek jamriak diesel../.